යුද්ධයෙන් මියගිය තම සමීපතමයන් අනුස්මරණය කරමින් උතුරේ දෙමළ ජනතාව සමරු දිනයක් පැවැත්වීම සිංහල මාධ්‍යවේදීන් ඇතුළු කණ්ඩායම් හෙලා දැකීම උතුරු මහ ඇමැතිවරයාගේ දෝෂ දර්ශණයට ලක්ව තිබේ.
සත්‍යය හෙළි කර ගැනීමේ වෙහෙසක් දරන්නේ නැතිව දෙමළ ජනතාව විසින් සමරනු ලබන්නේ ත්‍රස්තවාදීන් බවට කරනු ලබන එම චෝදනා වැරදි දෙයක් බවයි ලෙස සී වී විග්නේස්වරන් පෙන්වා දෙන්නේ.
පසුගිය දා කොළඹ පැවති කැබිනට් තීරණ දැනුම් දෙන මාධ්‍ය හමුවේදී මැයි 18 දා උතුරේ සමරනු ලබන්නේ ත්‍රස්තවාදී සංවිධානයක සාමාජිකයන් බව පවසමින් සිංහල මාධ්‍ය වේදීන් පිරිසක් සිය විරෝධය දක්වනු ලැබීය.
“කිසිම දෙයක් කරන්නේ නැතිව, ඒගොල්ලෝ ඔක්කොම කොටියෝ, නැතිනම් ඒ ගොල්ලෝ ඔක්කොම ත්‍රස්තවාදියෝ කියාගෙන ඉන්න එක බොහොම වැරදියි කියලයි මං හිතන්නේ,” යි මහ ඇමැති විග්නේස්වරන් පවසයි.
මහ ඇමැති විග්නේස්වරන් ප්‍රමුඛ උතුරු පළාත් සභාව, යුද පීඩිත ජනතා සංවිධාන, සිවිල් සමාජ ආයතන සහ සරසවි ශිෂ්‍ය සංවිධාන ඇතුළු බහුජන සංවිධාන ගණනාවක් එක්ව 2018 මුල්ලිවයික්කාල් සමරුව මෙවරත් සංවිධානය කර තිබේ.
යුද්ධයෙන් මළ නිරායුධ ජනතාව සහ හමුදාවට භාරවී අතුරුදහන් වුවන් සම්බන්ධයෙන් නීතිමය පියවර ගැනීම පීඩාවට පත් දෙමළ සැමගේම ඉල්ලීම බව උතුරේ මහ ඇමැති සී වී විග්නේස්වරන් වැඩිදුරටත් කියා සිටියේය.
Facebook Comments
