දෝෂ සහගත ලෙස කළමනාකරණය කෙරුනු ශ්‍රී ලංකාවේ එන්නත් කිරීමේ යාන්ත්‍රණය හේතුවෙන් කොරෝනා මාරයාට බිලි වු තරුණ දෙමළ මාධ්‍යවේදියකු වෙනුවෙන් නැගෙනහිරදී ගුණානුස්මරණයක් පවත්වා තිබේ.
අගෝස්තු 2 වැනි බ්‍රහස්පතින්දා ජීවිතයට සමුදුන් මාධ්‍යවේදී ප්‍රගාෂ් ඥාණප්‍රගාසම් වෙනුවෙන් අගෝස්තු 6 සදුදා ගුණානුස්මරණය පවත්වා තිබුනේ මඩකලපුව මාධ්‍ය සමාජය විසිනි.
ප්‍රගාෂ් ඥාණප්‍රගාසම්ගේ ඡායාරූපයකට මල් මලයක් පලදා මලින් පහනින් ඔහුට උපහාර දැක්වීමට ඔවුන් කටයුතු කර තිබුනි.
එම අවස්ථාවට මඩකලපුව මාධ්‍ය සමාජයේ සභාපති වී. ක්‍රිෂ්ණකුමාර්, භාණ්ඩාගාරික පුන්‍යමුර්ති සසිකරන් ද එක්ව සිටි බව පළාත් බද වාර්තාකරුවෝ පවසති.
කිලිනොච්චි මාධ්‍ය සංසදය ද පසුගියදා ප්‍රගාෂ් ඥාණප්‍රගාසම්ගේ ගුණ සමරා පුෂ්ප දීප උපහාරයක් පවත්වා තිබුනි.
යාපනයේ පදිංචි 26 හැවිරිදි තරුණයෙක් වු ප්‍රගාෂ් ඥාණප්‍රගාසම් කොඩිකාමම් නිවසට වී මාධ්‍යකරණයේ නිරත වී තිබුනේ තමන් පෙලන ශාරීරික අසනීප‍ය සිය වෘත්තියට බාධාවක් කරනොගනිමිනි.
තමන් පෙලන ශාරීරික අසනීප‍ය – මාංශ පේශි දුස්තර්පණය (muscular dystrophy) – නම් ව්‍යාධිය නිසා කිසි විටෙකත් කිසිවකුගෙනුත් අනුකම්පාව පතා නොසිටි ඔහු ඉතා උද්‍යෝගයෙන් හා ධෛර්යයෙන් යුතුව එම බාධකය ජය ගත්තේය.
රජය නිවේදනය කර තිබුනේ ඔවුන් මාධ්‍යවේදීන්ට එන්නත් සඳහා ප්‍රමුඛතාවක් ලබාදෙන බවයි. නමුත් මෙම තරුණ මාධ්‍යවේදියාට එම වරම හිමි වී තිබුනේ නැත.
අභාවයට දිනකට පෙර ප්‍රගාෂ් ඥාණප්‍රගාසම් ට්විටර් පණිවුඩයක් නිකුත් කරමින් සදහන් කර තිබුනේ “දින පහක උණ රෝගයෙන් පසු අද මට කොවිඩ් -19 පොසිටිව් බව තහවුරු වුණා. සාමාන්‍ය සෞඛ්‍ය තත්වය යහපත්. මම පේශි දුස්තර්පණය සහිත රෝගියෙක්. නමුත් මේ දක්වා මට එන්නත ලබා දුන්නේ නැහැ. ” යනුවෙනි.
එන්නත ලබා නොගත්තේදැයි විමසූ අයකුට පිළිතුරු දෙමින් එදිනම ඔහු තවත් ට්වීටර් පණිවිඩයක් නිකුත් කර තිබුනේ මෙලෙසිනි: “ඔව්, නමුත් ඔවුන් මාව මාංශ පේශි දුර්වල වීමේ රෝගියකු ලෙස පරීක්ෂා කළා, මගේ පියා සෞඛ්‍ය වෛද්‍ය නිලධාරී කාර්යාලයෙන් ඇහුවා. ඔවුන් මගේ වෛද්‍ය වාර්තා පරීක්ෂා කළ අතර එන්නත ලබා දිය නොහැකි බව පැවසුවා. ස්තුතියි.”
ශ්‍රී ලංකා වෛද්‍ය සභාවේ හිටපු සභාපති මහාචාර්ය හරේන්ද්‍ර ද සිල්වා සහ විශේෂඥ වෛද්‍ය සංගමයේ සභාපති දොස්තර ලක්කුමාර් ප්‍රනාන්දු උපුටා දක්වමින් මාධ්‍යවේදිනී සුලෝචනා රාමයියා මෝහන් ට්විටර් පණිවිඩයකින් දක්වා ඇත්තේ මාංශ පේශි දුර්වල පුද්ගලයකුට මෙම එන්නත ලබා ගත හැකි බවයි.
“මම වෛද්‍ය ලක්කුමාර් ප්‍රනාන්දුගෙන් විමසා බැලූ අතර ඔහු පැවසුවේ මාංශ පේශි දුර්වලතාවයෙන් පෙළෙන පුද්ගලයකුට එන්නත ලබා ගත හැකි බවයි.”
Facebook Comments
