සිය මාමණ්ඩිය සතු විජය පුවත්පත් ආයතනය වුවද තමන්ට පහර දෙන්නේ නම් ප්‍රතිප්‍රහාර දීමට නොපැකිලෙන බව අගමැතිවරයා පාර්ලිමේන්තුවේ කියා සිටියේය.
අගමැතිවරයා ප්‍රකාශ කළේ විජය ආයතනය විසින් පල කරන ඩේලි මිරර් පුවත්පත තමන්ට පහර එල්ල කරන්නේ තමන් ජාතිවාදියකු නොවන නිසා බවයි.
මහින්ද රාජපක්ෂ පාලන සමයේ ඔහු වෙනුවෙන් ‘මේ මාධ්‍ය කඩේ ගියා’ යි චෝදනා කළ අගමැති වික්‍රමසිංහ “මටත් ඉල්ලා අස්වෙන්න කීව මම ජාතිවාදියෙක් නොවන නිසා,” යි පැවසීය.
එහෙත් එම ඉල්ලීම ජනතාව ප්‍රතික්ෂේප කොට ඇති බව අගමැතිවරයා සඳහන් කළේය.
රනිල් වික්‍රමසිංහගේ මෑණියන්ගේ දෙටු සොයුරු රංජිත් විජේවර්ධන විසින් පවත්වාගෙන යනු ලබන ලංකාදීප යේ සහෝදර පුවත්පත වන ඩේලි මිරර් විසින් අගමැති වරයාට එල්ල කරන ලද මෑත විවේචනය වුනේ මන්ත්‍රී දීමනාව රුපියල් ලක්ෂයකින් වැඩි කිරීමට පාර්ලිමේන්තුවේ ඉදිරිපත් වූ යෝජනාවක් සම්බන්ධයෙනි.
තමන්ට දීමනා වැඩි කිරීමට ඉල්ලා සිටින මාධ්‍යවේදීන් මන්ත්‍රී දීමනා වැඩි කිරීමට විරුද්ධවන්නේ මන්දැයි අගමැති වරයා 28 සඳුදා පෙරලා ප්‍රශ්න කළේ ජනමාධ්‍ය අමාත්‍යාංශයේ අයවැය කාරක සභා අවස්ථාවේ විවාදයට එක් වෙමිනි.
එක්සත් ජාතික පක්ෂය සහ ශ්‍රී ලංකා නිදහස් පක්ෂය යන දෙකේම ආණ්ඩු මාධ්‍ය මර්දනයේ යෙදුනු බව සඳහන් කළ ඔහු මාධ්‍ය ආයතනවලට ගිනි තැබීමට, මාධ්‍යවේදීන් පැහැරගෙන යාමට, හමුදාව යොදවා මාධ්‍යවේදීන්ට පහරදීමට, මාධ්‍යවේදීන් ඝාතනය කිරිමට තමාට හෝ ජනපතිවරයාට අවශ්‍ය නොවන නුමුත් ප්‍රසිද්ධියේ තම විවේචනය ඉදිරිපත් කරන බව දන්වා සිටියේය.
(Radio gagana)
Facebook Comments
