නව ව්‍යවස්ථාවක් රැගෙනවිත් රට බෙදීමෙන් රජය කටයුතු කරන බවට ඇතැම් දේශපාලනඥයින් බෞද්ධ භික්ෂුන් හමුවී අසත්‍ය පතුරවන බවට අගමැතිවරයා චෝදනා කර තිබේ.
ජාතිවාදය වපුරමින්, බොරු ව්‍යවස්ථා බිල්ලෙකු මවාපාමින් රට ගිනි නොතබන ලෙස අදාළ පාර්ශ්ව වලින් අගමැති රනිල් වික්‍රමසිංහ ඉල්ලා සිටියේ අරලියගහ මන්දිරයේ පැවැති ජාතික තෛයිපොංගල් උත්සවයට එක්වෙමිනි.
මෙම ජාතිවාද ව්‍යාපාරයේ අරමුණ සිංහල ජනතාව මුලා කිරීම බවයි අගමැතිවරයා පෙන්වා දෙන්නේ.
“අද මේ රටේ සියළු ජන කොටස් එකමුතුව එකට වැඩකරන පරිසරයක් නිර්මාණය වී තිබෙනවා. මෙලෙස රටේ ජනතාවත් එකතුවන අවස්ථාවේදී ජාතිවාදී ව්‍යාපාරයක් රටේ දියත් වෙමින් තිබෙනවා. අළුත් ව්‍යවස්ථාවක් ගෙනවිත් රට බෙදන්න යන බවට අසත්‍ය ප්‍රචාරයක් ගෙන යමින් සිංහල ජනතාව මුලා කිරීමට උත්සාහ ගන්නවා.”
“කිසිදු ආණ්ඩුක්‍රම ව්‍යවස්ථාවක් මේ වනතෙක් අප සකස් කර හෝ ඉදිරිපත් කර නැහැ. මේ සඳහා පත්කර තිබෙන මෙහෙයුම් කමිටුවේ සියළු පක්ෂවල නියෝජිතයෝ සිටිනවා. අපේ යුතුකම හා වගකීම වන්නේ අපට ලැබෙන වාර්තා සියල්ලම ව්‍යවස්ථාදායක සභාවට හා පාර්ලිමේන්තුවට ඉදිරිපත් කිරීමයි. ඒ අනුව අවසන් වාර්තා හයක් අප ඉදිරිපත් කළා. එතැනින් ඉදිරියට යනවද නැද්ද කියා පාර්ලිමේන්තුව හා ව්‍යවස්ථාදායක සභාව තීරණය කළ යුතුයි.”
ආණ්ඩුක්‍රම ව්‍යවස්ථාව සම්බන්ධව කෙටුම්පතක් සකස් කළොත් එයට පාර්ලිමේන්තුවේ 2/3 අනුමැතිය ලැබිය යුතු බව කී අගමැති රනිල් වික්‍රමසිංහ පවතින දේශපාලන වාතාවරණය යටතේ ඒ සම්බන්ධව අවසන් තීරණය ගත යුත්තේ පාර්ලිමේන්තුව හා ව්‍යවස්ථාදායක සභාව බව ප්‍රකාශ කළේය.
Facebook Comments
