“දේශපාලන විසඳුමක් දෙන්න අවධානය යොමු කරනවා” මෝදි දෙමළ නායකයින්ට සහතික වෙයි

0

ශ්‍රී ලංකාවේ ජාතික ප්‍රශ්නයට විසඳුමක් ලෙස ස්ථිර දේශපාලන විසඳුමක් කඩිනමින් ලබාදීම සම්බන්ධයෙන් තමන් දැඩි අවධානයක් යොමුකරන බවට ඉන්දීය අග්‍රාමාත්‍යවරයා දෙමළ ජාතික සන්ධානයට (TNA) පොරොන්දු වී තිබේ.

කෙටි නිල සංචාරයකට 09 ඉරිදා මෙරටට පැමිණි ඉන්දීය අග්‍රාමාත්‍ය නරේන්ද්‍ර මෝදි හා දෙමළ ජාතික සන්ධානයේ පාර්ලිමේන්තු කණ්ඩායමේ කිහිප දෙනෙකු සමඟ පැවති සාකච්ඡාවේදී අගමැතිවරයා මෙසේ සහතික වී ඇත.

ඉන්දීය තානාපතිවරයාගේ නිල නිවසේ මිනිත්තු 8 ක පමණ කාලයකට සීමා වු මෙම හමුවට දෙමළ ජාතික සන්ධානයේ නායක ආර්.සම්බන්ධන් හා මන්ත්‍රීවරුන් වන ධර්මලිංගම් සිද්ධාර්ථන්, එම්.ඒ.සුමන්තිරන්, සෙල්වම් අඩෙයිකලනාදන්, මාවෙයි සේනාධිරාජා සහභාගී වි සිටියහ.

ජනවාර්ගික අර්බුදයට ස්ථිර විසදුම් ගෙන ඒමේ අරමුණින් 1987 අත්සන් කරන ලද ඉන්දු ලංකා ගිවිසුමට අනුකූලව පුළුල් බලතල විමධ්‍යගත කිරීමක් සිදුකර නැති බව පෙන්වා දී ඇති TNA මන්ත්‍රීවරු ඉන්දීය රජයේ මැදිහත්වීම මත නොබෙදුණු එක්සත් ලංකාවක් තුළ වූ ආණ්ඩුක්‍රම ව්‍යවස්ථානුකූල දේශපාලන විසඳුමක් ජාතික ගැටළුවට ස්ථීර විසදුමක් ලබා දිය යුතු බවට අවධාරණය කර ඇත.

දේශපාලන විසඳුම් ගෙන ඒම වෙනුවෙන් තමන් දැඩි අවධානයකින් යුතුව කටයුතු කරන බවට සහතික වී ඇති ඉන්දීය අගමැතිවරයා ඒ සම්බන්ධයෙන් අදාළ පියවර ගන්නා බවට දෙමළ නායකයින් හට පොරොන්දු වී තිබේ.

උතුරේ ජාතික ගැටළුව ඇතුළු දෙමළ ජනතාවගේ ගැටළු හා ශ්‍රී ලංකාවේ තත්වය සම්බන්ධයෙන් නව දිල්ලියේ දී හමුවී සාකච්ඡා කළයුතු බවට දෙමළ නායකයින් කරන ලද ඉල්ලීම පිළිගෙන ඇති ඉන්දීය අගමැතිවරයා ඒ සඳහා කඩිනමින් අවස්ථාවක් සලසා දෙන බවයි සඳහන් කර ඇත්තේ.

Facebook Comments

wedding people