අධිකරණය අපහාස කිරිමේ චෝදනා ලබා සිටින තමන් හට තනියෙන් හිරේ යාමට සිදු නොවනු ඇති බවට වංචා දුෂණ වෙනුවෙන් හඬ නඟන එක්සත් ජාතික පක්ෂයේ ප්‍රබල ඇමැතිවරයකු විශ්වාසය පල කර සිටි.
නිතිවේදිනියක වන සුගන්ධිකා ප්‍රනාන්දු විසින් අධිකරණයේ සහ නීති ක්‍රියාත්මක කරනු ලබන නිලධාරින්ගේ අක්‍රමිකතා පිළිබඳව අනාවරණය කරන විඩියෝවක් සමාජ ජාලා වල සංසරණය වන අතර ඒ පිළිබඳව අදහස් දක්වමින් නියෝජ්‍ය අමාත්‍ය රන්ජන් රාමනායක 23 සඳුදා පැවති මාධ්‍ය හමුවක දී මේ බව කියා සිටියේය.
තමන්ට නඩු පවරන නීතිඥ සංගමය සුගන්ධිකා ප්‍රනාන්දු නීතිවේදිනිය හට නඩු පවරන්නේ නැති දැයි ප්‍රශ්න කළ ඇමැතිවරයා “රන්ජන් රාමනායකට එක නීතියකුයි සුගන්ධිකා ප්‍රනාන්දුට එක නීතියකුයි වෙන්න බැහැ” යැයි ප්‍රකාශ කළේය.
අධිකරණ පද්ධතිය, විනිසුරුන්, නීතිඥවරුන් සහ පොලිස් නිලධාරින් පිළිබඳව ඇය විසින් කරන ලද හෙළිදරව් පිළිබඳව සිතා ගත නොහැකි බව කී ඇමැතිවරයා මාධ්‍යවේදිනියන් හට එම නීතිඥවරිය ආදර්ශයක් බව ද පැවසීය.
නීතිවේදිනිය විසින් කරන ලද අනාවරණයන් පිළිබඳව නීතිඥ සංගමය හා අගවිනිසුරුවරයා පරික්ෂණ සිදු කර එම අපරාධකරුවන් නීතිය ඉදිරියට ගෙන ආ යුතු බවයි රන්ජන් රාමනායක ඇමැතිවරයා අවධාරණය කරන්නේ.
සුගන්ධිකා ප්‍රනාන්දු නීතිඥවරිය අනාවරණය කළ කරුණු සත්‍ය යැයි විශ්වාස කරන බව පැවසු ඇමැති රන්ජන් ඇය සමඟ සටනට එකතු වී සිටින බව වැඩි දුරටත් කියා සිටියේය.
නියෝජ්‍ය අමාත්‍යවරයා මාධ්‍යයට කරන ලද ප්‍රකාශයක් හරහා අධිකරණයට අපහාස වු බව පවසමින් සිංහල දැඩි මතධාරි බොදු බල සේනා සංවිධානය සහ ශ්‍රී ලංකා නීතිඥ සංගමය ඇමැතිවරයාට එරෙහිව ශ්‍රේෂ්ඨාධිකරණයේ නඩු පවරා තිබේ.
ඔහු වෙනුවෙන් අධිකරණයේ පෙනී සිට නඩුවෙන් ජය ලබා දිය හැකි යයි සුගන්ධිකා ප්‍රනාන්දු නීතිඥවරිය පවසයි.
Facebook Comments
