ඝාතනයක් බවට සැක කෙරෙන පොලිස් අත්අඩංගුවේදී මියගිය කඳුකර දෙමළ මෙහෙකාරියගේ මරණය ගැන සාධාරණ පරීක්ෂණයක් කරන ලෙස ආණ්ඩුවට බලපෑම් එල්ල වී තිබේ.
“බහුතර සිංහලයන් කල්පනා කරන්නේ සුළුතර ජන ප්‍රජාව එයාලගේ බැල මෙහෙවර කරන්න ඕනේ කියල. ඒ මානසිකත්වයෙන් තමයි පොලිසියත් වැඩ කරන්නේ. අපි මේ ජාතිවාදය පරාජය කරන්න ඕනේ,” යැයි සිරකරු අයිතිවාසිකම් සුරැකීමේ සංවිධානයේ ප්‍රධාන ලේකම් සුදේශ් නනදිමාල් ද සිල්වා පවසයි.
බදුල්ල, දෙමෝදරින් කොළඹ මෙහෙකාරකමට පැමිණි හතළිස් එක් වියැති තිදරු මවක් වූ ආර්. රාජ්කුමාරි මරා දැමීම ගැන නඩු විභාගය ඊයේ [24] කොළඹ, අලුත් කඩේ මහේස්ත්‍රාත් හර්ෂණ කැකුලාවල ඉදිරියේ කැඳවා තිබුණි.
“ධනයට බලයට යට නොවී සාධාරණ පරීක්ෂණයක් කරනු“, “වැලිකඩ පොලිසියේදී මරා දැමුණු රාජ්කුමාරිට යුක්තිය ඉටුකරනු” , “ගෘහස්ත කම්කරු සේවය නීති ගත කරනු” සටන් පාඨ ලියු පුවරු රැගත් සමාජ ක්‍රියා කාරිකයන් පිරිසක් නඩුව කැඳවන අවස්ථාවේ උසාවිය ඉදිරිපිට නිහඬ විරෝධතාවක නිරත වූහ.
සහයෝගිතා මධ්‍යස්ථානය නම් රාජ්‍ය නොවන සංවිධානයට අනුබද්ධ `ප්‍රොටෙක්ට්` සංගමය විසින් කැඳවා තිබු මෙම නිහඬ විරෝධයේදී අදහස් දැක්වූ එහි ප්‍රධාන ලේකම් කල්ප මධුරංග කියා සිටියේ දේශපාලන හා මුදල් බලය මත පොලිස් පරීක්ෂණ යටපත් කිරීමට ඉඩ නොදිය යුතු බවයි.
“බදියුදින්ගේ ගෙදරදී මරා දැමුණු ඉශාලිනි, ඊට පස්සේ මොකාවත්තේ රමණි, දැන් රාජ්කුමාරි මේ ඝාතන යටපත් නොකර පරීක්ෂණ කරන්න ඕනේ.”
සැමියා රහස් පොලිසියට
මහේස්ත්‍රාත්වරයා නියෝග කළේ රාජ්කුමාරිගේ මරණය සම්බන්ධයෙන් ඉදිරි පරීක්ෂණ අපරාධ පරීක්ෂණ දෙපාර්තමේන්තුවට යොමු කොට සියලු පාර්ශවයන්ගෙන් තොරතුරු මත සකස්කෙරෙන වාර්තාවකට අනුව ඉදිරි නඩු විභාගය ජුනි 02 වැනිදාට යළි කැඳවීමටයි.
ඒ අනුව රාජ්කුමාරිගේ සැමියා වන සෙල්වදොරේ ජෙයරාජ්ටද රහස් පොලිසියට ප්‍රකාශයක් ලබා දෙන ලෙසද නියෝග කෙරිණි.
කොළඹ, මෝදර උපන් ප්‍රකට ව්‍යාපාරික හා ටෙලි නාට්‍ය නිෂ්පාදිකා සුධර්මා ද සොයිසා හෙවත් සුධර්මා නෙත්තිකුමාර ගේ රාජගිරියේ නිවසක වසරක පමණ කාලයක සිට රාජ්කුමාරි සේවය කර ඇත.
“පහුගිය 11 වැනිදා රාජ්කුමාරි මට කෝල් කරලා කිව්වා. මාව බේරා ගන්න. මට හොදටම ගහනවා කියල. එතකොට එයා හිටියේ පොලිසියේ,” යැයි ඇගේ සැමියා ජෙයරාජ් පවසයි.
පොලිසියෙන් සල්ලි
ඇය විසින් තම රන් මුදුවක් සොරකම් කරන ලදැ’යි චෝදනා කරමින් ස්වාමි දියණිය වැලිකඩ පොලිසියට පැමිණිලි කර තිබේ. අත් අඩංගුවේ සිදුවූ ඇගේ මරණය වසන් කිරීමට අල්ලස් දුන් බවට පොලිසියට පාර්ලිමේන්තුවේදී චෝදනා එල්ල විය.
“සුධර්මා නෙත්තිකුමාරගේ නිවසේ වැඩ කරපු කාන්තාව 11 වැනිදා හවස පොලිසියට භාර දීලා තියෙනවා. 12 වැනිදා උදේ මැරිලා. පොලිසියෙන් ගහලා තියෙනවා කියලා තමයි දැනට රෝහල් ආරංචි මාර්ග කියන්නේ. එතකොට පොලිසියෙන් ඇයි රුපියල් 10,000ක් සල්ලි දෙන්නේ, බොඩිය ගෙනියන්න. රුපියල් 10,000ක් 25,000ක් දීලා. අහිසංක පොඩි ලමයි තුන්දෙනෙක් ඉන්නේ. මේ කාන්තාව දැන් වලදාලත් ඉවරයි,” යයි කඳුකරය නියෝජනය කරන වඩිවේල් සුරේෂ් මන්ත්‍රීවරයා පාර්ලිමේන්තුවේදී 23 වැනිදා පැවසීය.
පොලිස්පතිවරයාගේ නියෝගයෙන් රාජකුමාරිගේ මරණයට අදාලව රාජගිරිය පොලිසියේ නිලධාරීන් සිව් දෙනකුගේ වැඩ තහනම් කර ඇති අතර පොලිස් කොස්තාපල්වරියන් දෙදෙනකු ඇතුළු තුන් දෙනෙකුට හදිසි ස්ථාන මාරු ලබා දී ඇත.
නීති නැහැ
මෙම මරණය ගැන අපරාධ නීති යටතේ ක්‍රියා කළ හැකි වුවත් ගෘහ සේවිකාවන්ට දිගින් දිගටම සිදුවන මෙවැනි අපරාධවලට එරෙහිව පියවර ගත හැක්කේ ඔවුන් වෘත්තීය සමිතියක් තුල සංවිධානය කිරීමෙන් පමණක් බව කම්කරු අයිතීන් පිලිබඳ ප්‍රකට නීතිඥ එස්.එච්. ඒ. මොහොමඩ් පෙන්වා දෙයි.
“ගෘහ සේවිකාවන්ගේ වෘත්තීය සම්බන්ධයෙන් බලපාන කිසිදු පනතක් ලංකාවේ නැහැ. එවැනි දෙයක් දිනා ගත හැක්කේ ඔවුන්ව වෘත්තීය සමිතියකට ගොනු කිරීමෙන් විතරයි. ඒ වෘත්තීය සමිතිය ක්‍රියාත්මක වෙන්න ඕනෙත් කම්කරුවන්ගේ සාමාජික මුදලින්, එවිටයි ඔවුන්ට දැනෙන්නේ මේක තමන්ගේ සමිතිය කියලා,” යි ඔහු පවසයි.
Facebook Comments
