සිය සේවා සුරක්ෂා කරන ලෙස ඉල්ලා සටනේ නියලී සිටින ටෙලිකොම් මෑන්පවර් සේවකයන්ගේ සංගමයේ උප සභාපතිවරයා පසුගිය සෙනසුරාදා (28) මධ්‍යම රාත්‍රියේ සිට අතුරුදහන්ව තිබේ.
ටෙලිකොම් ආයතනය අසල සිට නිවසට එන බවට දන්වා ඉරිදා අළුයම් කාලයේදී කොළඹ සිට පිටත් වූ සමස්ත ලංකා විදුලි සංදේශ කම්කරුවන්ගේ සේවක සංගමයේ උප සභාපති එම් සුජීව පිළිබඳව තොරතුරක් නැති බව පවසමින් ඔහුගේ බිරිඳ 29 ඉරිදා පිළියන්දල පොලීසියට පැමිනිලි කර ඇත.
පන්නිපිටියේ පිහිටි ඔහුගේ නිවසට යතුරු පැදියකින් ගමන් කරමින් සිටින විට ඔහු අතුරුදන්ව ඇති බවත් අද (30) සඳුදා දක්වා ඔහු සම්බන්ධයෙන් කිසිඳු තොරතුරක් නැති බවයි එම සංගමයේ සංගමයේ ලේකම් එස්. ඩී පෙර්රා පවසන්නේ.
සිය රැකියා ස්ථිර කරන ලෙස ඉල්ලා වැඩ වර්ජනයක නිරතව සිටින ටෙලිකොම් මිනිස් බල කම්කරුවෝ කොළඹ ටෙලිකොම් මූලස්ථානය අසළ දෙසැම්බර් 26 වැනිදා සිට අඛණ්ඩ ස්‍යග්‍රහය විරෝධතාවක නිරතව සිටිති.
ඔහුගේ අතුරුදහන්වීම පිළිබඳව ජනාධිපති මෛත්‍රීපාල සිරිසේන, ටෙලිකොම් සමාගමේ සභාපති කුමාරසිරි සිරිසේන හා ටෙලිකොම් ප්‍රධාන විධායක නිලධාරී දිලීප විජේසුන්දර යන අය මේ වනවිටත් දැනුවත් කර ඇති බවයි සමස්ත ලංකා විදුලි සංදේශ කම්කරුවන්ගේ සේවක සංගමය කියා සිටියේ.
වත්මන් ‘යහපාලන’ ආණ්ඩුව බලයට පත්වීමෙන් පසු වෘත්තීය සමිති නායකයෙකු අතුරුදහන් වීමක් වාර්තා වූ පළමු අවස්ථාව මෙයයි.
Facebook Comments
