ලංකාවේ ආර්ථිකය නංවන්න IMF සහාය දෙන්න සුදානම්

0

ශ්‍රී ලංකාවේ ආර්ථිකය නංවාලීමට සහාය වීමට තමන් සූදානම් බව ජාත්‍යන්තර මුල්‍ය අරමුදල ශ්‍රී ලංකාවේ මුදල් ඇමැතිවරයා හට දැනුම් දී තිබේ.

එම කටයුතු සඳහා ජාත්‍යන්තර මූල්‍ය අරමුදලේ නියෝජිතයින් පිරිසක් පෙබරවාරි මස මැදදි ශ්‍රී ලංකාවට පැමිණෙන බව මුදල් අමාත්‍ය මංගල සමරවීර වෙත දන්වා ඇත.

මුදල් හා ජනමාධ්‍ය ඇමැති මංගල සමරවීර ප්‍රමුඛ ශ්‍රී ලංකා රජයේ නියෝජිතයෝ ඇමෙරිකාවේ වොෂින්ටන් නුවර පිහිටි ජාත්‍යන්තර මුල්‍ය අරමුදලේ ප්‍රධාන කාර්යාලයේ දී හමු වූ අවස්ථාවේ අරමුදලේ කළමනාකරණ අධ්‍යක්ෂිකා ක්‍රිස්ටීන් ලාගාර්ඩි මේ බව සඳහන් කර තිබේ.

“අපි ශ්‍රී ලංකාවේ ආර්ථික පරිසරයේ අභියෝග මෙන්ම ප්‍රතිපත්ති ප්‍රමුඛතා පිළිබඳව සාකච්ඡා කළා. ජාත්‍යන්තර මූල්‍ය අරමුදලේ සහාය ඇතිව ක්‍රියාත්මක කරන ආර්ථික ප්‍රතිසංස්කරණ ක්‍රියාවලිය තවදුරටත් කරගෙන යෑමට ඔවුන්ගේ කැමැත්ත ප්‍රකාශ කළා.” යි ක්‍රිස්ටීන් ලාගාර්ඩි පැවසුවාය.

ඉකුත් වසරේ ඔක්තෝම්බර් මස 26 වැනිදා සිදු වූ දේශපාලන අස්ථාවරත්වය නිසා මෙරටට ලබාදීමට නියමිතව තිබූ ණය වාරිකය පිළිබඳව විධායක මට්ටමේ කථිකාව ප්‍රමාද වු අතර යළිත් එම ණය මුදල මෙරටට ලබා ගැනීම මුදල් හා ජනමාධ්‍ය ඇමැති මංගල සමරවීර ප්‍රමුඛ රජයේ නියෝජිතයින්ගේ අරමුණ විය.

ජාත්‍යන්තර මුල්‍ය අරමුදලේ ප්‍රධානීන් සමඟ පැවැති සාකච්ඡාවට ශ්‍රී ලංකාව නියෝජනය කරමින් පොදු සැපැයීම් හා ආර්ථික ප්‍රතිසංස්කරණ කැබිනට් නොවන ඇමැති ආචාර්ය හර්ෂ ද සිල්වා, මුදල් හා ජනමාධ්‍ය අමාත්‍යංශයේ ලේකම් ආචාර්ය ආර්.එච්.එස්.සමරතුංග, මහ බැංකුවේ අධිපති ආචාර්ය ඉන්ද්‍රජිත් කුමාරස්වාමි, මහ බැංකුවේ ජ්‍යෙෂ්ඨ නි‍යෝජ්‍ය අධිපති ආචාර්ය නන්දලාල් වීරසිංහ, මුදල් ඇමැතිවරයාගේ ආර්ථික උපදේශක ඩේසිල් ද මැල්, ශ්‍රී ලංකාවේ ජාත්‍යන්තර මුල්‍ය අරමුදලේ විධායක අධ්‍යක්ෂ මහින්ද සිරිවර්ධන යන පිරිස සහභාගි වී සිටියහ.

Facebook Comments

wedding people