ආයුධ සන්නද්ධව දේශපාලනයේ නිරත වීම නිසාවෙන් සිරගත කරන සිටින පනහකට වැඩි පිරිසක් නිදහස ඉල්ලා බන්ධනාගාර තුල උපවාසයක යෙදී සිටින අවස්ථාවක ඔවුන්දේශපාලන සිරකරුවන් ලෙස පිළිගැනීම අධිකරණ අමාත්‍යවරිය විසින් ප්‍රතික්ෂේප කර තිබේ.
“මේ රටේ දේශපාලන සිරකරුවන් කොහේද දේශපාලන සිරකරුවෝ ඉන්නේ? කවුද එහෙම දේශපාලන සිරකරුවන් ඉන්නවැයි කියන්නේ?” යි ඇය මාධ්‍යවේදීන් ගෙන් පෙරලා ප්‍රශ්න කර ඇත්තේ බන්ධනාගාර තුල උද්ඝෝෂණ වල නිරත රැඳවියන් සම්බන්ධයෙන් කළ විමසීමකදීය.
උපවාසික පිරිස සිරකොට තබා ඇත්තේ මර්දනකාරී නීතියක් ලෙසින් දේශීය හා ජාත්‍යන්තර වශයෙන් දැඩි ලෙස හෙලා දැකීම නිසා අහෝසි කිරීමට නියමිතව තිබෙන ත්‍රස්තවාදය වැළක්වීමේ උපයෝගී කරගෙන බව අධිකරණ හා බන්ධනාගාර ප්‍රතිසංස්කරණ ඇමැතිනි තලතා අතුකෝරළ මහනුවර අධිකරණයේ නීතිඥ සංගමය සමග මහනුවරදී පැවති සාකච්ඡාවකින් අනතුරුව මාධ්‍යවේදීන් කල ප්‍රශ්න කිරිමේදී පිළිගනු ලැබීය.
“දේශපාලන සිරකරුවෝ නෑ. උද්ඝෝෂණය කරලා තියෙනවා. ත්‍රස්තවාදය වැළැක්වීමේ පනත යටතේ ගන්න සැකකරුවන් 2009 ඉදලා ඉන්න පිරිසක් ඉන්නවා,” යි අමත්‍යවරිය කියා සිටියාය.
ශ්‍රී ලංකාවේ දේශපාලන සිරකරුවන් ඉන්නා බව පිළිගැනීම ඔවුන්ගේ නිදහස වෙනුවෙන් සපුරාලිය යුතු අත්‍යාවශ්‍ය පියවරක් බව දේශපාලන සිරකරුවන් නිදහස් කරගැනීම සඳහා වන ජාතික ව්‍යාපාරයේ කැඳවුම්කරු මාරිමුත්තු සතිවේල් පියතුමා පසුගිය ද දේශපාලන සිරකරුවන්ගේ නිදහස පතා පැවති විරෝධතාවයක දී කියා තිබුණි.
දේශීය මෙන්ම ජාත්‍යන්තර මානව හිමිකම් සංවිධානද අවධාරණය කරන්නේ දේශපාලනයක යෙදීම හේතුකොටගෙන සිරගත කර ඇති දෙමළ සිරකරුවන් සම්බන්ධයෙන් ගත යුත්තේ දේශපාලන ස්ථාවරයක් විනා නීතිමය තීන්දුවක් නොවන බවයි.
Facebook Comments
