ශ්‍රී ලංකාවේ ථෙරවාද බෞද්ධ නිකායක පාර්ශව දෙකක් බලය බෙදීමට විරෝධය පළකර අලුත් ව්‍යවස්ථා සම්පාදනයට එරෙහිව යෝජනාවක් සම්මත කර තිබේ.
සියම් නිකායේ මල්වතු සහ අස්ගිරි විහාර දෙකේ කාරක සංඝ සභා මහනුවර දළදා මාලිගා පරිශ්‍රයට රැස්වී 18 බදාදා තීරණය කර ඇති පරිදි නව ව්‍යවස්ථාව රටේ ඒකීය භාවයට හානියකි, බලය බෙදීම ජාතීන් අතර බේද ඇති කිරීමකි.
ඒ අනුව නව ව්‍යවස්ථා සම්පාදනය වහාම නතර කල යුතු බවට රජයට යෝජනා කිරීමට දෙපාර්ශවය තීන්දු කළ බව අස්ගිරි ලේඛකාධිකාරී මැදගම ධම්මානන්ද අනුනාහිමියෝ මාධ්‍ය වෙත කියා සිටියහ.
විවිධ ක්ෂේත්‍ර නියෝජනය කරන විද්වතුන් පිරිසක් යෝජිත ව්‍යවස්ථාවේ “භයානක භාවය” පිළිබඳව සංඝයා වහන්සේ දැනුවත් කළ බව අනුනාහිමිවරු පැවසූහ.
ඒකීය භාවය සම්බන්ධව සහ බුද්ධාගමට ප්‍රමුඛත්වය ලබා දීම පිළිබඳව ජනපති සහ අගමැති දී ඇති සහතිකය බැහැර කරන සංඝ සභා “ඒකීය කියලා කිව්වට, බුද්ධාගමට තැන දෙනවා කිව්වට ඒ දෙකටත් නෑ හරි තත්වයක්. ඒ වගේම පළාත් සභාවලට සම්පූර්ණයෙන්ම බලතල දීලා තියෙනවා මේ ව්‍යවස්ථාවෙන් කියලා කියන්නේ,” යි මල්වතු පාර්ශ්වයේ දිඹුල්කුඹුරේ විමලධම්ම අනුනාහිමියෝ ප්‍රකාශ කළහ.
Facebook Comments
