මුලතිව් දිස්ත්‍රික්කයේ නීතිවිරෝධී තේක්ක දැව ජාවාරමක් පිළිබඳව ගවේෂණය කරමින් සිටි දෙමළ මාධ්‍යවේදීන් දෙදෙනෙකුට පහර දීමේ චෝදනාව මත අත්අඩංගුවට ගත් දෙදෙනා අතරට, ශ්‍රී ලාංකික සම්භවයක් සහිත නෝර්වේජියානු පුරවැසියකුද ඇතුලත් ව සිටී.
ඔස්ලෝ සිට පැමිණි 25 හැවිරිදි තිශාන්තන් රාජේන්ද්‍රන් රක්ෂිත බන්ධනාගාරගත කරන ලෙස මුලතිව් දිසා විනිසුරු එස්. ලෙනින්කුමාර් නියෝග කර ඇත.
කනපතිපිල්ලෙයි කුමනන් සහ ශන්මුගම් තවසීලන් යන මාධ්‍යවේදීන් දෙදෙනාට අමානුෂික ලෙස පහර දීම, ඔවුන්ට මරණ තර්ජන එල්ල කිරීම හා වන රක්ෂිතය තුළ නීතිවිරෝධී දැව ජාවාරම සම්බන්ධයෙන් වන වීඩියෝ සාක්ෂි ඉවත් කිරීම යන චෝදනා ඔහුටත් තව තිදෙනකුටත් විරුද්ධව එල්ල වී තිබේ.
පොලීසියට තවමත් හැකිවී ඇත්තේ අනූෂන් සහ රාජේන්ද්‍රන් යන ප්‍රධාන සැකකරුවන් අත්අඩංගුවට ගැනීමට පමණි.
පොලීසිය නිසි ලෙස ක්‍රියාත්මක නොවීම හේතුවෙන් තම ජීවිත වලට සැබෑ තර්ජනයක් ඇති වේ යැයි පහර කෑමට ලක්වු මාධ්‍යවේදීන් දෙදෙනා බියෙන් පසු වෙති.
ප්‍රහාරයට සම්බන්ධ අනෙක් දෙදෙනාද අත්අඩංගුවට ගන්නා ලෙස ඉල්ලමින්, පසුගිය ඔක්තෝම්බර් 15 දින මුලතිව් නගරයේ දී විරෝධතා පෙළපාලියක්, උතුරේ දෙමළ මාධ්‍යවේදීන් විසින් සංවිධානය කර තිබුනි.
සටන් පාඨ සහිත පුවරු වලට අමතරව, වනාන්තර විනාශය සංකේතවත් කිරීමට වියලි ඉපල් ද ඔවුන් විසින් ඔසවාගෙන යන ලදී.
නීති විරෝධී දැව ජාවාරමට සම්බන්ධ යැයි චෝදනා ලැබ සිටින පොලිස් සහ වන සංරක්ෂණ නිලධාරීන්ට විරුද්ධව ක්‍රියාමාර්ග ගන්නා ලෙසටත් විරෝධතාවය දියත් කළ මාධ්‍යවේදීහු එහිදී ඉල්ලා සිටියහ.
ඔවුන්ගේ ඉල්ලීම් ලිඛිතව, දිසාපතිනියට, වන සංරක්ෂණ බලධාරීන්ට සහ පොලීසියට භාර දෙන ලදී.
එහිදී දිසාපති සහ පොලීසියට තේක්ක පැළ තෑගි කළ මාධ්‍යවේදීන් එක් පැළයක් මුලතිව් දිස්ත්‍රික් වන සංරක්ෂණ කාර්යාලය ඉදිරිපිට රෝපනය කරන ලදී.
විරෝධතාකරුවන් හමු වූ සහකාර පොලිස් අධිකාරී රුවන් කුමාරසේකර විසින් එදින කලුවර වැටීමට ප්‍රථම අනෙක් සැක කරුවන් දෙදෙනා අත්අඩංගුවට ගැනීමට පොරොන්දු වු නමුත් තවමත් ඔවුන් නිදහසේ සැරි සරයි.
අත්අඩංගුවේ පසුවන දෙදෙනා, ප්‍රාදේශීය බීට්ටු වන නිලධාරියා සහ පාලක පක්ෂ දේශපාලනඥයෙකු සමඟ පෙනී සිටි ඡායාරූප සමාජ මාධ්‍ය ඔස්සේ සංසරණය වීමත් සමඟ, නීති විරෝධී දැව ජාවාරම්කරුවන්ට ශක්තිමත් දේශපාලන පිටු බලයක් ඇති බවට සැකයක් මතු වී තිබේ.
චූදිතයන් වෙනුවෙන් පෙනී සිටි නීතිඥ ඇන්ටන් පුනිත්නායගම්, කේ. කනේස්වරන්, තච්චනමූර්ති ගංගාධරන්, එම්. ඒ. නිම්සාත් සහ පී. සුදර්ශන් තර්ක කර සිටියේ, මෙම මාධ්‍යවේදීන් විසින් පෞද්ගලික දේපලකට අනවසරයෙන් ඇතුල් වී ඇති බවයි.
ජාවාරම්කරුවන්ගේ පරිශ්‍රයට මාධ්‍යවේදීන් බලහත්කාරයෙන් ගෙන යන ලද අතර, සැකකරුවන් විසින් ඔවුන්ට අනවසරයෙන් ඇතුල් වීම සහ සොරකම් කිරීම යන චෝදනා නගමින් වීඩියෝ ගත කරන ලද බව මාධ්‍යවේදීන් දෙදෙනා වෙනුවෙන් පෙනී සිටි නීතිඥයන් විසින් අධිකරණයට දැනුම් දෙනු ලැබීය.
තවසීලන් සහ කුමනන් වෙනුවෙන් එස්. ධනංජයන්, කනගරත්නම් පාර්තීපන්, රුජිකා නිත්‍යානන්දරාසා සහ දුශ්‍යන්ති සිවකුමාර් යන නීතිඥයන් සහ නීතිඥවරියන් පෙනී සිටියහ.
මීලඟ නඩු දිනය ඔක්තෝම්බර් 20 වැනි දිනට යෙදී තිබේ.
Facebook Comments
