මුස්ලිම්වරුන්ගේ ව්‍යපාර වර්ජනය කොට ඔවුන්ට ගල් ගසන ලෙසට අස්ගිරි මහනාහිමියන් කරන ලද අනුශාසනාවට මුස්ලිම්වරුන්ගේ විරෝධයක් එල්ල වී නැති බව අස්ගිරි මහා විහාරය කියා සිටී.
එමගින් උන්වහන්සේ මුස්ලිම් විරෝධියෙකු නොවන බවට තහවුරු වන බව පවසන අස්ගිරි පාර්ශවයේ නියෝජ්‍ය ලේඛකාධිකාරි නාරම්පනාවේ ආනන්ද හිමියෝ එවැනි පසුබිමක රාජ්‍ය නොවන සංවිධාන අස්ගිරි මහනාහිමියන්ගේ ප්‍රකාශ සම්බන්ධව විමර්ශණය කරන ලෙසට පොලිසියෙන් කරන ලද ඉල්ලීම සැකයට තුඩු දෙන බව ප්‍රකාශ කර සිටිති.
මහනාහිමි ප්‍රකාශය මුස්ලිම් විරෝධී බව පවසන්නේ “එක් වචනයක් උපයෝගී කරගෙන” බව කියා සිටින අස්ගිරි පාර්ශවයේ නියෝජ්‍ය ලේඛකාධිකාරි හිමියන් විසින් එසේ පවසන්නන්ට “විදේශීය මුදලට ගැති වුවන්” හෙලා දකින ලදී.
“උත්තරීතර මහනායක මාහිමියන් වහන්සේලාට මේ රාජ්‍ය නොවන සංවිධාන වල ඇතැම් පුද්ගලයෝ විදේශ මුදල් වලට ගැතිව මේ කරන ප්‍රකාශයන සම්බන්ධව රජයක් හැටියට මීට වඩා වගකීමෙන් කටයුතු කරන්න ඕනේ, ඔවුන් සම්බන්ධව නිසි පියවරක් ගන්න ඕනේ,” යි ලේඛකාධිකාරී නාරම්පනාවේ ආනන්ද හිමියෝ අස්ගිරි මහා විහාරයට මාධ්‍යවේදීන් කැඳවා වදාරා සිටියහ.
අස්ගිරි විහාරය එම ඉල්ලීම කළේ මුස්ලිම් ව්‍යාපාර වර්ජනය කරන ලෙසත්, මුස්ලිම්වරුන්ට ගල් ගසන ලෙසත් වරකාගොඩ ඤාණරතන නාහිමියන් විසින් යටිනුවර විහාරස්ථානයක දී කළ ප්‍රකාශයක් සම්බන්ධයෙන් විමර්ශනයක් පවත්වන ලෙස රාජ්‍ය නොවන සංවිධානයක් ඉල්ලා සිටීමෙන් අනතුරුවය.
මහනාහිමි අනුශාසනාව “ශ්‍රී ලංකාවේ පුරවැසියන්ට එරෙහිව දැනටමත් දැල්වී ඇති භීතියේ හා වෛරයේ ගිනිදැල් පෝෂණය කරන,” බව විකල්ප ප්‍රතිපත්ති කේන්ද්‍රයේ විධායක අධ්‍යක්ෂ ආචාර්ය පාක්‍යසෝති සරවනමුත්තු වැඩ බලන පොලිස්පති චන්දන දීපාල් වික්‍රමරත්න වෙත කරන ලද පැමිණිල්ලේ සඳහන් වේ.
මහනාහිමියන් මුස්ලිම් විරෝධී නොවන බව කියා පෑමට උදාහරනයක් ලෙසින් නාරම්පනාවේ ආනන්ද හිමියන් ගෙනහැර දැක්වුවේ අස්ගිරි පාර්ශවයේ දේපල මුස්ලිම් ජනතාවට කුලියට හෝ බද්දට දී තිබීමයි.
“මේ පාර්ශවයට අයත් ඉඩකඩම් වල මුස්ලිම් ජනතාව පදිංචි වෙලා ඉන්නවා. ඒ වගේම මේ මහනුවර නගරයේ තිබෙන ප්‍රධාන මුස්ලිම් දේවස්ථානයක් මේ අස්ගිරි පාර්ශවයට අයත් ඉඩකඩම් වල තමයි ඉදි කරලා තියෙන්නේ.”
අස්ගිරි මහනාහිමියන් විසින් කරන ලද අනුශාසනවාට විරුද්ධව පොලිස් පැමිණිල්ලක් ඉදිරිපත් කිරීම මුස්ලිම්වරුන් හා සිංහල බෞද්ධයන් අතර ගැටුමක් ඇති කිරීමට ගන්නා ලද අසාර්ථක උත්සාහයක් බවට අස්ගිරි පාර්ශවයේ නියෝජ්‍ය ලේඛකාධිකාරි නාරම්පනාවේ ආනන්ද හිමියන් වදාරා සිටියහ.
අස්ගිරි මහනාහිමියන්ගේ දියකෙළිනාව අනුශාසනය සම්බන්ධයෙන් පොලිසිය කිසියම් පියවරක් ගත්තේ දැයි වාර්තා නොවේ.
Facebook Comments
