හතළිස් තුන් ලක්ෂයක් සිසුන්ගේ අධ්‍යාපනයට පාඩුවක් වන්නේ ආණ්ඩුව ගුරු -විදුහල්පති ගැටළු විසඳීම කල් දැමීම නිසා බව ගුරු හා විදුහල්පති වෘත්තීය සමිති චෝදනා කරයි.
“කැබිනට් මණ්ඩලයට යොමු කළ ගුරු හා විදුහල්පති වැටුප් විෂමතා පිලිබඳ ඇමැති අනු කමිටු වාර්තාවතවදුරටත් අධ්‍යයනය කිරීමට යැයි කියමින් ආණ්ඩුව විසදුම් පමා කරනවා. ඒ හින්දා ළමයින්ගේ අධ්‍යාපනයට වන පාඩුව ආණ්ඩුව හා කැබිනට් මණ්ඩලය බාර ගත යුතුයි“ යැයි ලංකා ගුරු සංගමයේ ලේකම් ජෝශප් ස්ටාලින් පවසයි. මාධ්‍ය හමුවේ ඔහු කියා සිටියේ ගුරු විදුහල්පති ගැටලුව දැනට කැබිනට් මණ්ඩල රැස්වීම් පහක සාකච්ජා කර ඇතත් විසදුම් පමා කරමින් තිබෙන බවය.
ගුරු හා විදුහල්පති වැටුප් විෂමතා ගැන සොයා බලා වාර්තාවක් සකස් කිරීමට ඩලස් අලහප්පෙරුම,විමල් විරවංශ, මහින්ද අමරවීර,සහ ප්‍රසන්න රණතුංග ඇමැතිවරුන්ගේ අනු කමිටුව ගුරු හා විදුහල්පති වෘත්තීය සමිති තිහක් සමඟ සාකච්ඡා කොට සැකසු වාර්තාව ඊයේ 23 වැනිදා පැවති කැබිනට් මණ්ඩලයට යොමු කොට තිබේ. ඒ ගැන අධ්‍යයනය කර ඊළඟ කැබිනට් මණ්ඩල රැස්වීමේදී තීරණයක් ගැනීමට එහිදී යෝජනා වී ඇත.
“ ඊළඟ කැබිනට් මණ්ඩලයේදී තීරණයක් ගත්තා නොගත්තා ගුරු හා විදුහල් පති සටන ඉදිරියට ගෙන යනවා“ යැයි පැවසූ ලංකා ගුරු සංගමයේ ලේකම් ජෝශප් ස්ටාලින්, ගුරු වෘත්තීය සමිති විසින් සිය ගැටළු විසදීම සඳහා අධ්‍යාපන අමාත්‍යංශය විසින් සකස් කර ඇති සුබෝධනි කමිටු වාර්තාව ක්‍රියාත්මක කරන ලෙස ඉල්ලා සිටියත් ආණ්ඩුව සියලු විසදුම කල් දමමින් ගුරු හා විදුහල්පති වරුන්ට අවලාද නගන බවට ද චෝදනා කළේය.
“දෙලක්ෂ හතලිස් හත් දාහක් වන ගුරුවරු සහ දාසය දාහක් වන විදුහල්පතිවරු එක්ව දියත් කළ සටන අඩාල කරන්න ගුරු පොකුරු නිර්මාණය වන බව කිවත් අප දන්නා විදිහට නම් එහෙම පොකුරු නැහැ. අපි උද්ඝෝෂණ ක්‍රියා මාර්ග නැවැත්තුවේ විශේෂඥ වෛද්‍යවරුන්ගේ ඉල්ලීමට, දැන් උද්ඝෝෂණ නවත්වලා සති දෙකක් වෙනවා තවම අපේ ගැටලුවට විසදුම් ලබා දීලා නැහැ,“ යි ස්ටාලින් වැඩි දුරටත් පැවසීය.
මාර්ගත ඉගැන්වීම්, මාර්ග ගත රැස්වීම්, සාමන්‍ය පෙළ ප්‍රායෝගික පරීක්ෂණ, ඇතුළු රාජකාරි වලින් ඉවත්වීමේ වෘත්තීය ක්‍රියා මාර්ගයේ අඛණ්ඩව නිරත වීමට ගුරු විදුහල්පති වෘත්තීය සමිති සන්ධානය තීරණය කර ඇත.
Facebook Comments
