රාජ්‍ය සේවයෙන් ආණ්ඩුවට අනතුරු ඇඟවීමක්

0

නිදහස් ශ්‍රී ලංකාවේ හැත්තෑ හය වැනි අයවැය යෝජනාව මගින් රාජ්‍ය සේවකයන්ගේ වැටුප් වැඩි නොකිරීම සම්බන්ධයෙන් විරෝධය මතු වී තිබේ.

ජනාධිපති ගෝඨාභය රාජපක්ෂ වෙත ලිපියක් යොමු කරමින් ශ්‍රී ලංකා රාජ්‍ය නිලධාරී වෘත්තීය සමිති සම්මේලනය අනතුරු අගවා ඇත්තේ සති දෙකක් ඇතුලත රාජ්‍ය සේවකයන්ට දීමනා ලබා දීමට කටයුතු නොකළහොත් නොදන්වාම වෘත්තීය ක්‍රියාමාර්ගවලට යොමු වන බවයි.

ශ්‍රී ලංකා රාජ්‍ය නිලධාරී වෘත්තීය සමිති සම්මේලනයේ ජාතික සංවිධායක බී.ඒ.පී බස්නායකගේ අත්සනින් යුතුව යොමු කර තිබෙන ලිපිය මගින් ඉල්ලා ඇත්තේ අය වැය යෝජනාව හරහා රාජ්‍ය සේවකයන් වෙනුවෙන් රුපියල් දහ අට දහසක වැටුප් වැඩිවීමකි.

නොවැම්බර් 12 වැනිදා මුදල් ඇමැති බැසිල් රෝහණ රාජපක්ෂ විසින් 2022 වර්ෂය සදහා වන අය වැය යෝජනාව පාර්ලිමේන්තුවට ඉදිරිපත් කිරීමට පැයකට කලින් පාර්ලිමේන්තු වට රවුම අසල විරෝධතා පැවැත්වු වෘත්තීය සමිති නායකයන්ද බල කර තිබුනේ පෞද්ගලික අංශයට රුපියල් දස දහසක වැටුප් වැඩිවීමක් ලබා දෙන ලෙසයි.

2022 අයවැය යෝජනාවලිය සමස්ත රාජ්‍ය සේවයම අමතක කර රාජ්‍ය සේවකයන් සාමාන්‍ය ජනතාව මෙන්ම කබලෙන් ලිපට ඇද දැමීමක් සිදු වී ඇති බව පවසන බී.ඒ.පී බස්නායක අවධාරණය කරන්නේ භාණ්ඩ මිල ඉහල යාමට ප්‍රථමව පැවැති ජීවන වියදමට සාපේක්ෂව ලැබුනු වැටුපද සෑහීමකට පත්විය නොහැකි මට්ටමක පැවැති බවයි.

” එහිදී රාජ්‍ය අංශයේ සංගණන අනුව හතර දෙනෙක්ගෙන් යුත් පවුලකට මසකට සාමාන්‍යයෙන් රුපියල් 58000/ ක වියදමක් යන බව සදහන් කර තිබුණි.”

ශ්‍රී ලංකා රාජ්‍ය නිලධාරී වෘත්තීය සමිති සම්මේලනයේ ජාතික සංවිධායක බී.ඒ.පී බස්නායක තවදුරටත් ජනාධිපතිවරයාට දැනුම් දී ඇත්තේ වර්තමානයේ මේ සියල්ල පරදවා නැවත වතාවක් සියළුම අත්‍යවශ්‍ය භාණ්ඩ වල මිල දැරිය නොහැකි තරම් ඉතා ඉහළ මට්ටමකට රජය විසින් වැඩි කර ඇති බවයි.

එවැනි තත්වයක් තුළ මසකට වරක් වැටුප් ලබන රාජ්‍ය සේවකයන් 2022 අයවැයෙන් වැටුප් හෝ දීමනා වැඩි වීමක් අපේක්ෂා කළද අයවැයෙන් රාජ්‍ය සේවකයන් කබලෙන් ලිපට ඇද දැමීමක් සිදු කර ඇති බවට බී.ඒ.පී බස්නායක චෝදනා කරයි.

මේ තත්වය යටතේ ඔහු ඉල්ලා සිටින්නේ රුපියල් 18000 ක වැටුප් වැඩිවීමකි.

“ශ්‍රී ලංකා රාජ්‍ය නිලධාරී වෘත්තීය සමිති සම්මේලනය ලෙස සමස්ත රාජ්‍ය සේවයටම සරිලන ආකාරයට අවම රුපියල් 18000/ ක වැටුප් හෝ දීමනා අපේක්ෂා කරනු ලබන අතර එසේ නොමැති නම් ඉදිරියේදී සමස්ත රාජ්‍ය සේවයම මේ ගැටළුව සම්බන්ධයෙන් ක්‍රියාමාර්ග වෙත යොමු වන බව කණගාටුවෙන් වුවත් දැනුම් දෙමු ” ජනාධිපතිට යොමු කළ ලිපියේ වැඩි දුරටත් සදහන්ය.

අය වැය යෝජනාව ඉදිරිපත් කිරීමෙන් පසු පැවැති මාධ්‍ය හමුවකදී මුදල් අමාත්‍ය බැසිල් රාජපක්ෂ කියා තිබුනේ රටට උසුලන්න බැරි තරම් රාජ්‍ය සේවය පුළුල් වී ඇති බැවින් තවදුරටත් රාජ්‍ය සේවයට ලොසින්ජර ලබාදීම සිදුකල නොහැකි බවයි.

Facebook Comments

wedding people