උතුරු නැඟෙනහිර ජනතාවට යුක්තිය ඉටු කිරීම සම්බන්ධයෙන් ජනාධිපතිවරයාද සහභාගී වූ පාර්ලිමේන්තුව තවමත් වාද විවාද කරද්දී, යුද පීඩිත වන්නියෙන් මතුවූ අලුත්ම සමූහ මිනීවලේ විමර්ශන කටයුතු සඳහා ජාත්‍යන්තර විශේෂඥයන් හවුල්කරගන්නා ලෙස බලකරමින් නැගෙනහිර පළාතේ විරෝධතාවයක් දියත් කර තිබේ.
කොක්කුතොඩුවායි සමූහ මිනිස් සුසානයට සාධාරණයක් ඉටු කිරීම සදහා එහි කැනීමේ කටයුතු වලට ජාත්‍යන්තර විශේෂඥ දැනුම සහ අධීක්‍ෂණය අත්‍යවශ්‍ය බවට ඉල්ලා අම්පාරේ දියත් කළ උද්ඝෝෂණයට උතුරු සහ නැගෙනහිර දෙපළාතේ බලහත්කාරයෙන් අතුරුදහන් කරනු ලැබුවන්ගේ ඥාතීන් එක්ව සිටි බවයි පළාත් බද වාර්තාකරුවන් පවසන්නේ.
බලහත්කාරයෙන් අතුරුදහන් කළ සිය සමීපතමයන්ට යුක්තිය ඉල්ලා අම්පාරේ දියත් කෙරෙන අඛණ්ඩ විරෝධතාවයට දින 2000 ක් සපිරුනු අගෝස්තු 9 වැනිදා තම්බිලුවිල් විෂ්ණු කෝවිල ඉදිරියෙන් පටන් ගත් විරෝධතා පා ගමන අක්කරෙයිපත්තු පොතුවිල් ප්‍රධන මාර්ගය ඔස්සේ අම්පාර තිරුක්කෝවිල් ඔරලෝසු කනුව දක්වා පැමිණ එහිදී උද්ඝෝෂණයක් දියත් කිරීමට ඔවුන් කටයුතු කර තිබේ.
“අපේ හැගීම් සහ වේදනාවන් සමග සෙල්ලම් කරන්න එපා, යුක්තිය වෙනුවෙන් සටන් කරන අපේ නිදහසට බාධා කරන්න එපා, අපේ ඥාතීන්ව අතුරුදහන්කරවපු සහ අපේ කදුලට හේතු වු අය අපි ගිනි තියනවා , අපේ ඥාතීන් ඝාතනය කරපු අය අපි ගිනි තියනවා,” ආදී වැකි කියවා එම වැකි සටහන් කළ කඩදාසි පුළුස්සා යුක්තිය අහිමි වීම සංකේතවත් කළ ආකාරය පළාත් බද මාධ්‍යවේදින් වීඩියෝ ගත කර ඇත.
වසර ගණනාවක් තිස්සේ බලහත්කාරයෙන් අතුරුදහන් කර සිටින සිය සමීපතමයන් වෙනුවෙන් යුක්තිය ඉටු කිරීම සදහා ජාත්‍යන්තර විමර්ශනයක අවශ්‍යතාවය යළි යළිත් ඉල්ලා සිටින යුද වින්දිත මව්වරුන් අවධාරණය කරන්නේ කොක්කුතොඩුවායි සහ මන්නාරම සමූහ මිනිස් සුසානයේ කැනීමේ කටයුතු වලට ජාත්‍යන්තර විශේෂඥ දැනුම සහ අධීක්‍ෂණය අත්‍යවශ්‍ය බවයි.
රජය කුමන ආකාරයේ තර්ජන කළත් සිය ලේ ඥාතීන්ට යුක්තිය ඉටු කරගැනිම වෙනුවෙන් සිදු කරන අරගලය අත් නොහරින බව මුලතිව් දිස්ත්‍රික්කයේ බලහත්කාරයෙන් අතුරුදහන් කළ අයගේ ඥාතීන්ගේ සංගමයේ සභාපතිනි මරියසුරේෂ් ඊශ්වරී මාතාව එහිදී අවධාරණය කළාය.
“ගොඩක් තර්ජන මැදින් තමයි අදත් මේ අරගලය කරමින් ඉන්නේ. ආණ්ඩුව අපිට නොයෙක් ආකාරයෙන් තර්ජනය කරනවා. අපිව පසු බස්සන්න බෑ. ඔවුන් අපේ ඥාතීන් හරහා බලපෑම් කරන්න උත්සාහ කළා. එවැනි තත්වයක් තුළ අපිට සාධාරණයක් ඉටු වෙනකං කවුරු ලවා ගැහුවත්, තර්ජනය කළත්, අපි ගැන ප්‍රචාර ගෙන ගියත් අපි අපේ අරගලය දිගටම කරනවා.”
මීට මාසයකට ඉහතදී සොයාගත් කොක්කුතුඩුවායි සමූහ සුසානයේ තවමත් ආරම්භ කර නොමැති කැණීම් කටයුතු සඳහා ජනාධිපති ලේකම් කාර්යාලය විසින් මුදල් ලබාදෙන බවට අතුරුදහන් තැනැත්තන් පිළිබඳ කාර්යාලය (OMP) අගෝස්තු 8 වැනිදා මුලතිව් විනිසුරුවරයාට දන්වා තිබුනි.
අගෝස්තු 21 වැනිදාට කැණීම් ආරම්භ කිරීම පිළිබඳව අගෝස්තු 17 වැනිදා තීන්දුවක් ගැනීමට අගෝස්තු 10 වැනිදා මුලතිව් අධිකරණය තිරණය කළ බව නීතිඥ වී එස් නිරංජන් මුලතිව්හිදී මාධ්‍යවේදීන්ට ප්‍රකාශ කළේය.
යුද්ධාවසානයේ රජයේ හමුදාවට භාරවීමෙන්ද, පැහැරගනු ලැබීමෙන්ද අනතුරුව අතුරුදහන් කරන ලද සමීපතමයන්ගේ ඉරණම හෙළි කරගැනීම සඳහා දෙමළ ජනතාව ඉකුත් පහළොස් වසරකට ආසන්න කාලයක් තිස්සේ ඉල්ලා සිටින්නේ ජාත්‍යන්තර මැදිහත්වීමකි.
ආණ්ඩුක්‍රම ව්‍යවස්ථාවේ 13 වැනි සංශෝධනය සහ බලය බෙදීම පිළිබඳ සිය යෝජනා සහ ඉදිරි ක්‍රියාමාර්ග සම්බන්ධයෙන් අගෝස්තු 9 වැනිදා ජනාධිපති රනිල් වික්‍රමසිංහ පාර්ලිමේන්තුවවේ සිදු කල විශේෂ ප්‍රකාශයේදී ඔහු සදහන් කර තිබුනේ උතුරු නැඟෙනහිර ජනතාවට යුක්තිය ඉටු කිරීමේ අවශ්‍යතාව තමන් යළිත් අවධාරණය කරන බවයි.
අතුරුදහන් වූවන් පිළිබඳ කාර්යාලය වෙත ලැබී ඇති පැමිණිලි 21,374 න් 3,462 ක විමර්ශන මේ වන විට අවසන් කර ඇති අතර ඉතිරි පැමිණිලි සඳහා විමර්ශන ප්‍රගතියක් ලබන අතර, සත්‍ය සෙවීමේ යාන්ත්‍රණය සම්පූර්ණයෙන් ක්‍රියාත්මක වීමෙන් පසු මෙම ක්‍රියාවලිය වේගවත් විය හැකි බව ඔහු සදහන් කර තිබුනි.
“අතුරුදහන් වූවන් පිළිබඳ කාර්යාලය අතුරුදහන් වූ පුද්ගලයින් පිළිබඳ විමර්ශන කටයුතු ආරම්භ කර ඇත.තවද, මාස තුනක් ඇතුළත එය අවසන් කිරීම සඳහා දත්ත ඇතුළත් කිරීමේ ක්‍රියාවලිය කඩිනම් කිරීමට කටයුතු කරමින් සිටී. අතුරුදන්වූවන් සඳහා සහතික නිකුත් කිරීම (Certificate of absence) කඩිනම් කරමින් පවතී.”
අතුරුදහන් කරනු ලැබුවන් සොයාගැනීමට අඛණ්ඩ අරගලයක යෙදී සිටින ඥාතීන්ට එකම සමීපතමයකු හෝ සොයා දීමට සමත් වී නැති අතුරුදහන් වූ තැනැත්තන් පිළිබඳ කාර්යාලයට (OMP) මේ වන විට වසර පහ හමාරක් පිරි තිබේ.
වත්මන් ජනාධිපති රනිල් වික්‍රමසිංහ මෛත්‍රීපාල සිරිසේන ජනාධිපතිගේ ආණ්ඩුවේ අගමැතිව සිටියදී 2018 පෙබරවාරි 28 දා පිහිටුවන ලද කාර්යාලය සම්බන්ධයෙන් කෝපයෙන් යුතු ඥාතීන් සිටින බව හිටපු OMP ප්‍රධානී ජනාධිපති නීතිඥ සාලිය පිරිස් ද පිළිගෙන තිබුනි.
යුද්ධයේ අවසාන දින වලදී ආරක්ෂක අංශ භාරයට පත් වීමෙන් පසුව හා යුද්ධයේ අවසන් මොහොතේ අතුරුදහන් වු තමන්ගේ ආදරණීයයන්ට අත්වූ ඉරණම හෙළි කරන ලෙස රජයට බල කරමින් 2017 වසරේ පෙබරවාරි සහ මාර්තු මාසවලදී වව්නියාව, කිලිනොච්චිය, යාපනය, මුලතිව්, ත්‍රිකුණාමලය සහ අම්පාර දිස්ත්‍රික්ක වල සත්‍යග්‍රහ ව්‍යාපාර ආරම්භ විය.
බලහත්කාරයෙන් අතුරුදහන්කරවුවන් වෙනුවෙන් යුක්තිය ලබා දෙන බව පවසමින් ආණ්ඩුව යෝජනා කර තිබෙන අතුරුදන්වූවන් සඳහා නිකුත් කරන සහතිකය ලබා ගැනීමත්, වන්දි මුදල් ලබා ගැනීමත් තම සමීපතමයන් අහිමිව සිටින යුද වින්දිත දෙමළ මව්වරුන් ප්‍රසිද්ධියේම ප්‍රතික්ෂ්‍රේප කර තිබේ.
ජනාධිපති රනිල් වික්‍රමසිංහ ඊයේ පාර්ලිමේන්තුවේදී සදහන් කළේ උතුරු නැගෙනහිර පැවති යුධ ගැටුමෙන් අතුරුදන් වූ පුද්ගලයන් 203දෙනෙක් සඳහා 2023 ජූලි වන විට රුපියල් මිලියන 40.6 ගෙවා ඇති අතර එම ක්‍රියාවලිය අඛණ්ඩව සිදුවෙමින් පවතී. ඔහු පැවසු පරිදි අතුරුදහන් වූවන් පිළිබඳ කාර්යාලය වෙත ලැබී ඇති පැමිණිලි 21,374 කි.
Facebook Comments
