තිරසර සංවර්ධන ඉලක්ක සහ සහස‍්‍ර සංවර්ධන ඉලක්ක සපුරාගත් ප‍්‍රබුද්ධ රාජ්‍යයක් ලෙස අප ඉදිරියට යා යුතු බව මෙන්ම රටක් ලෙස ද නැඟී සිටීමට ආකල්පමය වෙනසක් අත්‍යාවශ්‍ය බව ජනාධිපතිවරයා පවසනවා.
අප කළ යුත්තේ විවේචන සහ චෝදනාවලට පිළිතුරු බඳිමින් ඒවා පසුපස යාම නොව රටේ සහ ජාතියේ අනාගතය සඳහා වූ පොදු ඉලක්ක සහ අරමුණු වෙනුවෙන් සාමුහිකව කටයුතු කිරීම බවට ජනාධිපති මෛත්රීපාල සිරිසේන කියා සිටියේ ඊයේ (31) කොළඹ බණ්ඩාරනායක ජාත්‍යන්තර සම්මන්ත‍්‍රණ ශාලාවේදී පැවැත්වෙන ‘තිරසර ලංකා’ ජාතික මංගල්‍යයේ සමාරම්භක උත්සවයට එක්වෙමිනි.
ස්වඋත්සාහයෙන් නැගී සිටීම සංවර්ධනයේ මූලික පදනම බව මෙහිදී පැවසූ ජනාධිපතිවරයා ලෝකයේ සෑම රටක්ම අද සංවර්ධන ඉලක්ක කරා ගමන් කර ඇත්තේ ස්ව උත්සාහයෙන් සහ ස්වඅභිමානයෙන් කටයුතු කිරීම තුළින් බවද කියා සිටියේය.
ජනාධිපති මෛත්රීපාල සිරිසේනගේ සංකල්පයක් අනුව ක්‍රියාත්මක වන වස විස නැති රටක් තුන් අවුරුදු සැලැස්මට සහ එක්සත් ජාතීන්ගේ සංවිධානය විසින් තිරසර සංවර්ධනය සඳහා ප‍්‍රකාශයට පත් කර ඇති තිරසර සංවර්ධන ඉලක්කවලට සමගාමීව ‘තිරසර ලංකා’ ජාතික මංගල්‍යය (31) සිට අප්‍රියෙල් 04 දක්වා බණ්ඩාරනායක ජාත්‍යන්තර සම්මන්ත‍්‍රණ ශාලා පරිශ‍්‍රයේ දී පැවැත්වේ.
2015 වසරේ සැප්තැම්බර් මාසයේ පැවති එක්සත් ජාතීන්ගේ තිරසර සංවර්ධනය පිළිබඳ මහා සමුළුවේදී ප‍්‍රකාශයට පත්කෙරුණු තිරසර සංවර්ධන ඉලක්ක ආමන්ත‍්‍රණය කෙරෙන දුප්පත්කම, ගොවිතැන, සෞඛ්‍ය, අධ්‍යාපනය, කාන්තාවන්ට සැලකීම, ජලය, බලශක්තිය, රැකියා, කර්මාන්ත, ඇති නැති පරතරය, ජනාවාස, පරිභෝජනය, දේශගුණික විපර්යාසය, සාගර, ජෛව විවිධත්වය, සාමය සහ පොදු වැඩපිළිවෙළක් සැකසීම යන ක්ෂේත‍්‍ර ආවරණය වන පරිදි තිරසර ලංකා ජාතික මංගල්‍යය පැවැත්වෙන බවයි එහි සංවිධායකයින් පවසන්නේ.
Facebook Comments
