හිටපු ජනපති පෙරටු කර ගත් ඒකාබද්ධ විපක්ෂය ප්‍රමුඛ දේශපාලන බලවේග ව්‍යවස්ථා සම්පාදනයට එරෙහි වීම මල්වතු අනුනාහිමි නමක් විසින් හිටපු ආරක්ෂක ලේකම්වරයා හමුවේ දෝෂ දර්ශනයට ලක් කරන ලදී.
එම බලවේග විසින් සිදු කරන ව්‍යවස්ථා විරෝධය “හිතේ මවාගත් එකක්” සම්බන්ධයෙන් මතුකරන නොමනා විරෝධයක් බවයි අනුනායක දිඹුල්කුඹුරේ විමලධම්ම හිමියන් පෙන්වා දෙන්නේ.
තවමත් කෙටුම්පත් කොට නැති අලුත් ආණ්ඩු ක්‍රම ව්‍යවස්ථාවට එරෙහිව මහින්ද රාජපක්ෂ ඇතුළු ආණ්ඩු විරෝධී කණ්ඩායම කරන උද්ඝෝෂණය එහිමියන් විසින් හඳුන්වනු ලැබුවේ “බඩේ ඉන්න දරුවාට කේන්දර හැදීමක්” ලෙසිනි.
“දැන් අපේ සම්මත කරන්න එන පනත ගැන උද්ඝෝෂණය කරනවා. නමුත් ඒ පනත ගැන කිසිම ලියවිල්ලක් මොකක්වත් නෑ. නැති එකක් ගැන අර බඩේ ඉන්න දරුවාට කේන්දර හදන්න බෑනේ. ඒක වැරදියි .” යි උන්වහන්සේ කියා සිටි.
ත්‍රෛනිකායික මහනාහිමියන් ප්‍රමුඛව තමන්ද ඇතුලත් සංඝ නියෝජිත මණ්ඩලයක් අලුතින් ව්‍යවස්ථාවක් සම්පාදනය කිරීමට විරෝධය පා ජනාධිපතිවරයා හමුවූ දිනට පසුදා මල්වතු-අස්ගිරි නාහිමි වරුන් බැහැ දැකීමට හිටපු ආරක්ෂක ලේකම් ගෝඨාභය රාජපක්ෂ මහනුවරට ගිය අවස්ථාවේ අනුනායක දිඹුල්කුඹුරේ විමලධම්ම හි මේ බව පැවසුහ.
හිටපු ජනාධිපතිවරයා ඇතුළු කණ්ඩායම “අනවශ්‍ය හිතේ මවා ගත්තු දේවල් ගැනත් අනිසි විදියට උද්ඝෝෂණය කරනවා,” යි අනුනාහිමියෝ චෝදනා කළේය.
Facebook Comments
