මුල්ලිවයික්කාල් සමරුව විනාශ කිරීම ජිනීවා දක්වා දුරදිග යන ලකුණු (VIDEO)

0

යාපනය විශ්ව විද්‍යාලය තුළ පිහිටුවා තිබූ මුල්ලිවයිකාල් අනුස්මරණ ස්මාරකය බලහත්කාරයෙන් කඩා හෙලීමත් සමග ඇති වු ජාත්‍යන්තර විරෝධය මගින් ජිනීවාහිදී ශ්‍රී ලංකාවට එරෙහිව දැඩි ක්‍රියාමාර්ගයක් සඳහා වූ ඉල්ලීම් යළිත් වරක් පණ ගන්වා තිබේ.

1997 සිට බ්‍රිතාන්‍ය පාර්ලිමේන්තුවේ මිචම් සහ මෝර්ඩන් ආසනය නියෝජනය කරන බ්‍රිතාන්‍ය කම්කරු පක්ෂයේ ප්‍රමුඛ පාර්ලිමේන්තු මන්ත්‍රීවරියක වන ශිවෝන් මැක්ඩෝනා, මීලඟ මාර්තු මාසයේ රැස්වීමට නියමිත එක්සත් ජාතීන්ගේ මානව හිමිකම් කවුන්සිලයේ දී ශ්‍රී ලංකාවට එරෙහිව ප්‍රබල යෝජනාවක් ගෙන එන ලෙස බ්‍රිතාන්‍ය රජයෙන් ඉල්ලා ඇත.

පාර්ලිමේන්තුවේදී අදහස් දක්වමින් රාජපක්ෂ සහෝදරයන් දැඩි ලෙස විවේචනය කළ මැක්ඩෝනා මන්ත්‍රීවරිය ; සිවිල් යුද්ධයේ අවසාන පරිච්ජේදයේ දී තමන්ගේම රටවැසියන් දහස් ගණනින් ඝාතනය කිරීමේ භූමිකාව හේතුකොටගෙන රාජපක්ෂවරුන් මනුෂ්‍යත්වයට එරෙහි අපරාධ පිළිබඳ චෝදනාවලට මුහුණ දී සිටින අය බවද කියා සිටියා ය.

ශ්‍රී ලංකාවේ මානව හිමිකම්, යුක්තිය සහ වගවීම ප්‍රවර්ධනය කිරීම හා ආරක්ෂා කිරීම සඳහා ප්‍රබලතම කොන්දේසි ඇතුලත් ශ්‍රී ලංකාවට එරෙහිව යෝජනාවක් ගෙන ඒමින් ගෝලීය තලයේ සිය නායකත්වය සනාථ කරන ලෙස ඇය බ්‍රිතාන්‍ය ආණ්ඩුවෙන් ඉල්ලා තිබේ.

“මෙසේ යාපනය විශ්ව විද්‍යාලයේ මුල්ලිවයිකාල් දෙමළ වර්ග සංහාර ස්මාරකය විනාශ කිරීම; සදාකාලික සාමය සඳහා වන මාවතේ ශ්‍රී ලංකාව ගෙනයාම සඳහා අවශ්‍ය යුක්තිය සහ වගවීමට හානි පමුණුවන ක්‍රියාවකි.”

ඇයට අනුව ප්‍රබල යෝජනාවක් ගෙන ඒමෙන්, ප්‍රජාතන්ත්‍රවාදයට සහ මානව හිමිකම්වලට සහාය දැක්වීමේ බ්‍රිතාන්‍යයේ ස්ථාවරය ඉහළින්ම පිළිගැනීමට ලක් වෙනු ඇත.

“ශ්‍රී ලංකාවේ නොකඩවා සිදුවෙමින් පවතින මෙවන් අසාධාරණයන්ට එක්සත් රාජධානිය ප්‍රතිචාර දක්වන ආකාරය සහ ප්‍රජාතන්ත්‍රවාදයට හා මානව හිමිකම්වලට සහ නීතියේ ආධිපත්‍යයට දක්වන සහාය අනුව ජාත්‍යන්තර තලයේ අපගේ නායක කාර්යභාරය පිළිබඳ දැවැන්ත මනා අවබෝධයක් ලබා දෙනු ඇත.”

ෂිවොන් මැක්ඩෝනා ට අවශ්‍යව ඇත්තේ බ්‍රිතාන්‍ය ආණ්ඩුව මෙම ප්‍රශ්නය සම්බන්ධයෙන් ස්ථිර වශයෙන්ම නව යෝජනාවක් ගෙන ඒමට එකඟ වීමයි. එහි දී, එම යෝජනාවට අඩංගු විය යුතු කරුණු ලෙස අවධාරණය කළ යුතු යැයි කල්පනා කරන කරුණු පාර්ලිමේන්තු කතාවේ දී ඇය මෙසේ දක්වා ඇත්තීය.

“මානව හිමිකම් මහ කොමසාරිස් කාර්යාලය මගින් මානව හිමිකම් අධීක්ෂණය කෙරෙන බව තහවුරු කෙරෙන යෝජනාවක්, මෙයට කලින් සිදු කෙරුණු එක්සත් ජාතීන්ගේ විමර්ශන මත පදනම් වී, අනාගත විමර්ශන සහ නඩු පැවරීම් සඳහා සාක්ෂි රැස්කිරීමේ, ආරක්ෂා කිරීමේ සහ විශ්ලේෂණය කිරීමේ යාන්ත්‍රණයක් සැකසීමට වරය ලබාදෙන යෝජනාවක් සහ ශ්‍රී ලංකාවේ මානව හිමිකම්, යුක්තිය සහ වගවීම ප්‍රවර්ධනය හා ආරක්ෂාව වෙනුවෙන් ජාත්‍යන්තර ක්‍රියාමාර්ග ගැනීම සඳහා සුදුසු විකල්ප පිළිබඳ වාර්තාවක් පිළියෙළ කරන ලෙස මානව හිමිකම් මහ කොමසාරිස් කාර්යාලයෙන් ඉල්ලා සිටිනු ලබන්නාවු යෝජනාවක්,” යනාදී ලෙසිනි.

මෙම ප්‍රශ්නය සම්බන්ධයෙන් තම රට විසින් මීට පෙර දී පෙන්නුම් කර ඇති පරිදි තම ගෝලීය නායකත්වය අඛණ්ඩව පවත්වා ගෙන යාමට මාර්තු මාසයේ දී එළඹෙන මෙම අද්විතීය අවස්ථාව පාවිච්චි කරන බවට සහතික වන ලෙසත්, එමගින් සිය ජාතිය සැබවින්ම ගෝලීය බ්‍රිතාන්‍යයම බව ජාත්‍යන්තර වේදිකාවට පෙන්වීමට කටයුතු කරන ලෙසත් මන්ත්‍රීවරිය ආණ්ඩුවට දැඩි ලෙස කියා සිටී.

ශ්‍රී ලංකා රජය ඔවුන්ගේ ඉහල තානාන්තර සඳහා, යුද අපරාධ සම්බන්ධයෙන් චෝදනා ලැබූ හමුදා සෙන්පතියන් මෙන්ම දූෂණ, ප්‍රචණ්ඩ ක්‍රියා සහ සාමාන්‍ය අපරාධ චෝදනාවලට ලක්වූ දේශපාලනඥයන් පත් කර ඇති බව ද ඇය සිය කතාවේදී වැඩි දුරටත් පෙන්වා දුන්නාය.

වර්තමාන ශ්‍රී ලංකාණ්ඩුව යුද අපරාධ චෝදනා විමර්ශනය කිරීම සඳහා වූ එක්සත් ජාතීන්ගේ මානව හිමිකම් කවුන්සිලයේ යෝජනාවෙන් ද ඉවත් විය.

2020 පෙබරවාරියේ දී ශ්‍රී ලංකාවේ විදේශ අමාත්‍ය දිනේෂ් ගුණවර්ධන එක්සත් ජාතීන්ගේ මානව හිමිකම් කවුන්සිලයට දැනුම් දුන්නේ, වගවීම, සංහිඳියාව සහ මානව හිමිකම් ප්‍රවර්ධනය කිරීම පිළිබඳ එක්සත් ජාතීන්ගේ මානව හිමිකම් කවුන්සිලයේ 40/1 යෝජනාවේ සම අනුග්‍රාහකත්වයෙන් ඉවත් වීමට ශ්‍රී ලංකාණ්ඩුව තීරණය කර ඇති බව යි.

Facebook Comments