ශ්‍රී ලංකා ආරක්ෂක හමුදා පාලනය යටතේ පැවති අධි ආරක්ෂක කලාපයක් තුලදී මරා දමා දශක දෙකක් ගතවීත් යුක්තිය නොලද දෙමළ මාධ්‍යවේදියකු යාපනයේදී සමරා තිබේ.
වෙඩිල්ලෙන් නිහඬ කෙරුනු නිබය, සරල මාධ්‍යවේදියකු වූ නිමලරාජන් මයිල්වාගනම් මලින්, පහනින් ඔක්තෝබර් 19 සදුදා සමරා ඇත්තේ යාපනය මාධ්‍ය සමාජය විසිනි.
ගුණානුස්මරණය සදහා උතුරේ මාධ්‍යවේදීන් සමග විරුද්ධ පක්ෂයේ ප්‍රාදේශිය දේශපාලනඥයන් කිහිප දෙනකුත් එක්ව තිබේ.
විනාශකාරී යුද්ධයත්, එයින් පීඩා විඳින උතුරේ දෙමළ ජනකායත් පිළිබඳව යුද පීඩිත භූමියේ සිට දෙස් විදෙස් මාධ්‍ය ඔස්සේ ලෝකයේ අවධානය යොමු කිරීමට මාධ්‍යවේදි නිමලරාජන් මයිල්වාගනම්ට හැකිවිය.
හරය, බීබීසී සහ වීරකේසරී ඇතුළු ආයතන වෙත දෙමළ සිංහල දෙබසින්ම වාර්තා සැපයීමේ නිරත නිමලරාජන් 2000 ඔක්තෝබර් 19 රාත්‍රියේ යාපනයේ සිය නිවසේදී වෙඩි තබා මරා දමන ලද්දේ යුද පීඩිත ජනයා පිළිබඳව වීරකේසරී පුවත්පතට ලිපියක් ලියමින් සිටියදීය.
චන්ද්‍රිකා බණ්ඩාරනායක කුමාරතුංග පාලන සමයේ සිදුකළ එම ඝාතනය සම්බන්ධයෙන් අදත් යුක්තිය ඉටුවී නැත.
මයිල්වාගනම් නිමලරාජන්ට සිය නිවස තුලදී අත් බෝම්බ ගසා වෙඩිතබා ඝාතනය කිරීම සම්බන්ධයෙන් චෝදනා එල්ල වුනු රජය සමග එක්ව සිටි ඊපීඩීපී අතුරු හමුදා කල්ලි සාමාජිකයන් 2003 දී වව්නියාවේ අධිකරණය විසින් නිදහස් කර යවන ලදී.
එම ඝාතනය සම්බන්ධයෙන් සෘජුවම සැකකෙරෙන නැපෝලියන් යනුවෙන් ප්‍රකට සෙබස්තියන් පිල්ලේ රමේෂ් පොලිස් ප්‍රශ්න කිරීමකින් තොරවම රටින් පලාගොස් බ්‍රිතාන්‍යයේ රැකවරණ ලබා සිටින බව වාර්තාවේ.
චන්ද්‍රිකා පාලන සමයේ ප්‍රබල ඇමැතියකු වූ ඊපීඩීපී නායක ඩග්ලස් දේවානන්ද වර්තමාන රජයේද උතුර බාර අමාත්‍ය ධුරය හොබවයි.
දකුණේ කිසිදු මාධ්‍ය සංවිධානයක් නිමලරාජන් සැමරූ බවක් දැනගන්නට නැත.
Facebook Comments
