රජයේ වෛද්‍ය නිලධාරින්ගේ සංගමයේ ප්‍රධානියා අලුත් ආණ්ඩුවේ සෞඛ්‍ය ලේකම් ධුරයට පත් කිරීමට තමන් හරස් වු බව රාජපක්ෂ පිලේ නාහිමි නමක් පවසා තිබේ.
රටට හා සෞඛ්‍ය අමාත්‍යංශයට ඇති ආදරය නිසාවෙන් වෛද්‍ය අනුරුද්ධ පාදෙණිය සෞඛ්‍ය අමාත්‍යාංශයේ ලේකම් ධුරයට පත් නොකරන ලෙස ජනාධිපති ගෝඨාභය රාජපක්ෂගෙන් ඉල්ලා සිටි බව හෙද සංගමයේ සභාපති මුරුත්තෙට්ටුවේ ආනන්ද හිමියෝ මාධ්‍ය වෙත කියා සිටියේය.
“ගෝඨාභය රාජපක්ෂ මැතිතුමාගේ රජයේ සෞඛ්‍ය ලේකම් ධුරය වෛද්‍ය සංගමයේ සභාපති පාදෙනිය මැතිතුමාට පිරිනමන්න යනවා කියලා අපිට ආරංචි වුනා. ඒ ආරංචි වුන මොහොතේ සෞඛ්‍ය දෙපාර්තුමේන්තුවේ තියෙනවා වෘත්ති සමිති 70ක් විතර මේකෙන් බහුතර පිරිසක් ඒ වගේ මා නියෝජනය කරන හෙද සංවිධානයේ විශාල ශාඛා රාශියක් සෞඛ්‍ය අමාත්‍යාංශයේ ලේකම් ධුරයට පාදෙනියා මහත්තයා පත් කරන්න අපි සම්පුර්ණ විරුද්ධයි හාමුදුරුවනේ වහාම පියවරක් ගන්නයි මගෙන් ඉල්ලීමක් කළා.”
එම නිසා වෛද්‍ය සංගමය තමන් හා හතුරු වී සිටින බව වදාරණ මුරුත්තෙට්ටුවේ ආනන්ද හිමි රෝගතුරව සිටින හිටපු සෞඛ්‍ය අමාත්‍ය රාජිත සේනාරත්නගේ සුව දුක් විමසීමට යාම පිළිබඳව තමන් වෙත මඩ ප්‍රහාර එල්ල කරන බවට 31 අඟහරුවාදා මාධ්‍ය හමුවක් කැඳවමින් චෝදනා කළේය.
ඕනෑම පුද්ගලයෙකුට චෝදනාවක් ඇත්නම් ඒවා නිසි ලෙස විභාග කර නීතිය ක්‍රියාත්මක කරන ලෙසත් එසේ නැතිව පෙර පැවති ආණ්ඩුව මෙන් මේ ආණ්ඩුවද පාණ්ඩුවක් කර නොගන්නා ලෙස එහිමියන් වැඩි දුරටත් අනුශාසනා කර තිබේ.
Facebook Comments
