අවුරුදු ගණන් කල් යන නඩු වලට එරෙහිව සිරගෙදර උපවාසයක්

වසර කිහිපයක් තිස්සේ අභියාචනාධිකරණයේ විභාග වන නඩු කඩිනම් කිරීමට නොහැකිනම් ඇප ලබා දෙන ලෙස ඉල්ලමින් අගනගරයේ බන්ධනාගාරයක රඳවා සිටින දෙමළ දේශපාලන සිරකරුවෙක් හත් දිනක් තිස්සේ ආහාර වර්ජනයක නිරතව සිටියදී දේශපාලන සිරකරුවන් නිදහස් කරන ලෙස බලකරමින් උතුරේදී විරෝධතාවයක් දියත් කර තිබේ.

දේශපාලන සිරකරුවකු ව සිට නිදහස ලබා ඇති, “හඬක් නැතියවුන්ගේ හඬ” සංවිධානයේ කැඳවුම්කරු මුරුගයියා කෝමගන් පවසන්නේ කොළඹ නව මැගසින් බන්ධනාගාරයේ රදවා සිටින ජාතික චිත්‍රපට සංස්ථාවේ දෙමළ අංශයේ හිටපු අධ්‍යක්ෂ දේවදාසන් කනගසබේ ජනවාරි 6 සිට මේ දක්වා ආහාර වර්ජනයේ නිරතව සිටින බවයි.

දේශපාලන සිරකරුවන්ගේ නිදහස ඉල්ලා හඬක් නැතියවුන්ගේ හඬ සංවිධානය ජනවාරි 13 බදාදා යාපනයේදී විරෝධතාවය දියත් කළ බව පළාත් බද වාර්තාකරුවෝ පවසති.

මේ වන විට කායික රෝග වලින් ද පෙළෙන තමන්ගේ රෝගී තත්වයන් උත්සන්න වෙමින් පවතින බැවින් තම නඩු කටයුතු කඩිනම් කරගැනීමට මැදිහත් වන ලෙස දේවදාසන් කනගසබේ සිය පවුලේ ඥාතීන් හරහා හඬක් නොමැතියවුන්ගේ හඬ සංවිධානයෙන්ද ඉල්ලා ති‌බේ.

කොළඹ කොටුව දුම්රියපොළේ බෝම්බ පිපිරවීමක් සම්බන්ධයෙන් සැකපිට ත්‍රස්තවාදය වැළක්වීමේ පනත යොදාගෙන අත්අඩංගුවට ගන්නා ලද දේවදාසන් කනගසබේ උපවාසකරුට අධිකරණය විසින් සිරදඬුවම් දෙකක් නියම කර තිබේ.

එකක් ජීවිතාන්තය දක්වාය. අනෙක බරපතල වැඩ ඇතිව විසි අවුරුද්දකි. එම තීන්දු දෙකටම එරෙහිව අභියාචනා ගොනු කර තිබේ.

කොළඹ ඩී.එස්.සේනානායක විද්‍යාලයේ බේස්බෝල් ක‍්‍රීඩකයන් අට දෙනකු ඇතුළු පුද්ගලයන් 16 දෙනෙකු ජීවිතක්ෂයට පත්කරමින් 2008 වසරේ ජනවාරි දෙවැනිදා කොළඹ කොටුව දුම්රිය ස්ථානයේ දී සිදු වූ මරාගෙන මැරෙන බෝම්බ ප‍්‍රහාරයට අනුබල දීමට වරදකරු වු දේවදාසන් කනගසබේ ට 2017 වසරේ මාර්තු 29 දින බරපතල වැඩ සහිතව වසර 20 ක සිර දඩුවම් නියම විය.

ඔහුට එරෙහිව ත‍්‍රස්තවාදය වැලැක්වීමේ පනත යටතේ නීතිපතිවරයා විසින් අධිචෝදනා ගොනුකර තිබුණි.

තමන්ට නියමි වී ඇති සිර දඩුවම් දෙකේ තීන්දු අභියෝගයට ලක් කරමින් අභියාචනාධිකරණයේ පිහිටා පතා ඇති ජාතික චිත්‍රපට සංස්ථාවේ දෙමළ අංශයේ හිටපු අධ්‍යක්ෂ දේවදාසන් කනගසබේ පවසන්නේ ඉන් එක් නඩුවක් වසර හතරක් තිස්සේත්, අනෙක් නඩුව වසර දෙකක් තිස්සේත් විභාග වෙමින් පවතින බවයි.

කොරෝනා බාධා

පසුගිය වසරේ ශ්‍රී ලංකාවට බල පෑ කොරෝනා වසංගත ව්‍යාප්තිය හමුවේ මේ වන විට එම නඩු කටයුතු නතර වී ඇති බව පෙන්වා දෙන දේවදාසන් කනගසබේ ඉල්ලා සිටින්නේ නඩු කටයුතු කඩිනමින් අවසන් කිරීමට නොහැකිනම් තමන්ට ඇප ලබා දෙන ලෙසයි.

හඬක් නොමැතියවුන්ගේ හඬ සංවිධානය පෙන්වා දෙන පරිදි 64 වැනි වියේ පසුවන දේවදාසන් කනගසබේගේ ගෙල අවට ප්‍රදේශයේ තුවාලයක් පවතින අතර ඔහුගේ එක් අතක සහ පාදයක රෝගා බාධ වලින් ද පෙලෙයි.

සිංහල භාෂාව නොදන්නා කමින් සිරකරුවකු ලෙස තමන් සිතින් මහත් පීඩාවකට පත්ව සිටින බව සිය ඥාතීන් හමුවේ දේවදාසන් කනගසබේ පවසා ඇති බව හඬක් නොමැතියවුන්ගේ හඬ සංවිධානය පෙන්වා දෙයි.

නඩු වලට අදාලව අධිකරණයේ කටයුතු වලට සම්බන්ධවීමේදී දෙමළ භාෂාවෙන් එයට මැදිහත්වීමට තමන්ට අවස්ථාව ලැබී ඇතත් එහි පරිවර්තන කටයුතු ප්‍රමාද වීමෙන් නඩු කටයුතු දිගින් දිගටම ප්‍රමාද වන බව දේවදාසන් කනගසබේ නගන තවත් චෝදනාවකි.

2019 ත් මාරාන්තික උපවාසයක්

සිරදඬුවම් දෙකකට එරෙහිව අභියාචනා කිරීම සඳහා බන්ධනාගාරයෙන් පිටතට ගොස් සාක්ෂි රැස් කිරීම වෙනුවෙන් ඇප ලබාදෙන මෙන් ඉල්ලා 2019 වසරේ ජුලි මාසයේදී දින නමයක් තිස්සේ කිසිදු ඝන හෝ දියර ආහාරයක් ගැනීමෙන් වැළකී මාරාන්තික උපවාසයක යෙදී සිටි දේවදාසන් කනගසබේ එවකට උපවාසය නතර කර තිබුනේ දේශපාලන සිරකරුවන් නිදහස් කරගැනීම සඳහා සති දෙකක් තුලදී කැබිනට් පත්‍රිකාවක් ඉදිරිපත් කරන බවට එවකට අමාත්‍යවරයෙක් වු මනෝ ගනේෂන් පොරොන්දු වීමෙන් අනතුරුවයි.

දේවදාසන් සිරගත කොට තිබෙන්නේ බලහත්කාරයෙන් ලබාගත් පාපොච්චාරණයක් පදනම් කරගෙන පමණක් බව උතුරු නැගෙනහිර පදනම් කරගත් යුක්තිය හා සාමය කොමිසම පසුගිය සමයේ පෙන්වා දී තිබුනි.

“ඒ පාපෝච්චාරණය ලබාගෙන තිබෙන්නේ වධහිංසා පැමිණවීමෙන්,” යයි කොමිසමේ ප්‍රධානී එස්.වී.බී මංගලරාජා පියතුමා යාපනයේදී මාධ්‍යවේදීන් අමතා වසර කිහිපයකට ඉහතදී කියා තබුනි.

“මානව හිමිකම් රැකෙන ආකාරයෙන්” ත්‍රස්තවාදය වැළක්වීමේ පනත සංශෝධනය කරන බවට ආණ්ඩුව දී ඇති පොරොන්දු ඉටු නොකිරීම ගැන එක්සත් ජාතීන්ගේ සංවිධානය ඇතුළු දෙස් විදෙස් මානව හිමිකම් සංවිධාන වල විවේචනයට ලක්ව සිටී.

ආණ්ඩුවේ පරස්පරය

ශ්‍රී ලංකාවේ බන්ධනාගාර තුළ දේශපාලන සිරකරුවන් සිටින්නේද නැද්ද යන්න සම්බන්ධයෙන් මේ වන විට ආණ්ඩු පක්ෂය තුලම පරස්පර අදහස් මතු වෙමින් තිබේ.

ශ්‍රී ලංකා දණ්ඩ නීති සංග්‍රහය යටතේ දේශපාලන චෝදනා මත සිර දඩුවම් ලැබු සිරකරුවන් කිසිවකුත් මේ වන විට ශ්‍රී ලංකා බන්ධනාගාර ආයතනයෙහි රදවා නොමැති බව ජනවාරි 7 වැනිදා අධිකරණ අමාත්‍ය ජනාධිපති නීතිඥ අලි සබ්රි පාර්ලිමේන්තුවේ පවසද්දී, ආණ්ඩුව නියෝජනය කරන ජාතික ලැයිස්තු මන්ත්‍රී සුරේන් රාඝවන් පවසා තිබුනේ “තාක්ෂණික වශයෙන්” ප්‍රතික්ෂේප කෙරුණත් ලංකාවේ දේශපාලන සිරකරුවන් සිටින බවයි.

“නමුත් අපි දන්නවා යතාර්ථය හැටියට දේශපාලන කටයුතු වලට සම්බන්ධ සිංහල, දෙමළ මුස්ලිම් යන ජාතින් තුනේම සිරකරුවන් තවමත් ඉන්න බව” මන්ත්‍රීවරයා පවසා තිබුනි.

දේශපාලන සිරකරුවන් සම්බන්ධයෙන් ආණ්ඩුව ගන්නා පියවර කවරේදැයි මන්ත්‍රීවරයා විමසු කළ අධිකරණ අමාත්‍යවරයා පවසා තිබුනේ ඒ සම්බන්ධයෙන් ආණ්ඩුව ප්‍රතිපත්තිමය තිරණයක් ගත යුතු බවයි.

අධිකරණ ඇමැතිවරයාට අනුව 2020 වසරේ ඔක්තෝබර් 31 දින වන විට ත්‍රස්තවාදය වැලැක්වීමේ පනත යටතේ සිර දඩුවම් ලබා සිටින සියලු දෙනා දෙමළ ජාතිකයන් වේ.

ඒ අතර මරණීය දණ්ඩණය නියමු වු සිරකරුවෙකු, ජීවිතාන්තය දක්වා සිර දඩුවම් නියමු වු දෙදෙනෙකු, සාමාන්‍ය සිර දඩුවම් නියම වු තිදෙනෙකු, මරණීය දණ්ඩනය නියම කිරීමෙන් පසු අභියාචනා කළ එක් අයෙකු, ජීවිතාන්තය දක්වා සිර දඩුවම් නියම කිරීමෙන් පසු අභියාචනා කළ හත් දෙනෙකු, සාමාන්‍ය සිර දඩුවම් නියම කිරීමෙන් පසු අභියාචනා කළ තිදෙනෙකු ද වේ.

ත්‍රස්තවාදය වැලැක්වීමේ පනත යටතේ සහ එල්.ටී.ටී.ඊ ක්‍රියාකාරකම් යටතේ චෝදනා ලබා හෝ සිරගත කර හෝ සැක බාල වයස්කාර දරුවන් කිසිවකුත් මේ වන විට ශ්‍රී ලංකා බන්ධනාගාර ආයතනය තුළ රදවා නොමැති බව අධිකරණ අමාත්‍ය ජනාධිපති නීතිඥ අලි සබ්රි ජනවාරි 7 දා පාර්ලිමේන්තුව හමුවේ ප්‍රකාශ කර තිබුනි.