මන්ත්‍රීවරුන් පිරිසක් තමන්ගේ පැත්තට ගෙන මැතිවරණයකින් තොරව ආණ්ඩු බලය ලබා ගත හැකි යැයි හිටපු ජනාධිපති මහින්ද රාජපක්ෂ රත්නපුරයේ දී කර ඇති ප්‍රකාශය පාර්ලිමේන්තුව නියෝජනය කරන මන්ත්‍රීවරුන් 225 දෙනාට ම සිදුකළ බලවත් අපහාසයක් බව නව සම සමාජ පක්ෂයේ නායකයා පවසයි.
නව සම සමාජ පක්ෂයේ නායක ආචාර්ය වික්‍රමබාහු කරුණාරත්න මේ බව පැවසුවේ පවතින දේශපාලන තත්ත්වය පිළිබඳ ජනතාව දැනුවත් කිරීම සඳහා වමේ පක්ෂ සහ වෘත්තීය සමිති එක්ව රාජගිරිය සම සමාජ පියස කාර්යාලයේ ඊයේ (11) පැවැත් වූ මාධ්‍ය හමුවේ දී ය.
හිටපු ජනාධිපතිවරයාගේ මේ ප්‍රකාශය ප්‍රජාතන්ත්‍ර විරෝධී ෆැසිස්ට්වාදී ප්‍රකාශයක් බවත් මන්ත්‍රීවරුන් පිරිසක් තමන්ගේ පැත්තට ගන්නවා යන්නෙන් අදහස් වන්නේ ඔවුන් මුදලට ගැනීමක් විය හැකි බව යි ආචාර්ය වික්‍රමබාහු පෙන්වා දෙන්නේ.
‘යම් ආකාරයක කුමන්ත්‍රණයක් මඟින් පාර්ලිමේන්තු බලය අතට ගන්නවා කියන එකයි මේ කියන්නේ. බලය අල්ලා ගෙන නැපෝලියන් බොනපාට් කළා වගේ පසුව පාර්ලිමේන්තුව වසා දමන්න හදනවාද දන්නේ නැහැ’ යැයි ද නව සම සමාජ පක්ෂයේ නායකයා පවසනවා.
‘ආණ්ඩුක්‍රම ව්‍යවස්ථාව වෙනස් කිරීම අවශ්‍ය නැහැ. තිබෙන ව්‍යවස්ථාව සංශෝධනය කර පවත්වා ගෙන යාම ප්‍රමාණවත් යැයි මහින්ද රාජපක්ෂ කියා තිබෙනවා. එසේ පවතින ආණ්ඩුක්‍රම ව්‍යවස්ථාව පැච් දමා මාට්ටු කර ඉදිරියට ගෙන යාම වෙනුවට අලුත් ව්‍යවස්ථාවක් සම්පාදනය කිරීමට ඉඩ දීමයි කළ යුත්තේ. ව්‍යවස්ථා සම්පාදක කොමිටි හදා, යෝජනා ඉදිරිපත් කර තිබෙනවා. ව්‍යවස්ථාවේ ඒකාධිපති ස්වභාවය නැති කර බලය බෙදා, රට එක්සත් කළ යුතුයි. එමෙන්ම සමාජ ආර්ථික සාධාරණත්වය තහවුරු කෙරෙන මූලික අයිතිවාසිකම් ව්‍යවස්ථාවට ඇතුළත් කළ යුතුයි.
අලුතින් හදන ව්‍යවස්ථාවෙන් රට බෙදන්න හදනවා. මේක ෆෙඩරල් ව්‍යවස්ථාවක්. දෙමළුන්ට රට දෙන්න යනවා, ඊළාම් රාජ්‍යයකට මඟ පාදනවා කියා ඒකාබද්ධ විපක්ෂය බොරු මුසාවාද දොඩවනවා යැයි ද ඔහු අවධාරණය කර සිටියේය.
අ‍පේ රටට ආර්ථික අමාරුකම් තිබෙන නිසා ජාත්‍යන්තර මූල්‍ය අරමුදලෙන් ණය ගෙන තිබෙනවා. මේ ණය අඩු පොළී සහන ණය බව පැවසුවත් මූල්‍ය අරමුදලේ නියෝජිතයෝ මෙහෙ ඇවිත් අපට බල කරනවා වැට් බද්ද අය කර සල්ලි පොදි ගහලා පෙන්වන්න කියලා. අපි කියන්නේ වැට් බද්ද නොවෙයි ප්‍රාග්ධන බද්ද සහ සෘජු බදු එකතු කිරීම විධිමත් කළ යුතු බවයි. හොරු අල්ලා දඬුවම් කරන්න කියලයි. මූල්‍ය අරමුදල මේවා කියන්නේ නැහැ. ඔවුන් කියන්නේ වැට් එක තද කරන්න එසේ නැතිනම් ඩොලර් බිලියන 1.5ක ණය මුදල දෙන්නේ නැහැ කියලයි.
දැන් මේ රටේ අධිකරණය ස්වාධීන කර තිබෙනවා. අධිකරණ සේවා කොමිෂන් සභාව පිහිටුවා එය ස්වාධීන කළා. සමහරු දැන් කියන්න අරන් අධිකරණයේ හොරු ඉන්නවා කියලා. මේ කියන්නේ නැවතත් මහින්ද රාජපක්ෂ යුගයට යන්න කියන එකද? ස්වාධීන කර තිබෙන ආයතවල ස්වාධීනතාව නැති කිරීමට දරන උත්සාහයට අපි විරුද්ධයි’ යනුවෙන් ද ආචාර්ය වික්‍රමබාහු කරුණාරත්න පැවසීය.
ලංකා වෘත්තීය සමිති සම්මේලනයේ ප්‍රධාන ලේකම් ඩී. ඩබ්ලිව්. සුබසිංහ, ලංකා සම සමාජ පක්ෂයේ බහුතර කණ්ඩායමේ මහින්ද රත්නායක, ආණ්ඩුවේ කම්කරු සමිති සම්මේලනයේ සභාපති ඩී. එම්. ඩී. අබේරත්න, නව සම සමාජ පක්ෂයේ දේශපාලන මණ්ඩල සභික වී. තිරුවනාකරසු යන අයද මෙහිදී අදහස් දැක්වූහ.
Facebook Comments
