ජනපතිගේ අගමැතිට අධිකරණයෙන් තහනමක්

0
1018
wedding people

ජනාධිපතිවරයාගේ කැමැත්ත පරිදි අගමැති ධුරයට පත් කරන ලද මහින්ද රාජපක්ෂ ඇතුළු කැබිනට් මණ්ඩලයට අධිකරණය විසින් එම තනතුරු දැරීමේ තහනමක් පනවා තිබේ.

එක්සත් ජාතික පක්ෂය, දෙමළ ජාතික සන්ධානය, ජනතා විමුක්ති පෙරමුණ, ශ්‍රී ලංකා මුස්ලිම් කොංග්‍රසය , සමස්ත ලංකා මහජන කොංග්‍රසය යන පක්ෂවලට අයත් පාර්ලිමේන්තු මන්ත්‍රීවරු 122 දෙනෙකු ඉදිරිපත් කරන ලද පෙත්සම් සලකා බැලු අභියාචනාධිකරණ විනිසුරු ප්‍රිතිපද්මන් සූරසේන සහ අර්ජුන ඔබේසේකර යන විනිසුරු මඩුල්ල 03 සඳුදා මෙම අතරු තහනම පනවන ලදී.

පෙත්සම් විභාග කිරීමට අවසර ලබා දුන් අධිකරණය අතුරු තහනම් නියෝගය නිකුත් කරමින් වගඋත්තරකරුවන් හට පෙත්සම නැවත විභාගයට ගැණෙන ලබන 12 වනදා අධිකරණයේ පෙනී සිටින ලෙස නොතීසි නිකුත් කර ඇත.

අධිකරණය විසින් නිකුත් කරන ලද තහනම් නියෝගය පෙත්සම් විභාගය අවසන් වනතෙක් බලපැවැත්වෙන බව ද එම නියෝග සඳහන් බවයි අප වාර්තාකරු පවසන්නේ.

මහින්ද රාජපක්ෂ හට අගමැතිධුරය දැරීමට පාර්ලිමේන්තුව බහුතර බලයක් නොමැති බව සිය පෙත්සමෙන් පෙන්වා දෙන පාර්ලිමේන්තු මන්ත්‍රීවරුන් ඒ බව කථානායකවරයා විසින් ද තහවුරු කර ඇති බවයි කියා සිටින්නේ.

ආණ්ඩුක්‍රම ව්‍යවස්ථාවේ ප්‍රතිපාදන ප්‍රකාරව මහින්ද රාජපක්ෂ හට අග්‍රාමාත්‍ය ධුරය දැරීමට නීත්‍යානුකූල හිමිකමක් නොමැති බවට තීන්දු කොට ඔහුගේ සහ ඔහුගේ අමාත්‍ය මණ්ඩලයේ පත්වීම බල රහිත කිරීමේ ආඥාවක් නිකුත් කරන ලෙසයි මෙම පෙත්සමෙන් ඉල්ලා ඇත්තේ.

මහින්ද රාජපක්ෂ ඇතුළු හතළිස් නව දෙනෙකු මෙම පෙත්සමෙහි වගඋත්තකරුවන් ලෙස නම් කර ඇත.

Facebook Comments