අට අවුරුද්දකට ඉහතදී නාවික හමුදාව විසින් කොළඹ සහ තදාසන්න ප්‍රදේශ වලින් 11 දෙනකු පැහැරගෙන ගොස් අතුරුදහන් කිරීම සම්බන්ධයෙන් හිටපු නාවික හමුදාපති වසන්ත කරන්නාගොඩ හට අවබෝධයක් සහ දැනීමක් තිබු බව අපරාධ පරීක්ෂණ දෙපාර්තුමේන්තුව අධිකරණයට දන්වා ඇත.
මෙම සිද්ධියට අදාළව හිටපු නාවික හමුදාපතිවරයා පැමිණිල්ල කරනු ලබන අවස්ථාවේ සිටම අතුරුදහන් කිරිමේ සිද්ධිය සම්බන්ධ අපරාධය පිළිබඳව අවබෝධයක් තිබු බවට විමර්ශන වලදී අනාවරණය වු බව 08 බ්‍රහස්පතින්දා නඩුව කැඳවු අවස්ථාවේදී රහස් පොලිසිය කොළඹ කොටුව මහේස්ත්‍රාත් ලංකා ජයරත්න වෙත දැනුම් දී තිබේ.
ලුතිනන් කමාන්ඩර් චන්දන ප්‍රසාද් හෙට්ටිආරච්චි විශේෂ රාජකාරි සඳහා පත් කිරිම, මෙම ඒකකයට 54-9238 අංක දරන වාහනය ලබා දීම, පැහැරගත් පිරිස් චෛත්‍ය පාරේ පිට්ටු බම්බු තුළ හ‍ා ගන් සයිඩ් භූගත බංකාරයේ රඳවා ගෙන සිටීම මෙන්ම ඔවුන් ඝාතනය කිරිම, සුමිත් රණසිංහ සහ ඩී.කේ.පී දසනායක ඊට වගකිව යුතු පාර්ශවකරුවන් බව හිටපු නාවික හමුදාපති වසන්ත කරන්නාගොඩ දැන සිටි බව රහස් පොලිසිය අධිකරණයට ඉදිරිපත් කල බී වාර්තාවේ සඳහන් වෙයි.
හිටපු නාවික හමුදාපතිවරයා මෙම අපරාධයේ වගකීම පලමු සැකකරුට කේන්ද්‍ර වන පරිදි කටයුතු කර ඇති බව නිරික්ෂණය වන බව අපරාධ පරික්ෂණ දෙපාර්තුමේන්තුවේ සමුහ මංකොල්ල විමර්ශන අංශයේ ස්ථානාධිපති පොලිස් පරික්ෂක නිශාන්ත සිල්වා සිය වාර්තාව මඟින් අධිකරණයට දැනුම් දී ඇත.
මෙම පරික්ෂණ වලින් රහස් පොලිසය ඉවත් කරන ලෙස විත්ති පාර්ශවය සිය ලිඛිත දේශන වලින් ඉල්ලා සිටියද නීතිපතිවරයා වෙනුවෙන් පෙනී සිටි ජේෂ්ඨ නිතිඥවරයා වාචිකව එම ඉල්ලීම ප්‍රතික්ෂේප කරන ලදී.
රජිව් නාගනාදන්, ප්‍රදීප් විශ්වනාදන්, ඩිලාන් මොහොමඩ්, මොහොමඩ් සජිත්, තිලකේෂ්වරම් රාමලිංගම්, තාග්‍යරාජා ප්‍රභාකරන්, සුසේයි පුල්ලේ අමලන් ලියෝන්, සුසෙයි පුල්ලේ රෝෂාන් ලියෝන්, කස්තුරි ආරච්චිලාගේ ජෝන් රීඩ්, කස්තුරි ආරච්චිලාගේ ඇන්ටනි සහ අලි අන්වර් 2008-2009 කාල වකවානුවේදී කොළඹ සහ තදාසන්න ප්‍රදේශ වලින් පැහැරගෙන ගොස් අතුරුදහන් කර තිබේ.
හිටපු නාවික හමුදා ප්‍රකාශක කොමදෝරු ඩී කේ පී දසනායක, ලුතිනන් කොමදෝරු සම්පත් නිලන්ත මුණසිංහ හෙවත් නේවි සම්පත්, ලුතිනන් කොමදෝරු රණසිංහ පේඩිගේ සුමිත් රණසිංහ, තිලකරත්නගේ ලක්ෂ්මන් උදය කුමාර, කාරියවසම් ගම්හේවගේ නලින් ප්‍රසන්න වික්‍රමසූරිය, තම්මිට ඉහළගෙදර ධර්මදාස සහ රාජපක්ෂ පතිරණගේ කිත්සිරි සිද්ධියට සැක පිට අත්අඩංගුවට ගෙන ඇප ලබා සිටිති.
සිද්ධියේ සැකකාර ලුතිනන් කමාන්ඩර් හෙට්ටිආරච්චි අවුරුද්දකට වැඩි කාලයක් අධිකරණය මඟි හරිමින් සිටින අතර ඔහු අත්අඩංගුවට ගැනීමට වරෙන්තු නිකුත් කර ඇති අතර මෙවර ඔහුගේ විදෙස් ගමන් අත්හිටුවමින් ආගමන විගමන පාලන ජනරාල්වරයා වෙත නියෝගයක් නිකුත් කරනු ලැබීය.
Facebook Comments
