මෙවර පළාත් පාලන මැතිවරණය රාජ්‍ය බලයෙන්, ධන බලයෙන් හෝ නිල බලයෙන් නොව නව මැතිවරණ ක‍්‍රමයට අනුව එය බුද්ධියෙන් ජයග‍්‍රහණය කළයුතු මැතිවරණයක් බව ජනාධිපතිවරයා පෙන්වා දෙයි.
යම් අපේක්ෂකයෙකුගේ හැසිරීම චරිතය සහ ජනතා පිළිගැනීම පැහැදිළිව ඔහුගේ ජයග‍්‍රහණයට හේතු වන බව සදහන් කළ ජනාධිපති මෛත්‍රීපාල සිරිසේන රටට ආදරය කරන සැබෑ චරිතවත් මහජන නියෝජිතයින් පිරිසක් මෙවර මැතිවරණයේදී ජයග‍්‍රහණය කරනු ඇති බවට විශ්වාසය ඵල කර සිටියේ ශ්‍රී ලංකා නිදහස් පක්ෂ සංවිධායකවරුන් සමග ජනාධිපති මන්දිරයේ පැවති හමුවකදීය.
ඉදිරි පළාත් පාලන මැතිවරණයේ සංවිධාන කටයුතු පිළිබද මෙම හමුවේදී දීර්ඝවශයෙන් සාකච්ඡාවට ලක් වී ඇති අතර ශ්‍රී ලංකා නිදහස් පක්ෂයේ ජ්‍යෙෂ්ඨ මැති ඇමතිවරු පිරිසක් ද මීට එක්ව සිටි බව ජනාධිපති මාධ්‍ය අංශ පවසයි.
පිරිසිදු දේශපාලනයක්
කුමන අභියෝගවලට මුහුණදීමට සිදු වුවද පිරිසිදු දේශපාලන ව්‍යාපාරයක් වෙනුවෙන් වූ තම කැපවීම අත් නොහරින බව අවධාරණය කල ජනපති යහපත් දේශපාලන සංස්කෘතියක් මතු පරපුර වෙනුවෙන් උරුම කරදීමේ වගකීම කවුරුන් හෝ ඉටු කිරීම අද ජාතියේ අවශ්‍යතාවයක් බවට පත්ව ඇති බව කියා සිටියේය.
තමා එම යුග මෙහෙවරට උරදී සිටින විට රටට ආදරය කරන ලක්ෂ සංඛ්‍යාත ජනතාව ඒ වටා ඒකරාශිවනු ඇති බවද ජනාධිපති මෛත්‍රීපාල ප්‍රකාශ කළේය.
ශ්‍රී ලංකා නිදහස් පක්ෂය පිරිසිදු දේශපාලන ව්‍යාපාරයක් ලෙස ශක්තිමත් කිරීමේ අවශ්‍යතාවය මෙහිදී අවධාරණය කළ ජනපති ශ්‍රී ලංකා නිදහස් පක්ෂය ශක්තිමත් නොකර රටට ආදරය කරන දේශපාලන ව්‍යාපාරයක් ගොඩනැගිය නොහැකි බව පෙන්වා දුනි.
වංචාව දූෂණය පිටුදැකීමට ගෙන යන වැඩපිළිවෙළ පිළිබදව ද මෙහිදී අදහස් දැක්වූ ජනාධිපති මෛත්‍රීපාල සිරිසේක බැදුම්කර කොමිසමේ වාර්තාව ලැබීමෙන් අනතුරුව ශ්‍රී ලංකා ගුවන් සේවය සහ මිහින් එයාර් ගුවන් සේවය පිළිබදව සොයා බැලීමට ද නව කොමිසමක් පත් කිරීමට කටයුතු කරන බව වැඩි දුරටත් කියා සිටියේය.
Facebook Comments
