ශ්‍රී ලංකා යුද හමුදාව විසින් දැවැන්ත කඳවුරක් පවත්වාගෙන ගිය භූමියකින් මාස හතරකට ඉහතදී මිනිස් ඇටකටු සමග පිලිස්සී ගිය ටයර් සහ සිල්පර කොට හමුවීමෙන් අනතුරුව යළිත් වරක් සිදු කළ කැනීමකදී ගොඩ ගන්නා ලද ද්‍රව්‍ය අධිකරණය වෙත භාර දී තිබේ.
සමූහ මිනීවලක් ලෙස ප්‍රදේශවාසීන් සැක කෙරෙන මුරකොට්ටන්චේනෙයි භූමියකින් පෙබරවාරි 21 අඟහරුවාදා යළිත් සිදු කළ කැනීම් කටයුතු වලදී සොයා ගත් දැවී ගිය යකඩ කොටස් කිහිපයක් සහ වැලි සාම්පල් ඊයේ දිනයේ එරාවුර් මහේස්ත්‍රාත් අධිකරණය වෙත භාර දී ඇත.
කැනීම් කටයුතු සිදු කර ඇත්තේ එරාවුර් අතිරේක මහේස්ත්‍රාත් සහ දිස්ත්‍රික් විනිසුරු මොහොමඩ් ඉස්මයිල් මොහොමඩ් රිස්විගේ නියෝග පරිදිය.
මඩකලපුවට කිලෝමීටර් දහ අටක් උතුරින් පිහිටි මුරකොට්ටන්චේනෙයි හි කාලි කෝවිල ඉදිරිපිට නිවසක් සඳහා වැසිකිළි වලක් හාරද්දී අස්ථි කොටස් මතුවුනු බව කම්කරුවන් පිරිසක් මීට මාස හතරකට ඉහතදී එරාවුර් පොලිසියට දැනුම් දී තිබු අතර එහි මුලික කැනීම් කටයුතු සිදු කිරීමෙන් පසුව අස්ථි කොටස් හමුවූ ස්ථානය අවට ආරක්ෂාව යොදවා තිබුනි.
නිවස පිහිටා ඇත්තේ ශ්‍රී ලංකා යුද හමුදාව විසින් 2014 දක්වා අක්කර හතක පමණ වපසරියක පවත්වාගෙන යනු ලැබූ කඳවුරක් ඉවත් කරගෙන යාමෙන් අනතුරුව මුල් ඉඩම් අයිතිකරුවන්ට ආපසු පවරා දුන් භුමියකයි.
කැනීම් සඳහා එරාවුර් පොලිස් ස්ථානාධිපති චින්තක පිරිස්, වෝහාරික විශේෂඥ ධනංජය වෛද්‍යරත්න, අධිකරණ වෛද්‍ය පී.සී සුරංග පෙරේරා සහ වෛද්‍ය අසිත කීර්ති යනාදීන්ද සහභාගී වී තිබේ.
(Radiogagana)
Facebook Comments
