හමුදාව ඉඩම් ඇල්ලීමට විරුද්ධවුවන්ට එරෙහි නඩුව තවත් කල් යයි

0
File Photo

මුලතිව් වට්ටුවාකල් ගෝඨාභය නාවික හමුදාව කඳවුරට බලහත්කාරයෙන් ඉඩම් අත්පත් කරගැනීමට විරුද්ධවුවන්ට එරෙහිව වසර තුනක් තිස්සේ විභාග වන නඩුවක් තව දුරටත් කල් දමා තිබේ.

දෙමළ ජනයාට අයත් මුලතිව් වට්ටුවාකල් ප්‍රදේශයේ ඉඩම් අක්කර 617 ක් බලහත්කාරයෙන් අත්පත් කර ගැනීමට 2018 පෙබරවාරි මාසයේදී මැනුම් කටයුතු සඳහා පැමිණි මිනින්දෝරුවන්ට බාධා කරමින්, ගෝඨාභය නාවික හමුදා කඳවුර ඉදිරිපිට උද්ඝෝෂණය කිරීම හේතුවෙන් දේශපාලඥයන් ඇතුළු බහුජන සංවිධාන ක්‍රියාධරයන් සිව් දෙනකු පොලිසිය මගින් අත්අඩංගුවට පසුව ඇප මත මුදාහැරිනි.

හිටපු පාර්ලිමේන්තු මන්ත්‍රී ඇම්.කේ.සිවාජිලිංගම්, උතුරු පළාත් සභාවේ හිටපු මන්ත්‍රී තුරෛරාසා රවිකරන්, තමිල් අරසු කච්චි ක්‍රියාධරයන් වන ඇන්ටනී ජෙගනාදන්, පීටර් ඉලන්චේලියන් සහ මුලතිව් දිසා ධීවර සමිති සම්මේලනයේ ක්‍රියාකාරී නායකයකු වන අන්නලිංගම් ෂන්මුගලිංගම්ට එරෙහිව පවරා ඇති නඩුව කොවිඩ් 19 වසංගතය හේතුවෙන් ලබන වසරේ පෙබරවාරි දක්වා කල් දමන බව මුලතිව් මහේස්ත්‍රාත්වරයා පවසා තිබේ.

ඉකුත් අගෝස්තු මාසයේදී යළිත් බලහත්කාරයෙන් ඉඩම් අත්පත් කරගැනීමට ආණ්ඩුව සුදානම් වීමේදී උතුරේ දේශපාලඥයන්, බහුජන සංවිධාන ක්‍රියාධරයන් හා ඉඩම් අහිමිකර ඇති ප්‍රදේශවාසින් එකතුව මුලතිව් පරන්තන් මාර්ගය හරස් කරමින්, ගෝඨාභය නාවික කඳවුර ඉදිරිපිට වාඩි ලා දැක්වූ විරෝධය හේතුවෙන් එය හකුලා ගැනීමට සිදුවිණි.

මුලින් අක්කර 617 ක් ගෝඨාභය නාවික හමුදා කඳවුර වෙත පවරා ගෙන තිබුන ද අද වන විට එම කඳවුර විසින් අත්පත් කරගෙන ඇති මුළු ඉඩම් ප්‍රමාණය අක්කර 670 යි රූඩ් 3 යි පර්චස් 10 ක් බව උතුරු පළාත් සභාවේ හිටපු මන්ත්‍රී තුරෛරාසා රවිහරන් මාධ්‍ය වෙත ප්‍රකාශ කර තිබිණි.

“මුලතිව් දිස්ත්‍රික්කයේ මුළු භුමි ප්‍රමාණය අක්කර 627,917 ක්. යුද්ධයට කලින් අක්කර 21,017 ක ඉඩම් ප්‍රමාණයක් මුලතිව් ජනයා සතුව තිබුණා. දැන් ඒ ප්‍රමාණය අක්කර 16,025 ක් දක්වා අඩුවෙලා තියෙනවා. කැළෑ ප්‍රදේශ ලෙස වෙන්කරලා තියෙන අක්කර 420,300 ක් හැරුණම ඉතිරි සියල්ලම මේ වෙනකොට ආණ්ඩුව විසින් අත්පත් කරගත් ඉඩම්,” යැයි පෙන්වා දෙන ඔහු පවසන්නේ රජයේ ආරක්ෂක හමුදාවලට අමතරව පුරාවිද්‍යා, වන ජීවී, වන සංරක්ෂණ දෙපාර්තමේන්තු හා මහවැලි අධිකාරිය ඇතුළු ආයතන රැසක් බලහත්කාරී ගැසට් නිවේදන මගින් ඉඩම් අත්පත් කරගැනීම් සිදුකරන බවය.

Facebook Comments

wedding people