ත්‍රස්ත පනත යටතේ සිරගතකර සිටින දෙමළ දේශපාලන සිරකරුවන් දීපාවලියේදී මෙන්ම එළඹෙන තෛපොංගල් උත්සවයේදී ද නිදහස් කරන බවට ජනාධිපතිවරයා දෙමළ පක්‍ෂ නායකයන්ට පොරොන්දු වී තිබේ.
දෙමළ ප්‍රගතිශීලි සංධානයේ නායක, පාර්ලිමේන්තු මන්ත්‍රී මනෝ ගනේෂන් පවසන්නේ ජනාධිපති රනිල් වික්‍රමසිංහගේ ප්‍රධානත්වයෙන් ජනාධිපති ලේකම් කාර්යාලයේ පැවති දීපාවලි සැමරුම් උත්සවයෙන් අනතුරුව පැවති කතා බහේදී එම පොරොන්දුව ලබා දුන් බවයි.
“දෙමළ දේශපාලන සිරකරුවන් ගැන අහද්දී ජනාධිපතිතුමා කිව්වා තෛපොංගල්වලටත් කට්ටියක් පොදු සමාව යටතේ නිදහස් කරන්න සැලසුම් කරනවා කියලා.ඒ වගේම කොළඹ නගරවාසීන් පොලිසියේ ලියාපදිංචි කිරීම අත්හැර දමන්නට නැවතත් පොලිස්පතිට කියන බවත් එතුමා පොරොන්දු වුණා.”
ජනාධිපති ලේකම් කාර්යාලයේ පැවති දීපාවලී උත්සවයට අගමැති දිනේෂ් ගුණවර්ධන, ධීවර ඇමැති ඩග්ලස් දේවානන්දා, කම්කරු ඇමැති මනුෂ නානායක්කාර සහ හිටපු පාර්ලිමේන්තු මන්ත්‍රී, ඇමතිවරයෙකු සහ ජනාධිපති කාර්ය මණ්ඩල ප්‍රධානී සාගල රත්නායක ඇතුළු පිරිසක් සහභාගි වුහ.
දීපාවලී උත්සවය වෙනුවෙන් ජනාධිපති පොදු සමාව ලබා දුන් බවට ආණ්ඩුව විසින් ප්‍රකාශයට පත් කරන ලද ත්‍රස්ත පනත යටතේ සිරගත කර සිටි දෙමළ දේශපාලන සිරකරුවන්ගෙන් අට දෙනාගෙන් අඩකගේ පූර්ණ නිදහසට කොන්දේසි පනවා ඇති බවට දෙමළ ජාතික සන්ධානයේ පාර්ලිමේන්තු මන්ත්‍රී චාර්ල්ස් නිර්මලනාදන් හෙළි කර තිබේ.
පාර්ලිමේන්තු මන්ත්‍රී නිර්මලනාදන් පෙන්වා දෙන්නේ ත්‍රස්ත පනත යටතේ අත්අඩංගුවට ගෙන 2000 වසරේ සිට සිරගත කර සිටින දෙමළ දේශපාලන සිරකරුවෙකු වන රගුපති ශර්මා සහ වේලායුදන් වර්ධරාජන් ඔවුන්ට සිරදඩුවම් ලබා දීමට එරෙහිව ගොනු කළ මුලික අයිතිවාසිකම් පෙත්සම් ඉවත් කර නොගතහොත් සම්පුර්ණ නිදහස සහතික කළ නොහැකි බවට දන්වා ඇති බවයි.
සුදා හා කාන්තන් යන අනෙක් දේශපාලන සිරකරුවන් දෙදෙනා සිර දඩුවමට යටත් කොට පුනරුත්ථාපනය කළ යුතු බවට අධිකරණය මගින් නියම කර තිබේ.
මොවුන් දෙදෙනා පුනරුත්ථාපනයට යොමු කරනවා ද නැතහොත් නිදහස් කරනවා ද යන්න ජනධිපති ලේකම් කාර්යාලය විසින් බන්ධනාගාරයට දැනුම් දිය යුතුව ඇතැයි මන්ත්‍රීවරයා සඳහන් කරයි.
මේ අනුව ඔක්තෝබර් 22 වැනිදා සම්පුර්ණ නිදහස ලබා සිය නිවෙස් කරා යාමට ඉඩ ලැබී ඇත්තේ ත්‍රස්ත පනත යටතේ අත්අඩංගුවට ගෙන වසර 23 ක් සිරගත කර සිටි වවුනියාවේ සතිවේල් ඉලන්ගේශ්වරන් ඇතුළු වසර 15 කට වැඩි කලක් සිරගත කර සිටී මඩකලපුවේ වීරකුමාර් රාහුලන්, මන්නාරමේ ජෙබ නේසන් සහ වත්තල රාමනාදන් නවාදීපන් නම් දේශපාලන සිරකරුවන් සිව් දෙනාට පමණි.
ජාතීන් අතර සංහිදියාව ගොඩනැගීමට අවංක උවමනාවක් ඇත්නම් කැබිනට් මණ්ඩලය හා නීතිපති දෙපාර්තමේන්තුව එකඟතාවකට පැමිණ සියළුම දේශපාලන සිරකරුවන්ට එරෙහිව පවරා ඇති නඩු ඉල්ලා අස්කරගෙන ඔවුන් නිදහස් කළ හැකි බවට දේශපාලන සිරකරුවන් මුදාගැනීමේ ජාතික සංවිධානය නිවේදනයක් නිකුත් කරමින් අවධාරණය කර තිබේ.
එම සංවිධානයේ සම්බන්ධිකාරක මාරිමුත්තු සතිවේල් පියතුමා චෝදනා කරන්නේ වැරදිකරුවන්ට පොදු සමාව ලබා දීමේ ජනාධිපතිට ඇති හැකියාව ගැන කියමින්, අධිකරණයෙන් දඩුවම් ලැබූවන්ට ජනාධිපති පොදු සමාව යටතේ නිදහස ලබා දී ඇතැයි ප්‍රසිද්ධියේ පැවසීම මගින් දේශපාලන සිරකරුවන් තවත් දඩුවමකට යටත් කොට ඇති බවයි.
“උසාවියෙන් වරදකරු කර, ජනාධිපති සමාව ඉල්ලා සිටීම සඳහා දෙමළ නායකයන් එම ප්‍රකාශයම පුනරුච්චාරණය කිරීම දේශපාලන සිරකරුවන් ප්‍රසිද්ධියේ අපරාධකරුවන් ලෙස හුවා දැක්වීමක් වෙනවා. ඒ නිසා කැබිනට් මණ්ඩලයයි නීතිපති දෙපාර්තමේන්තුවයි කතා කරලා දේශපාලන සිරකරුවන්ට ගොනු කරලා තියෙන නඩු ඉල්ලා අස්කරගන්න කියලා ජනාධිපතිට ඉල්ලීම් කරන්න ඕනෑ. ඒක දේශපාලන සිරකරුවන්ට ගෞරවයක් වගේම වාර්ගික සංහිදියාවටත් රුකුලක්,” යැයි සතිවේල් පියතුමා පෙන්වාදී ඇත.
Facebook Comments
