“අසත්‍ය ප්‍රවෘත්ති ප්‍රබන්ධ” සෙවීමට ජනපති ගුවන් යානා යවයි

රටේ පරිසර හානිය පිළිබඳ තොරතුරු “අසත්‍ය ප්‍රවෘත්ති ප්‍රබන්ධ” ලෙස හෙලා දුටු ජනාධිපතිවරයා එයින් තුන් මාසයක් ගතවන්නටත් පෙර මෙරට වන සම්පත් විනාශය වැළැක්වීම සදහා ගුවන් යානා යෙදවීමට උපදෙස් ලබා දී තිබේ.

ජනාධිපති ගෝඨාභය රාජපක්ෂගේ අලුත්ම නියෝගය දැනුම් දෙමින් ආරක්ෂක ලේකම්වරයා පවසා ඇත්තේ වනාන්තර විනාශය පිළිබඳව අවධානය යොමු කිරීම අත්‍යාවශ්‍ය වන අතර දැව කැපීමට පෙර එවැනි උත්සාහයන් හඳුනා ගැනීම ද අත්‍යවශ්‍ය බවයි.

“මෙවැනි උත්සාහයන් වලක්වන ලෙස ජනාධිපතිවරයා ත්‍රිවිධ හමුදාවට හා පොලිසියට දැනුම් දී ඇති අතර එබැවින් එය ශ්‍රී ලංකා ගුවන් හමුදාවේ ගුවන් යානා භාවිතා කරමින් අධීක්ෂණය කරන බව,” මේජර් ජෙනරාල් කමල් ගුණරත්න උපුටා දක්වන ආරක්ෂක අමාත්‍යාංශයේ නිල පුවත් වෙබ් අඩවිය වාර්තා කරයි.

ආරක්ෂක අමාත්‍යාංශයේ ලේකම්වරයා ඒ බව පවසා ඇත්තේ දිස්ත්‍රික් ලේකම්වරුන්, දිසාපතිවරුන් නාරාහේන්පිට පිහිටි අභ්‍යන්තර ආරක්ෂක, ස්වදේශ කටයුතු හා ආපදා කළමනාකරණ රාජ්‍ය අමාත්‍යාංශයේ දී නොවැම්බර් 25 බදාදා දින අමතමිනි.

වන සම්පත් අඩුවීමට තුඩු දෙන පරිසර විනාශය පිළිබඳව සුපරීක්ෂාකාරී වීමට සහ ඊට එරෙහිව කටයුතු කරන ලෙස ඔහු දිස්ත්‍රික් ලේකම්වරුන්ගෙන් සහ දිසාපතිවරුන්ගෙන් ඉල්ලා තිබේ.

මෑතදී ඉඩම් කොල්ලකෑමේ සිදුවීම් වාර්තාවීම ගැන සඳහන් කළ ආරක්ෂක ලේකම් මේජර් ජෙනරාල් කමල් ගුණරත්න එහිදී වැඩි දුරටත් අවධාරණය කර ඇත්තේ ඉඩම් කොල්ලයට සම්බන්ධ පුද්ගලයන් හඳුනාගැනීම සඳහා විශේෂ ඒකකයක් පිහිටුවා ඇති බවයි.

මුලතිවු දිස්ත්‍රික්කයේ නීතිවිරෝධී තේක්ක දැව ජාවාරමක් ගවේෂණය කරමින් සිටි මාධ්‍යවේදීන් දෙදෙනකුට ඔක්තෝබර් 12 වැනි දා දැව ජාවාරම්කරුවන් පිරිසක් විසින් අමානුෂික ලෙස පහර දී තිබු අතර එම නඩු කටයුතු විභාග වෙද්දී පොලීසිය විසින් අනාවරණය කරගෙන තිබුනේ කනපතිපිල්ලෙයි කුමනන් සහ ශන්මුගම් තවසීලන් යන මාධ්‍යවේදීන් දෙදෙනාට පහරදීම සිදු වු ස්ථානය ආසන්නයේ පිහිටි නාගන්චෝලේ රක්ෂිතයේ අක්කර 180 ක භුමියක් දැව ජාවාරම්කරුවන් විසින් විනාශ කර ඇති බවයි.

එම අපරාධයට වගකිවයුත්තන් කවුරුන්දැයි හෙළි කරගැනීමට එවකට පොලීසිය අසමත්ව තිබුනි.

වත්මන් රජය බලයට පැමිණීමෙන් පසු සිදුකෙරෙන පරිසර හානිය පිලිබඳව මාධ්‍ය විසින් කරන හෙළිදරව් ජනාධිපති වරයා විසින් මීට ඉහතදී ප්‍රතික්ෂේප කර තිබුනේ “අසත්‍ය ප්‍රවෘත්ති ප්‍රබන්ධ කොට සමාජගත කිරීමේ මෙහෙයුමක්” ලෙස හුවා දක්වමිනි.

කෙසේවෙතත්, වන විනාශය සැබවින්ම සිදුවන්නක් බව ආරක්ෂක ලේකම් මේජර් ජෙනරාල් කමල් ගුණරත්න මීට ඉහතදී ද පිළිගෙන තිබුනි.

බොහෝ තැන්වල පරිසර විනාශයන් සිදුව ඇත්තේ දේශපාලනඥයන්ගේ රැකවරණය සහ අනුදැනුම යටතේ බව විපක්ෂය දිගින් දිගටම කරන චෝදනාවකි.

වර්තමාන ආණ්ඩුව සමයේ සිදුවන පරිසර විනාශයේ වගකීම විෂයභාර අමාත්‍යවරයා විසින් පසුගියදා රාජ්‍ය නිලධාරීන් පිට පටවා තිබුනි.

මේ වන විට පුත්තලම දිස්ත්‍රික්කයේ ඇතැම් පුද්ගලයන් විසින් වරින් වර සිදු කරනු ලබන පරිසර හානි කිරීම් සම්බන්ධව වාර්තා වන අතර ප්‍රාදේශීය ලේකම් වරුන්, ග්‍රාම නිලධාරින්, ගොවිජන සංවර්ධන නිලධාරින්, පරිසර නිලධාරින්, සංවර්ධන නිලධාරින් ඇතුළු නිලධාරින් විශාල පිරිසක් ප්‍රාදේශීය සේවාවන් හි නිරතව සිටිය දී මෙවැනි පරිසර හානි කිරීම් සිදුවන්නේ එම නිලධාරින්ගේ අකාර්යක්ෂමතාවය හා නොසැළකිල්ල නිසා බවට අමාත්‍ය මහින්ද අමරවීර චෝදනා කර තිබුනි.

පරිසර හානිය පිළිබද පුවත් ජනමාධ්‍ය විසින් දිගින් දිගටම වාර්තා කරද්දී, පරිසර හානි පිළිබදව දැනුම් දීම සදහා පරිසර අමාත්‍ය මහින්ද අමරවීර දුරකථන අංක හතරක් ද හදුන්වා දී තිබේ.

පරිසර අමාත්‍යාංශයේ 1991, මධ්‍යම පරිසර අධිකාරියේ 1981, භූ විද්‍යා සමීක්ෂණ හා පතල් කාර්යාංශයේ 1921 දුරකථන අංක වලටත්, අමාත්‍යවරයාගේ පුද්ගලික දුරකථනය වන 0707-555666 අංකයට වට්ස්අප් පණවිඩයක්, කෙටි පණිවිඩයක් හෝ විඩියෝ හෝ එවන ලෙසත් පරිසර අමාත්‍යවරයා මහජනතාවගෙන් වැඩි දුරටත් ඉල්ලා තිබේ.