අධිකරණ තීන්දුවලට, ව්‍යවස්ථාවට සහ ප්‍රජාතන්ත්‍රවාදයට ගරු නොකරණ, දේශපාලන සදාචාරයක් නොමැති පාලකයන් ඉන්නා රටක අධිකරණ තීන්දු පවත්නා දේශපාලන අර්බුදයට විසඳුම් සෙවිය නොහැකි බවට ජනතා විමුක්ති පෙරමුණ පවසයි.
මෛත්‍රීපාල සිරිසේන ජනාධිපතිවරයා දියත් කළ කුමන්ත්‍රණය අධිකරණය මගින් ලබා දෙනු ලබන තීන්දුවලින් පමණක් අවසන් නොවන බවයි එම පෙරමුණේ ජාතික සංවිධායක, පාර්ලිමේන්තු මන්ත්‍රී බිමල් රත්නායක පෙන්වා දෙන්නේ.
“අධිකරණය දෙන තීන්දුවෙන් කුමක් වුනත් සිද්ධ වෙන්නෙ විසුරුවාලීම හරි කියල කිව්වොත් මැතිවරණයකට යන එක, එහෙම නොවුනොත් පාර්ලිමේන්තුව තිබු පරිදි තියෙනවා. එතකොට ජනාධිපතිවරයා විසින් නීති විරෝධීව පාර්ලිමේනතුවට මැදිහත් වෙච්ච එක, තිබුණ ආණ්ඩුව වෙනස් කරල බහුතරයක් නැති පාලනයක් ආරම්භ කරපු එක, බහුතරයක් තමන්ට නැති නිසා පාර්ලිමේන්තුව කැඳවන්න දෙන්නෙ නැතිව කරගෙන යන සියලුම ප්‍රචණ්ඩ සදාචාර විරෝධී කටයුතු මේ එකක්වත් නතර වෙන්නේ නැහැ.”
රටක් පාලනය කළ යුත්තේ ව්‍යවස්ථාවට අනුකූලව බවත් මේ වනවටි මතුව ඇති දේශපාලන අර්බුදයේ ආරම්භකයා විධායක ජනාධිපතිවරයා බවයි මන්ත්‍රීවරයා කියා සිටියේ.
පාර්ලිමේන්තුව, ව්‍යවස්ථාව, අධිකරණය නොතකා කටයුතු කිරිමට ජනාධිපතිවරයාගේ විධායක බලය උපයෝගී වන බැවින් විධායක ජනාධිපති ධුරය අහෝසි කිරීම අනිවාර්යයෙන්ම සිදු කළ යුතු බව යළි යළිත් තහවුරු වන බව ජනතා විමුක්ති පෙරමුණේ ජාතික සංවිධායක, පාර්ලිමේන්තු මන්ත්‍රී බිමල් රත්නායක වැඩි දුරටත් සඳහන් කළේය.
Facebook Comments
