ලෝක ළමා දිනය එනකොට ඉගෙනීමට ආණ්ඩුවේ සල්ලි නෑ

දහතුන් වසරක අඛණ්ඩ අධ්‍යාපනය සඳහා රජය ප්‍රමාණවත් ලෙස මුදල් ලබා නොදීමෙන් පාසල් දරුවන් දැඩි පීඩාවකට පත්ව ඇති බව ලෝක ළමා දිනය එළැඹෙද්දී හෙළි වී තිබේ.

දිවයිනේ ප්‍රමුඛතම ගුරු සමිතියක් පවසන පරිදි වෘත්තීය පුහුණුව සඳහා අධ්‍යාපන අමාත්‍යාංශය මුදල් නොගෙවීමේ බර දරන්නට සිදුවී ඇත්තේ සිසු දරුවන්ටය.

“13 න් වසරක අධ්‍යාපනය ක්‍රියාත්මක වන පාසල්වල දරුවන් වෘත්තීය පුහුණු ආයතන වෙත යොමු කර ඔවුන් විසින් තෝරා ගන්නා විෂයයන්ට අදාළ ආයතනගත වෘත්තීය පුහුණුව ලබාදීම වෙනුවෙන් අධ්‍යාපන අමාත්‍යාංශය විසින් අදාළ වෘත්තීය පුහුණු ආයතන වෙත මුදල් නොගෙවීම මත එම ආයතනවල පුහුණුව ලබන සිසුන්ට නේවාසික පුහුණුවට අදාළව මුදල් ගෙවීමට සිදුව ඇත,” යි ලංකා ගුරු සංගමය නිවේදනයක් නිකුත් කරමින් පවසයි.

එසේම එම සිසුන්ට ලබාදෙන රුපියල් පන්සීයක දෛනික දීමනාව ද නොදීමෙන් සිසුන් දැඩි පීඩාවකට ලක්ව ඇති බවයි ලංකා ගුරු සංගමය පවසන්නේ.

සැප්තැම්බර් 29 අඟහරුවාදා ලංකා ගුරු සංගමය හා අධ්‍යාපන අමාත්‍යාංශ නිලධාරීන් අතර පැවති සාකච්ඡාවකදී මේ සම්බන්ධයෙන් කරුණු විමසු අතර මුදල් නොමැති කමින් ජාතික තරුණ සේවා සභාව, ක්‍රීඩා විද්‍යායතනය, නිවාස සැලසුම් හා ඉදිකිරීම් මධ්‍යස්ථානය ආදී ආයතන වෙත සිසුන්ගේ පුහුණුව වෙනුවෙන් මුදල් ගෙවා නොමැති බව එහිදී අමාත්‍යාංශ නිලධාරීන් ප‍්‍රකාශ කළ බව ලංකා ගුරු සංගමයේ ප්‍රධාන ලේකම් පවසයි.

ගුරු සංගම් නායක ජෝසප් ස්ටාලින්ගේ අත්සනින් යුතුව සැප්තැම්බර් 30 බදාදා නිකුත් කර තිබෙන මාධ්‍ය නිවේදනයේ වැඩි සදහන් කර ඇත්තේ මෙම ආයතන වෙත මිලියන 57 ක පමණ මුදල් ගෙවීමට ඇති අතර , මෙම වැඩසටහන සඳහා රුපියල් මිලියන 1000 ක පමණ මුදල් අවශ්‍ය නමුත් අදාළ මුදල් අමාත්‍යාංශය වෙත නොලැබීම මත මෙම තත්වය උද්ගතව ඇති බව බලධාරීන් පැවසු බවයි.

සාමාන්‍ය පෙළ විභාගයෙන් පසු පාසල් හැර යන සිසුන් වෘත්තීය විෂය ධාරාවක් වෙත යොමු කිරීමේ 13 න් වසරක අඛණ්ඩ අධ්‍යාපනය ක‍්‍රමානුකුළව අදියරෙන් අදියර ක්‍රියාත්මක කිරීමට සැලසුම් කර තිබූ අතර, පසුගිය වසර දක්වා එය නියමිත පරිදි ක්‍රියාත්මක වු බව ලංකා ගුරු සංගමය පෙන්වා දෙයි.

මේ ආකාරයෙන් අත්‍යවශ්‍ය අධ්‍යාපන කටයුත්තක් සඳහා මුදල් ලබා නොදීමෙන් රජය උත්සාහ කරන්නේ 13 න් වසරක අධ්‍යාපන වැඩසටහන අතරමඟ නවතා දැමීමට ද යන්න සම්බන්ධයෙන් ලංකා ගුරු සංගමය බරපතල සැකයක් මතු කර තිබේ.

13 න් වසරක අධ්‍යාපන වැඩසටහන තවදුරටත් පුළුල් කළ යුතු වැඩසටහනක් වන අතර, එය විවිධ බාධක ඇති කර අතර මැද කඩාකප්පල් වීමට ඉඩ හැරීම බරපතල අපරාධයක් බව ලංකා ගුරු සංගමය අවධාරණය කරයි.