නාවික හමුදාව විසින් බලහත්කාරයෙන් අල්ලාගෙන සිටින කිලිනොච්චි දිස්ත්‍රික්කයේ පාරම්පරික ධීවර ගම්මානයක් මුදා ගැනීමට වසරකට ආසන්න කාලයක් තිස්සේ විරෝධතාවයක නිරත වු ජනයා තම ගම්බිම් නැවත අත්පත් කරගෙන තිබේ.
තම පාරමිපරික ඉඩම් නිදහස් කරන ලෙස බල කරමින් ඉරණතිවු ධීවර ගම්මානයේ වැසියන් 2017 වසරේ මැයි 01 වනදා විරෝධතාවයක් ආරම්භ කරන ලද නමුත් මේ තාක් ඔවුන්ට තම ඉඩම් නොලැබුණි.
ඉඩම් නිදහස් කරගැනීම වෙනුවෙන් ඉරණතිවු වැසියන් ආරම්භ කර තිබු විරෝධතාවය පැවැත්වෙන ස්ථානයට පසුගිය වසරේ පැමිණි ආරක්ෂක රාජ්‍ය අමාත්‍ය රුවන් විජේවර්ධන එම ඉඩම් නාවික හමුදාවෙන් මුදා දෙන බවට පොරොන්දු දුන්න ද එය මෙතෙක් ඉටු නොවු බවටයි ගම්වැසියන් චෝදනා කරන්නේ.
ගම්බිම් හා ජීවිකාව අහිමි වූ ධීවර පවුල් සිය ගණනක සාමාජිකයෝ 23 සඳුදා සුදු කොඩි රැගෙන බෝට්ටු වල නැඟී තම පාරම්පරික ඉඩම් වෙත ඇතුල් වූහ.
වසර ගණනකට පසු තම භූමිය වෙත පැමිණි ගම් වැසියෝ ගාරා වැටී ඇති කතෝලික දේවස්ථානයට රැස්ව ආගමික වතාවත් වලින් අනතුරු තම ඉඩම් වෙත පැමිණියහ.
කෙසේ වෙතත් ඉරණතිවු ධීවර ගම්මානයේ වාඩි ලා සිටින නාවික හමුදා සෙබලුන් තවමත් එහි රැඳී සිටින අතර ඉහල නිලධාරින්ට ගම් වැසියන් පැමිණි වග දන්වන බවට කියා තිබේ.
තමන් නැවතත් ආපසු හැරී නොයන බව පවසන ඉරණතිවු වැසියෝ කුමන බාධා පැමිණියත් තම ඉඩම් වල රැඳි සිටින අවධාරණය කළ බවයි අප වාර්තාකරුවන් පවසන්නේ.
යුද්ධය අවසන් වී අවුරුදු නවයක් ගතවීත් නාවික හමුදා හැර නොයාම නිසා ඉරනතීවූ ධීවර ගම්මානයට ආපසු නොහැකි පවුල් සංඛ්‍යාව හයසියයකට ආසන්න බවයි ජාතික ධීවර සහයෝගිතා ව්‍යාපාරය පෙන්වා දෙන්නේ.
Facebook Comments
