සයිටම් වෛද්‍ය පීඨයේ ඉගෙනුම ලබන සිසුන් කොතලාවල ආරක්ෂක විශ්ව විද්‍යාලයට අන්තර්ග්‍රහනය කොට අවසන් වූ පසු සයිටම් ආයතනයේ වෛද්‍ය පීඨය අහෝසි කිරීමට පියවර ගන්නා බව උසස් අධ්‍යාපන හා සංස්කෘතික කටයුතු අමාත්‍යවරයා පවසයි.
එමෙන් ම පෞද්ගලික උසස් අධ්‍යාපන ආයතනයක් ආරම්භයේ සිට උපාධි පිරිනැමීම දක්වා වූ සියලු කටයුතු අධීක්ෂණය කිරිමට යාන්ත්‍රණයක් සකස් කෙරෙන ”තත්ත්ව සහතික හා ප්‍රතීතන පනත් කෙටුම්පත” ගෙන ඒමට ද කටයුතු කරන බව අමාත්‍ය ආචාර්ය විජයදාස රාජපක්ෂ 20 බදාදා පාර්ලිමේන්තුවේදී කියා සිටියේය.
“2012 දී සයිටම් ආයතනය ආරම්භ කර වෛද්‍ය පීඨයට වසර තුනක් පමණ ක්‍රියාත්මක වුණත් විරෝධයක් තිබුණේ නෑ. ඉන් අනතුරුව පුරවැසියෝ, ශිෂ්‍ය ප්‍රජාව විරෝධතා ගොඩ නැගුවා. මේ නිසා අධ්‍යාපන කටයුතු අඩපන වුණා. විශ්වවිද්‍යාල අකර්මන්‍ය වුණා.මේ ප්‍රශ්න උසස් අධ්‍යාපනයට පමණක් නොව සාමාන්‍ය අධ්‍යපනයටත් බලපා තිබෙනවා. පුද්ගලික අංශයේ අධ්‍යාපන ආයතන තිබෙනවා. එහෙත් පෞද්ගලික අධ්‍යාපන පද්ධතිය නිරීක්ෂණය කරන්න ක්‍රමවේදයක් සකස් කර නෑ.” යි අමාත්‍යවරයා ජෙනරාල් ශ්‍රීමත් ජෝන් කොතලාවල ආරක්ෂක විශ්වවිද්‍යාලය (විශේෂ විධිවිධාන ) පනත් කෙටුම්පත දෙවැනිවර කියවීමේ විවාදයට එක්වෙමින් ප්‍රකාශ කළේය.
සයිටම් සිසුවෙක් වු පමණින් කොතලාවල ආරක්ෂ විද්‍යාලයට අන්තර්ග්‍රහණය නොකරන බව පෙන්වා දෙන ඇමැතිවරයා සිසුන්ට ඒ සඳහා සුදුසුකම් තිබිය යුතු බවයි පෙන්වා දෙන්නේ.
මෙම සංශෝධනය මඟින් දැවෙන ප්‍රශ්නය විසඳෙනවා වගේම නැවත එවැනි ප්‍රශ්නයක් ඇති නොවෙන්න කටයුතු කළ යුතුයි යැයි උසස් අධ්‍යාපන හා සංස්කෘතික කටයුතු අමාත්‍ය ආචාර්ය විජයදාස රාජපක්ෂ වැඩි දුරටත් සඳහන් කළේය.
Facebook Comments
