වසංගතය නැග එද්දී ජනපතිගේ පරස්පර කතා වැඩිවෙයි (VIDEO)

0

පළමු වටයේ කොරෝනා පීඩිතයන්ගේ සංඛ්‍යාව පාලනය කර ගැනීමේ ගෞරවය භාරගත් ජනාධිපතිවරයා දෙවැනි වසංගත රැල්ල පුපුරා යාම සම්බන්ධයෙන් මහජනතාවට දොස් පවරා තිබේ.

“දැන් මේක අපි ආණ්ඩුවෙන් දාපු වෛරස් එකක් නෙමෙයිනේ. ලෝකෙටම බලපාපු සෞඛ්‍ය ප්‍රශ්නයක්. එතකොට මේකෙදී ජනතාවට ලොකු වගකීමක් තියනවා. දැන් පැහැදිලිවම ඒ වගකීම කරේ නැති හින්දනේ මේ වගේ තත්වෙකට අපිට මුහුණ දෙන්න සිද්ධ උනේ.”

ජනාධිපති ගෝඨාභය රාජපක්ෂ එසේ පවසා තිබුනේ කෝවිඩ් මර්දන ජනාධිපති කාර්ය සාධක බලකායේ සාමාජිකයන් සමග නොවැම්බර් 1 ඉරිදා ජනාධිපති කාර්යාලයේ පැවති සාකච්ඡාවක දීය.

“මේ හැම අවස්ථාවකම අපි ඉතා වගකීමක් සහිතව රජයක් හැටියට මේ කාරිය කරා. ඒ හින්දා ඒ අවස්තාවලදී අපිට නියම පියවර ගන්න හැකි වුණා,” යි පළමු වසංගත රැල්ලේදී ජනාධිපතිවරයා උදම් අනා තිබුණි.

ජනපතිගේ සෞඛ්‍ය උපදෙස්

කොරෝනා රෝගාබාධිතයැයි සැක සහිත පුද්ගලයන්ට නිසි ක්‍රමවේදය අනුගමනය කර වහාම රෝහල් ගත වන ලෙස පළමු වටයේ උපදෙස් ලබා දී තිබු ජනාධිපතිවරයා මෙම සාකච්ඡාවේදී නියෝග ලබා දී තිබුනේ රෝග ලක්ෂණ සහිත පුද්ගලයන් රෝහල් ගත වීම වළක්වා නිවෙස් නිරෝධායනයට යොමු කරන ලෙසයි.

“දැන් මේක වැරදියි. මෙහෙම ඉස්පිරිතාලෙට යන්න ගියොත් මුල ඉදලා එයා ත්‍රීවිලර් එකක යයි. බස් එකක යයි. කාර් එකේ යයි. ගිහිල්ලා හොස්පිටල් ගිහිල්ලා ඕපීඩි ඉඳලා මේ සිස්ටම් එක අපි නවත්වන්න.”

පුද්ගලයන් නිරෝධායන මධ්‍යස්ථාන වෙත ගෙන යාම වෙනුවට තම නිවෙස් තුළම නිරෝධායනයට රජය ගත් පියවර සාර්ථක ප්‍රතිඵල ගෙන දෙමින් තිබන බැවින් එම ක්‍රියාවලිය තවදුරටත් විධිමත් කිරීම සඳහා සෞඛ්‍ය වෛද්‍ය නිලධාරී, මහජන සෞඛ්‍ය පරීක්ෂක, පොලීසීය සහ යුද හමුදාව යන අංශවල අධීක්ෂණයට නිරන්තරයෙන් ලක් විය යුතු බව ජනාධිපතිවරයා එහිදී පැවසු බව ජනාධිපති මාධ්‍ය ඒකකය නිවේදනය කර තිබේ.

නිවෙස්වල නිරෝධායනය වන පුද්ගලයන්ගේ PCR පරීක්ෂණ 10 වැනි දිනයේ දී කළ යුතු අතර ප්‍රතිඵල අනුව ආසාදනයට ලක් නොවූවන් දින 14කට පසු සාමාන්‍ය ජන ජීවිතයට යොමු කරන්නැයි ජනාධිපතිතුමා සෞඛ්‍ය බලධාරීන්ට නියම කළ බව ජනාධිපති මාධ්‍ය ඒකකය වැඩි දුරටත් සදහන් කරයි.

රජයේ ප්‍රවෘත්ති දෙපාර්තමේන්තුව නිවේදනය කර තිබෙන පරිදි නොවැම්බර් 2 සදුදා පස්වරු හයයි තිහ වන විට ශ්‍රී ලංකාවෙන් වාර්තා වී තිබෙන සමස්ත වෛරස් ආසාදිතයන් ගණන 11224 කි.

ඒ අතරින් 5243 ක් ප්‍රතිකාර ලබා රෝහල් වලින් පිටව ගොස් තිබෙන අතර තවත් රෝගීන් 5935 ක් රෝහල් වල ප්‍රතිකාර ලබමින් සිටි.

2020 නොවැම්බර් 2 වැනිදා වන විට දිවුලපිටිය බ්‍රැන්ඩික්ස් හා පෑලියගොඩ කෝවිඩ් පොකුරින් වාර්තා වී ඇති සමස්ත ආසාදිතයන් ගණන 7746 කි.

ඒ සැමත්, සකල ලක්වාසීනුත් වසංගතයෙන් ගලවා ගැනීම පිණිස සෞඛ්‍ය ඇමතිනි ඇතුළු රජයේ මැති ඇමතිවරුන් වතුර කළ හතරක් ගංගාවලට දමා ඇත.

Facebook Comments

wedding people