බ්‍රිතාන්‍ය යටත් විජිත පාලකයන් ශ්‍රී ලංකාව හැර ගොස් දශක හතක් ගතවීම සමරන රාජ්‍ය උත්සවයේ විශේෂ අමුත්තා ලෙස සහභාගි වීම සඳහා ශ්‍රී ලංකාවට පැමිණ සිටින එඩ්වඩ් කුමාරයා හමුවීමට දේශපාලන සිරකරුවන්ගේ සහ අතුරුදහන්වුවන්ගේ පවුල් වල උදවියට අවස්ථාවක් ලබා දෙන ලෙසට දෙමළ නීතිඥ සංසදය ඉල්ලා තිබේ.
ශ්‍රී ලංකාවේ හැත්තෑ වැනි නිදහස් දින සමරුවේදී බ්‍රිතාන්‍ය රැජින නියෝජනය කරනු පිණිස වෙසෙක්ස් ආදිපාද නාමධාරී දෙවැනි එලිසබත් රැජිනගේ බාල පුත්‍ර එඩ්වඩ් කුමරා සිය බිරිඳ සොෆී රීස් ජෝන්ස් සමගින් පස් දින සංචාරයක් සඳහා ජනවාරි 31 දා දිවයිනට පැමි‍ණ‍ියේය.
කුමාරයාගේ පස් දින නිල සංචාරය අතරතුර දෙමළ යුද පීඩතයින්ට කුමාරයා හමුවීමට අවස්ථාවක් ලබා දෙන ලෙසට සහ ඔවුන්ගේ දුක් ගැනවිලි එඩ්වඩ් කුමරයා වෙත ඉදිරිපත් කිරිමට අවස්ථාවක් ලබා දෙන ලෙස ශ්‍රී ලංකාවේ පිහිටි බ්‍රිතාන්‍ය මහ කොමසාරිස් කාර්යාලයෙන් ඉල්ලා සිටි බව දෙමළ නීතිඥ සංසදයේ කැඳවුම්කාර නිතිඥ කේ.එස් රත්නවේල් සිලෝන් ජර්නල්ස් වෙත ප්‍රකාශ කළේය.
පොදු රාජ්‍ය මණ්ඩලයේ සමුළුවට පැමිණි හිටපු අගමැති ඩෙිවිඩ් කැමරන් සේම වෙසෙක්ස් ආදිපාද නාමධාරී එඩ්වඩ් කුමරු ද දෙමළ ජනයා හමුවනු ඇති බවට විශ්වාසය පළ කරන නිතිඥ කේ.එස් රත්නවේල් එය දෙමළ ජනයාට මහත් අස්වැසිල්ලක් වනු ඇති බව කියා සිටියේය.
මේ අතර බ්‍රිතාන්‍ය රාජකීයයාට සන්දේශයක් යවා ඇති පාරජාතික දෙමළ ඊළම් ආණ්ඩුව “ජනාධිපතිවරයාට අතට අත දෙන විට කරුණාකර වින්දිතයන්ද සිහියේ තබාගන්න” ලෙසට කුමාරයාගෙන් ඉල්ලා සිටි.
බලහත්කාරයෙන් අතුරුදහන් කරනු ලැබුවන්ගේ, මරාදමනු ලැබුවන්ගේ හා සිරගතව සිටින්නන්ගේ ඥාතීන් මෙන්ම ලිංගික අපහරණයට ගොදුරු කරගනු ලැබූ කාන්තාවන්ද සිය සංචාරයේදී මුණ ගැසෙන මෙන් පාරජාතික දෙමළ ඊළම් ආණ්ඩුව එඩ්වඩ් කුමාරයාගෙන් වැඩි දුරටත් ඉල්ලා ඇත.
Facebook Comments
