ලංකාවට පැමිණි GSP+ විමර්ශක කණ්ඩායමෙන් ආණ්ඩුවට “යහපත් ප්‍රතිචාරයක්”

0

මානව විරෝධි කටයුතු දිගටම සිදු කරන බවට එල්ල වී තිබෙන චෝදනා නිසා ශ්‍රී ලංකාවට GSP+ ලබා දීම හෝ නොදීම සම්බන්ධයෙන් සොයා බැලීමට යුරෝපයෙන් පැමිණි දුත පිරිස ශ්‍රී ලංකාවේ වර්තමාන තත්වය කෙරෙහි සෑහීමකට පත්වන බව අධිකරණ අමාත්‍යාංශය පවසයි.

සැප්තැම්බර් 27 වැනි සඳුදා දිවයිනට පැමිණ ඔක්තෝබර් පස්වැනිදා දක්වා ශ්‍රී ලංකාවේ රැඳී සිටිමින් ආණ්ඩුවේ, දේශපාලන පක්ෂ, වෘත්තීය සමිතිවල, සිවිල් සමාජයේ, සේවායෝජකයන්ගේ නියෝජිතයන් මෙන්ම එක්සත් ජාතීන්ගේ ආයතනද මුණගැසී සාකච්ඡා කිරීමට නියමිතයව සිටින යුරෝපා සංගමයේ ඉහල පෙලේ දූත මණ්ඩලය “යහපත් ප්‍රතිචාරයක්” දැක්වු බව අධිකරණ අමාත්‍යාංශය නිවේදනය කර ඇත්තේ සැප්තැම්බර් 28 වැනි අගහරුවාදාය.

අධිකරණ අමාත්‍යාංශයේ මාධ්‍ය ලේකම් චමිල විජේසේකර නිකුත් කළ නිවේදනයක දැක්වෙන පරිදි අධිකරණ අමාත්‍ය ජනාධිපති නීතිඥ අලි සබ්රි සැප්තැම්බර් 28 අගහරුවාදා පෙරවරුවේ සිය අමාත්‍යාංශ ශ්‍රවණාගාරයේදී යුරෝපා සංගම් නියෝජිතයන් මුණ ගැසී සාකච්ඡා පවත්වා තිබේ.

එහිදි අධිකරණ අමාත්‍යවරයා විසින් වර්තමානයේ අධිකරණ ක්ෂේත්‍රයේ සිදු කෙරෙන නීති ප්‍රතිසම්පාදනය, අධිකරණ පද්ධතිය ඩිජිටල්කරණය කිරීම නඩු කටයුතු කඩිනමින් විසඳීම සඳහා අවශ්‍ය යටිතල පහසුකම් දියුණූකිරීම මෙන්ම අධිකරණ ශාලා වැඩිකිරීමත් ඊට සමගාමීව විනිසුරුවන් වැඩිකිරීම, ව්‍යවස්ථා සංශෝධනය ආදී කරුණු සම්බන්ධයෙන් එහි සාධනීය තත්වය පිළිබඳව යුරෝපා සංගමයේ නිලධාරීන් දැනුවත් කළ බව අධිකරණ අමාත්‍යාංශය පවසයි.

“ඉන් අනතුරුව යුරෝපා සංගමයේ නිලධාරීන් මෙරට තුළ පවතින වත්මන් තත්වය හා රජය විසින් ගෙනයන වැඩපිළිවෙලෙහි ප්‍රගතිය පිළිබඳ යහපත් ප්‍රතිචාරයක් දැක්වූ අතර, ශ්‍රී ලංකාවේ වර්තමාන තත්වය කෙරෙහි සෑහීමකට පත්වන බවත් ඉදිරියට ලබාදිය හැකි සියලු සහන සම්බන්ධයෙන් ධනාත්මකව සලකා බලා කටයුතු කරන බවත් සඳහන් කරන ලදී,” යි මාධ්‍ය ලේකම් චමිල විජේසේකර නිකුත් කළ නිවේදනයේ වැඩි දුරටත් සදහන්ය.

බදු නොගෙවා යුරෝපා වෙළඳපොලේ භාණ්ඩ අලෙවියට GSP+ සහනය හරහා ශ්‍රී ලංකාවට ලබාදී තිබූ වාසිදායක තත්වය අහිමි වීමේ අනතුරට ශ්‍රී ලංකාව මුහුණ දුන්නේ ත්‍රස්තවාදය වැළක්වීමේ පනත ක්‍රියාවේ යෙදවීම ඇතුළු මානව විරෝධී කටයුතු දිගටම සිදුකරන බවට එල්ල වු චෝදනා හේතුවෙනි.

එහෙත් අධිකරණ අමාත්‍ය වරයා සහ යුරෝපා සංගමයේ නියෝජිතයන් අතර සිදුවු සාකච්ඡාවේදී ත්‍රස්තවාදය වැළක්වීමේ පනත සම්බන්ධයෙන් එකදු වචනයක් හෝ සාකච්ඡා වු බවක් අධිකරණ අමාත්‍යාංශය නිවේදනයේ සඳහන්ව නැත.

බෙල්ජියමේ බ්‍රසල්ස් නුවර පිහිටා ඇති යුරෝපා පාර්ලිමේන්තුවේදී 2021 ජූනි 10 බ්‍රහස්පතින්දා ලංකාවට අවාසි සහගත ලෙස සම්මත කරගන්නා ලද යෝජනාව ත්‍රස්තවාදය වැළැක්වීමේ බියකරු පනත යටතේ සිදුවෙමින් පවතින අත්තනෝමතික අත්අඩංගුවට ගැනීම් කෙරේ විශේෂ අවධානයක් යොමුකර තිබුනි.

ශ්‍රී ලංකාව එකඟ වී ඇති මානව හිමිකම් පිලිබඳ වගකීම් ඉටුකර නැති බව ඔප්පු වුවහොත්, දැනට ලබාදී ඇති GSP+ සහනය හෙවත් වරණීය බදු ක්‍රමය යටත් ලබාදී ඇති සහන අත්හිටුවන ලෙස යුරෝපා පාර්ලිමේන්තුව විසින් යුරෝපා කොමිසමෙන් දැඩි ලෙස ඉල්ලා තිබේ.

යුරෝපා වෙළෙඳාම සහ තිරසාර සංවර්ධනය පිළිබඳ ජ්‍යෙෂ්ඨ උපදේශක නිකොලාස් සයමිස්, යුරෝපා විදේශ ක්‍රියාකාරී සේවයේ (EEAS) දකුණු ආසියා කලාපීය ප්‍රධානී අයෝනිස් ජියෝගරාකිස්-ආර්ජිරෝපොලෝස්, GSP වෙළෙඳ වරණය පිළිබඳ සම්බන්ධීකාරක ගුයිඩෝ ඩෝරා, රැකියා, සමාජ කටයුතු සහ අන්තර්ග්‍රහණය පිළිබඳ අධ්‍යක්ෂ ජනරාල් කාර්යාලයේ ප්‍රධානී ලුයිස් ප්‍රාට්ස් සහ ශ්‍රී ලංකාව හා මාලදිවයින සම්බන්ධ EEAS නිලධාරිනී මොනිකා බයිලයිටේ ගෙන් සමන්විත දුත පිරිස දිවයිනට පැමිණ සිටින්නේ ඒ සම්බන්ධයෙන් විමර්ශනයක් පැවැත්වීම වෙනුවෙනි.

GSP+ සහනය නැවත සලකා බැලීමට නියමිත මේ වසරේ නොවැම්බරයේදී යුරෝපා හවුල විසින් ශ්‍රී ලංකාවේ මානව හිමිකම් වාර්තා දැඩි ලෙස විමර්ශනය කරනු ඇති අතර, එහිදී සුළු ජාතීන්ගේත්, කම්කරුවන්ගේත් අයිතිවාසිකම් රැකීම ඇතුළු ජාත්‍යන්තර මානව හිමිකම් වගකීම් ක්‍රියාවට නංවා ඇති ආකාරයද සැලකිල්ලට ගනු ඇත.

Facebook Comments

wedding people