අතුරුදහන් වුවන්ගේ ඥාතීන් මාධ්‍යවේදීන් වෙනුවෙන් නැගී සිටී

0

යුද පීඩිත උතුරේ තොරතුරු සිංහලෙන් හා දෙමළෙන් ලොවට හෙළි කරමින් සිටි මාධ්‍යවේදියකු ඝාතනය කොට දශක දෙකක් ගතවීම අනුවේදනීය ලෙස අනුස්මරණය කළ අතුරුදහන් වුවන්ගේ නෑසියන් කැලෑ පාලුවන්ගේ මැර පහරින් තුවාල ලත් දෙමළ මාධ්‍යවේදීන් දෙදෙනකුට යුක්තිය ඉල්ලා විරෝධතාවක් පවත්වා තිබේ.

මුලතිව් හා වව්නියාව දිස්ත්‍රික්කයේ අතුරුදහන් වුවන්ගේ ඥාතීහු සිය සමීපතමයන් සොයා දෙන ලෙස ඉල්ලා රජයට බලකරන අඛණ්ඩ උද්ඝෝෂණයේ 1321 වැනි දිනය හා 1340 දිනයේත් එයින් විසි අවුරුද්දකට ඉහතදී මරා දමන ලද මයිල්වාගනම් නිමලරාජන් ගේ සේයාරුවකට මලින් පහනින් උපහාර දක්වා, වන විනාශයක් වාර්තා කරමින් සිටි ෂන්මුගම් තවසීලන් හා කනපතිපිල්ලේ කුමනන් හට පසුගිය සතියේ බරපතල ලෙස පහරදීමට වගකිවයුත්තන්ට එරෙහිව නීතිය ක්‍රියාත්මක කරන ලෙස ඉල්ලා සිටියහ.

“මාධ්‍යවේදීන්ට පහර දීම නවතනු, වන විනාශය අත් හිටවනු” යනුවෙන් ලියවුනු පුවරු මුලතිව් මෑණිවරුන් හා පියවරුන් විසින් ප්‍රදර්ශනය කරන ලදී.

අධි ආරක්ෂක කලාපයක් තුල නිමලරාජන් ඝාතනය කිරීම සම්බන්ධයෙන් මේතාක් කිසිවකුත් දඬුවම් ලබා නැති අතර වන රක්ෂිතයක් අසලදී කුමනන් හා තවසීලන්ට පහර දීම ගැන චෝදනා ලබන සිව් දෙනා අතරින් අත් අඩංගුවට ගෙන තිබෙන්නේ දෙදෙනකු පමණකි.

ඔවුන් රිමාන්ඩ් භාරයේ සිට අද අධිකරණය හමුවට ඉදිරිපත් කිරිමෙන් පසු නොවැම්බර් 03 වනදා දක්වා යළි රක්ෂිත බන්ධනාගාර ගත කර තිබේ.යුද හමුදාවට භාරවූ හෝ සුදු වෑන් රියෙන් පැහැරගෙන යනු ලැබූ හෝ සිය සමීපතමයන්ගේ ඉරණම විරෝධතාවයේ යෙදෙන ඥාතීන්ට කිසිවකුත් තවමත් හෙළි කර දී නැත.

Facebook Comments