කොරෝනා මගඩිය ගජරාමෙට සිදුවෙමින් පවතින අතර ඒ සියල්ල අතර නැවතත් ජාතිවාදය ආගම්වාදය වර්ගවාදය ඉස්මතු කිරීමේ කටයුතු සිදුවෙමින් පවතින බවට විපක්ෂ නායක චෝදනා කර තිබේ.
ජාතික ආරක්ෂාව යනු විශාල පරාසයක පවතින බැවින් එය තහවුරු කිරීම ආණ්ඩුවේ වගකීමක් බවත් ඒ වෙනුවට බොරු බේගල් ඉදිරිපත් කරමින් ජනතාව මංමුලා කිරීම සහ ව්‍යාකූල කිරීම වගකිවයුතු ආණ්ඩුවකට තරම් නොවන බවයි විපක්ෂ නායක සජිත් ප්‍රේමදාස පවසන්නේ.
මාධ්‍ය මර්දනය කරමින්, රාජ්‍ය සේවකයින් මර්දනය, මානව නිදහස සහ ප්‍රජාතන්ත්‍රවාදය නිදහස උල්ලංඝනය කරමින් රටක් ඉදිරියට ගෙන යාමට නොහැකි බව පෙන්වා දෙන විපක්ෂ නායක මේ රටට ශෝචනීය ඉරණමක් අත් කොට ඇති බව කියා සිටියේය.
අද (30) පෙරවරුවේ සමගි ජන බලවේගය පාර්ලිමේන්තු මන්ත්‍රී සහ මාධ්‍ය ප්‍රකාශක මනුෂ නානායක්කාර අපරාධ පරීක්ෂණ දෙපාර්තමේන්තුවට කැඳවා තිබූ අතර ඒ මහතා සමඟ එම ස්ථානයට පැමිණ විපක්ෂ නායකවරයා මාධ්‍ය අමතා මේ බව සඳහන් කළේය.
දත්ත මැකීමේ සිදුවීම ගැන ඇත්ත කියපු මනුෂ නානායක්කාර මන්ත්‍රීවරයාව අපරාධ පරීක්ෂණ දෙපාර්තමේන්තුව වෙත කැඳවා මෙලෙස ප්‍රශ්න කරමින් ආණ්ඩුව සැබෑ ප්‍රශ්න යට ගසන ව්‍යාපෘතියක නියැලී සිටින බව සජිත් ප්‍රේමදාස චෝදනා කරන්නේ.
ජනතාවට ඇත්ත හෙලි කරන මාධ්‍යවේදීන්ව,පුවත්පත් කර්තෘවරුන්ව අපරාධ පරීක්ෂණ දෙපාර්තමේන්තුවට කැඳවන ආණ්ඩුවක් මෙවැනි මහජන නියෝජිතයින්ව අපරාධ පරීක්ෂණ දෙපාර්තමේන්තුවට කැඳවීමට කටයුතු කිරීම පුදුමයක් නොවන බවද විපක්ෂ නායක සජිත් ප්‍රේමදාස වැඩි දුරටත් කියා සිටියේය.
Facebook Comments
