පාස්කු ප්‍රහාර සම්බන්ධයෙන් හෙළි කර ගැනීම සඳහා පත් කරන ලද පාර්ලිමේන්තු තේරීම් කාරක සභාව අකර්මණ්‍ය කිරීමට ජනාධිපතිවරයා උත්සාහ දරමින් සිටින බවට ජනතා විමුක්ති පෙරමුණ චෝදනා කරයි.
ජනතාවට ඇත්ත දැන ගැනීම සඳහා පිහිටුවන ලද එම කාරක සභාවේ වැඩ කටයුතු අකර්මණ්‍ය කිරීමට මහින්ද රාජපක්‍ෂ කණ්ඩායමත් ජනපති හට සහාය දක්වන බවටයි ජවිපෙ ප්රධාන ලේකම් ටිල්වින් සිල්වා චෝදනා කරන්නේ.
“තමන්ගේ අඩුපාඩු හදා ගන්නවා වෙනුවට ජනාධිපතිවරයා 21 ප‍්‍රහාරය සම්බන්ධයෙන් ඇත්ත තොරතුරු ලබාගන්න ජනතාවට අවස්ථාව උදා කරපු පාර්ලිමේන්තුවේ තේරීම් කාරක සභාව අකර්මණ්‍ය කරන්න උත්සාහ කරනවා. මහින්ද රාජපක්‍ෂ කණ්ඩායමත් එයට උදව් කරමින් ඉන්නවා. අපි ජනාධිපතිවරයාගෙන් අහනවා, ජනතාවට ඇත්ත තොරතුරු ලබා ගැනීමට අයිතියක් නැද්ද කියලා.”
පාර්ලිමේන්තුවේ තේරීම් කාරක සභාවට අනුව අපේ රටේ ජනාධිපති මෛත්‍රීපාල සිරිසේන ජාතික ආරක්‍ෂාව සම්බන්ධයෙන්, මහජන ආරක්‍ෂාව සම්බන්ධයෙන් කිසිවක් සිදුකර නැති බව ඔප්පු වන බව ද ලේකම්වරයා 10 සඳුදා පැවති මාද්‍ය හමුවක දී පෙන්වා දුන්නේය.
“රටේ ජනාධිපතිවරයා ජාතික ආරක්‍ෂාව සම්බන්ධයෙන්, මහජන ආරක්‍ෂාව සම්බන්ධයෙන් කිසිවක් සිදුකර නැති බව ඔප්පු වෙනවා. ආරක්‍ෂක මණ්ඩලයට අගමැතිවරයා, රටේ ප්රධාන ආරක්‍ෂක නිලධාරිවරයා, පොලිස්පතිවරයා කැඳවලා නැහැ. තමන්ගේ පෞද්ගලික ආරවුල් පිරිමහ ගන්න රටේ ආරක්‍ෂාව බිලි දියයුතු නැහැ. ඒ වගේම රටේ අගමැතිවරයා ප‍්‍රමුඛ කැබිනට් මණ්ඩලයටත් මේ වගකීමෙන් මිදෙන්න බැහැ.”
ජනාධිපතිවරයා හා අගමැතිවරයා අතර පවතින විරසක හමුවේ පාස්කු ඉරිදා ප්‍රහාර වළක්වා ගැනීමට නොහැකි වු බවට චෝදනා කරන ජවිපෙ ප්රධාන ලේකම් ටිල්වින් සිල්වා එම ප‍්‍රහාරයෙන් පසුව රටේ උත්සන්න වුණු ජාතිවාදී ගැටුම් පාලනය කිරීමට ද ආණ්ඩුව අසමත් වු බව කියා සිටියේය.
Facebook Comments
