ජනාධිපතිවරයා විසින් ප්‍රකාශයට පත් කරන ලද හදිසි නීති රෙගුලාසි වල ඇතුලත් කර ඇති ඇතැම් වගන්ති වලින් මුලික අයිතිවාසිකම් කඩ වී ඇති බවට ශ්‍රේෂ්ඨාධිකරණයට මූලික අයිතිවාසිකම් පෙත්සම් දෙකක් ගොණු කර තිබේ.
විකල්ප ප්‍රතිපත්ති කේන්ද්‍රයේ විධායක අධ්‍යක්ෂ ආචාර්ය පී. සරවනමුත්තු හා පුරවැසි බලය සංවිධානයේ ගාමිණි වියන්ගොඩ මෙසේ ශ්‍රේෂ්ඨාධිකරණයට පෙත්සම් ඉදිරිපත් කර ඇත.
පාස්කු ඉරිදා ප්‍රහාර මාලාවෙන් පසුව ජනාධිපතිවරයා විසින් ප්‍රකාශය පත් කරන ලද හදිසි නීතියට පාර්ලිමේන්තුව ද ඒකමතිකව සම්මත කරන ලදී.
ජනාධිපතිවරයා විසින් ප්‍රකාශයට පත් කරන ලද 2019 වසරේ අංක 1 දරණ හදිසි නීති විශේෂ විධිවිධානවල අඩංගු ඇතැම් වගන්ති වලින් මෙරට ආණ්ඩුක්‍රම ව්‍යවස්ථාව තුළින් සහතික කර තිබෙන මූලික මිනිස් අයිතීන් උල්ලංඝනය වන බවටයි පෙත්සම්කරුවන් චෝදනා කරන්නේ.
එමෙන්ම හදිසි නිති රෙගුලාසි මාලාවේ අඩංගු තවත් සමහර වගන්තිවලින් අධිකරණය සතු බලතල සීමා කිරීමක් සිදුවන බව ද ඔවුන් සිය පෙත්සම් වලින් පේනවා දෙති.
එම කරුණු සැලකිල්ලට ගෙන හදිසි නීති රෙගුලාසි තුළ අන්තර්ගත ඇතැම් වගන්ති වලින් ආණ්ඩුක්‍රම ව්‍යවස්ථාව මගින් සහතික කර තිබෙන මූලික අයිතීන් උල්ලංඝනය වන බවට තීන්දුවක් ලබාදෙන මෙන් ද පෙත්සම්කරුවන් ඉල්ලා සිටිති.
ප්‍රසන්න ජයවර්ධන, මුර්දු ප්‍රනාන්දු සහ එස්. තුරෙයිරාජා යන ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල හමුවේ 10 සඳුදා පෙත්සම කැඳවු අතර අදාළ පෙත්සම් සලකා බැලීම සඳහා ජුලි මස 05 වනදා කැඳවන ලෙස අධිකරණය නියෝග කළේය.
ජනාධිපතිවරයා වෙනුවෙන් නීතිපතිවරයා, ආරක්ෂක ලේකම් ශාන්ත කෝට්ටේගොඩ සහ නීතිපතිවරයා පෙත්සම් වල වග උත්තරකරුවන් ලෙස නම් කර ඇත.
Facebook Comments
