වන්නියේ හින්දු පුදබිමක පුරාවිද්‍යා කැනීම් නවතී (VIDEO)

0

කිලිනොච්චියේ පෞරානික හින්දු පුද බිමක පුරා විද්‍යා දෙපාර්තමේන්තුව විසින් සිදු කිරීමට නියමිත මැනීමේ කටයුතු නතර කිරීමට ආණ්ඩුව තීරණය කර තිබේ.

“ශිවන් කෝවිලක් පිළිබදව ශ්‍රීධරන් ගරු මන්ත්‍රීතුමා පැමිණිලි කරා. ඒ් මැනීම් කටයුතු නවත්තන්නටෙයි කියලා. අපි එකඟ උනා, තාවකාලිකව මේ මැනුම් කටයුතු නවත්තන්නට කියලා. ”

බුද්ධශාසන, ආගමික සහ සංස්කෘතික කටයුතු අමාත්‍ය විදුර වික්‍රමනායක ඒ් බව සදහන් කළේ උතුරේ දෙමළ ජනතා නියෝජිතයන් සමග මැයි 25 වැනිදා පැවැති සාකච්ඡාවකින් පසු මාධ්‍යවේදීන් අමතමිනි.

එසේ අත්හිටුවා ඇත්තේ කිලිනොච්චි දිස්ත්‍රික්කයේ උරුත්තිරපුරම් හි සිව දේවාලයක් පිහිටි ස්ථානයේ පුරාවිද්‍යා දෙපාර්තමේන්තුවෙන් කෙරෙන කැනීම් කටයුතුය.

පුරා විද්‍යා නිලධාරීන් 2021 පටන් එහි කැනීම් සඳහා කිහිපවර උත්සාහ ගත් අවස්ථාවේ ප්‍රදේශයේ හින්දු බැතිමතුන්ගෙන් එල්ල වු විරෝධය හමුවේ එම කටයුතු නතර කරන්නට සිදුවී තිබුනි.

ජනාධිපතිවරයා සමග පසුගියදා පැවති සාකච්ඡාවේදී ද උතුරු නැගෙනහිර මන්ත්‍රීවරුන් දැඩි ලෙස කියා තිබුනේ පුරා විද්‍යා දෙපාර්තමේන්තුව දෙමළ ඉඩම් කොල්ලයකට සහාය වෙන බවයි.

අමාත්‍යවරයා, පුරා විද්‍යා නිලධාරීන් හා අමාතාංශ ලේකම් සමග පැවැති සාකච්ඡාවට එක්ව සිටි ඉලංකෙයි තමිල් අරසු කච්චි පාර්ලිමේන්තු මන්ත්‍රී චාල්ස් නිර්මලනාදන් සිංහල බසින් කොළඹ මාධ්‍යවේදීන්ට කියා සිටියේ පුරා විද්‍යා නිලධාරීන්ගෙන් උතුරු නැගෙනහිර දෙමළ ජනතාවගේ ඉඩම් අල්ලා ගනිමින් බෞද්ධ විහාරස්ථාන ඉදිකරන ආකාරය එම සාකච්ඡාවේදී පෙන්වා දුන්නත් පුරාවිද්‍යා බලධාරීන් එය ප්‍රතික්ෂේප කළ බවයි.

“අපි කිව්වා, පැහැදිලිව කිව්වා පුරා විද්‍යා ආයතනය රජයේ ආයතනයක්. එතකොට ඒකෙන් එක පැත්තට තමයි ඒ් ප්‍රදේශයේ ඉන්න ආයතන නිලධාරීන් දිගටම දිගටම අපේ ඉඩම් අල්ලලා ඒ්කේ පන්සල් හදන්න බලනවා කියලා. ඒතකොට ඒ්කෙ ජෙනරල්තුමා කිව්වා ඒහෙම නෑ කියලා.”

කෙසේ වෙතත්, මෑත භාගයේ වන්නියේ නොසන්සුන්තාවලට තුඩුදුන් මුලතිව් දිස්ත්‍රික්කයේ ස්ථාන දෙකකම පුරාවිද්‍යා දෙපාර්තමේන්තුවත්, යුද හමුදාවත් හවුල්වී කරගෙන යන කටයුතු සම්බන්ධයෙන් අවසන් තීරණයකට එළඹ නැත.

“කුරුන්දිමලේ සහ වෙඩුක්කනාරිවල වල මේ වන විට නීතිමය කටයුත්තක් කෙරෙන නිසා එ් නීතිමය කටයුත්තෙන් පසුව අවශ්‍ය කටයුතු කරන්නට සියළුදෙනාටම එකඟ වෙන්නට පුළුවන් වැඩ පිළිවෙලක් අපි හදන්නට ඕනේ කියන එක,” යි බුද්ධශාසන, ආගමික සහ සංස්කෘතික කටයුතු අමාත්‍ය විදුර වික්‍රමනායක ප්‍රකාශ කළේය.

පුරාවිද්‍යාත්මක ගවේෂණයේ නාමයෙන් පැවැත්වෙන උත්සවයක් සඳහා 2021 වසරේ කුරුන්තූර්මලෙයි වෙත පැමිණි එවකට ජාතික උරුමයන් පිළිබඳ රාජ්‍ය අමාත්‍ය විදුර වික්‍රමනායක අනතුරුව ප්‍රදේශයේ සංචාරයක යෙදෙමින් හමුදාව විසින් එහි ගොඩනගන ලද චෛත්‍යක් ද වන්දනා කර තිබුනි.

සෙබල පිරිස් පිරිවරා ගොස් කුරුන්තූර්මලෙයි ශිව දේවාලය පිහිටි ස්ථානයේ බුදු පිළිමයක් තබා බෞද්ධ සිද්ධස්ථානයක් බවට පත් කිරීමට ගත් වෑයමක් සම්බන්ධයෙන් ද එවකට රාජ්‍ය අමාත්‍ය විදුර වික්‍රමනායකට දෙමළ ජනතාවගේ විරෝධය එල්ල විය.

ප්‍රදේශවාසී දෙමළ ජනතාව චෝදනා කරන්නේ වසර සිය ගණනක් තිස්සේ කුරුන්තුර්මලෙයි ශිව දේවාලයේ වන්දනාමාන කරන දෙමළ ජනයාට එදින සිට එම කෝවිල් ප්‍රදේශයට ඇතුළු වීම ද තහනම් වු බවයි.

පුරාවිද්‍යාවේ හා බෞද්ධ සංස්කෘතියේ මුවාවෙන් ප්‍රදේශයේ ජනතාවගේ ජීවන හා සංස්කෘතික පැවැත්ම වලක්වා ඇති බවටත් චෝදනා කරන ඔවුන් වැඩි දුරටත් පෙන්වා දෙන්නේ කුරුන්තූර්මලෙයි ආසන්නයේ පිහිටි අක්කර 400 ට වැඩි සිය පාරම්පරික කෘෂි කාර්මික ඉඩම්ද අහිමිවීමේ අනතුරකට මුහුණ දී ඇති බවයි.

එම කෘෂි ඉඩම් සම්බන්ධයෙන් ද චාල්ස් නිර්මලනාදන් මන්ත්‍රීවරයා සාකච්ඡාවේදී අවධානයට යොමු කළ බව පවසන අමාත්‍ය විදුර වික්‍රමනායක වැඩි දුරටත් සදහන් කළේඑම ඉඩම් වල අයිතිය පවතින්නේ වන සංරක්ෂණ දෙපාර්තමේන්තුවට බවයි.

“එ් නිසා අපි ලියුමක් ලියනවා වන සංරක්ෂණ දෙපාර්තෙම්න්තුවට කුඹුරු කිරීම සම්බන්ධෙයන් අපේ විරුද්ධත්වයක් නැ. හැබැයි යම් හෙයකින් පුරාවිද්‍යාත්මක සාධක මතු වූවහොත් ඒ් පිළිබද වහාම පුරා විද්‍යා දෙපාර්තමේන්තුව දැනුවත් කරන්න.”
කුරුන්තූර්මලෙයි ශිව දේවාලය පිහිටා තිබු ස්ථානයේ අලුතින් බුදු පිළිමයක් තැන්පත් කිරීමට එරෙහිව ජනතා විරෝධතා දියත් වෙද්දී එම ස්ථානයට පැමිණි පුරා විද්‍යා අධ්‍යක්ෂ ජනරාල් මහාචාර්ය අනුර මනතුංග විරෝධතාකරුවන්ට දැනුම් දී තිබුනේ එම ස්ථානය අලුතින් ඉදිකිරීම් සිදු නොවන අතර සිදු වන්නේ පුරා විද්‍යාත්මක වටිනාකමක් සහිත නටබූන් සංරක්ෂණය කිරීම පමණක් බවයි.

විරෝධතා කරුවන් එහිදී ප්‍රති උත්තර දී තිබුනේ පුරා විද්‍යා අධ්‍යක්ෂ ජනරාල්වරයා නොදන්නා නමුත් යුද හමුදාව විසින් එහි අලුතින් ඉදිකිරීම් කළ බව ගම්වැසියන් දන්නා බවයි.

මෙවැනි පුරා විද්‍යාත්මක ස්ථාන වල සිංහල ජනතාව ගොස් පදිංචි වීමෙන් තමන්ගේ ඉඩම් අහිමිවේයැයි බියක් දෙමළ ජනයාට හා මන්ත්‍රීවරුන්ට පවතින බව පෙන්වා දෙන අමාත්‍යවරයා පවසන්නේ ඒවැනි බියක් ඇති කර ගත යුතු නොමැති බවයි.

“ඒ් බය තමයි තියෙන්නේ. ඒහෙම අනියත බියක් ඇති කරගත යුතු නැහැ.“

Facebook Comments

wedding people