අවුරුදු නමයකට ඉහතදී යුද්ධාවසානයේ එල්.ටී.ටී.ඊ පාලන ප්‍රදේශයේ සිට හමුදා පාලන ප්‍රදේශයට පැමිණ ශවේන්ද්‍ර සිල්වාගේ නායකත්වයෙන් යුත් 58 වන සේනාංකයට බාර දීමෙන් පසුව අතුරුදහන් වුවන්ගේ ලයිස්තුවේ ඇති පුද්ගලයන්ගේ තොරතුරු ලබා දෙන ලෙස රජය ඉල්ලා සිටී.
ශ්‍රී ලංකාවේ සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP) සංවිධානය විසින් එළි දක්වන ලද යුද්ධාවසානයේ හමුදාවට බාර දීමෙන් අනතුරුව අතුරුදහන් කරවුවන්ගේ නම් ලැයිස්තුව පිළිබදව සිය අවධානය යොමුව ඇති බව විදේශ කටයුතු අමාත්‍යංශය 20 බදාදා නිවේදනයක් නිකුත් කරමින් කියා සිටියේය.
2009 මැයි 18 හෝ ඒ ආසන්න දිනකදී ශ්‍රී ලංකා යුද හමුදාවට බාර දීමෙන් පසු අතුරුදහන් කරන ලද 280 දෙනකුගේ ලැයිස්තුව ITJPසංවිධානය විසින් මුල් වරට එළි දක්වනු ලැබුවේ 2018 මැයි මස 15 වනදාය.
මෙම ලැයිස්තුවට තම දෙමව්පියන් සමඟ ශ්‍රී ලංකා හමුදාවට බාර වු දරුවන් 29 දෙනකුගේ නම් ඇතුලත්ව ඇති අතර ඉන් කිහිප දෙනෙකුම වයස අවුරුදු 5ට අඩු බිලිඳුන් බවයි ITJP සංවිධානය නිවේදනයක් නිකුත් කරමින් කියා තිබුණි.
නම් ලැයිස්තුව එළි දක්වා මාසයකට වැඩි කාලයක් ගත විමෙන් පසුව ඒ පිළිබඳව නිවේදනයක් නිකුත් කරන විදේශ කටයුතු අමාත්‍යංශය ඉල්ලා සිටිනුයේ එහි නම් සඳහන් අයවලුන්ගේ විස්තර අතුරුදහන් වුවන් පිළිබඳව සොයා බැලිමේ කාර්යාලය (OMP) වෙත ලබා දෙන ලෙසයි.
“අතුරුදහන් වූ තැනැත්තන් පිළිබඳ කාර්යාලය වෙත දැනුම් දෙන ලෙස මෙරට හෝ විදේශවල වාසය කරන සියලු දෙනාගෙන්ම විදේශ කටයුතු අමාත්‍යාංශය කාරුණිකව ඉල්ලා සිටින අතර එසේ කිරීම දිරිමත්ද කරයි ,” යනුවෙන් විදේශ කටයුතු අමාත්‍යංශය නිකුත් කල නිවේදනයේ දැක්වේ.
ඇසින් දුටු සාක්ෂිකරුවන් විසින් අතුරුදහන් කරවුවන් මේජර් ජනරාල් ශවේන්ද්‍ර සිල්වා හා ජනරාල් ජගත් ජයසුරිය වෙත බාර දී ඇති බවට පවසන ITJP සංවිධානය එම හමුදා නායකන්ගෙන් ප්‍රශ්න කළ යුතු බව OMP වෙත දැන්වු බව ලයිස්තුව එළි දක්වමින් කියා සිටියේය.
“එකම වර පුද්ගලයන් සිය ගණනක් එකම ස්ථානයේ අතුරුදහන් වනු, රට තුලත්, ඉන් පිටතත් සාක්ෂිකරුවන් ගණනාවක් විසින් සියැසින් දකින ලද, ශ්‍රී ලංකාවේ බලහත්කාරයෙන් අතුරුදහන් කරවන ලද විශාලතම තනි කණ්ඩායම මෙයයි.” යාපනයේ දී ලැයිස්තුව එළි දක්වන අවස්ථාවට ස්කයිප් තාක්ෂණය ඔස්සේ සම්බන්ධව වු ITJP සංවිධානයේ අධ්‍යක්ෂිකා යැස්මින් සුකා අවධාරණය කළේය.
Facebook Comments
