සසිරිබර මෙසිරිලක හැරදමා රට යන්න හදන පිරිස වැඩි වෙයි

දිනෙන් දින ඉහල යන ජීවන වියදම හමුවේ පීඩාවට පත්ව රටින් පිටවීමට වෑයම් කරන සංඛ්‍යාව වැඩිවෙමින් පවති.

ශ්‍රී ලංකා නාවික හමුදාව පවසන්නේ නීති විරෝධී ලෙස මෙරටින් විදෙස් රටකට සංක්‍රමණය වීමට උත්සහ කළ බවට සැකකෙරෙන පුද්ගලයන් සීයකට වැඩි පිරිසක් සතියක් තුලදී  අත්අඩංගුවට ගත් බවයි.

අනවසරයෙන් මුහුදු මගින් විදෙස් රටකට සංක්‍රමණය වීමට සුදානම් වන බවට සැක කොට ළමුන් ඇතුළු ශ්‍රී ලාංකිකයන් හැටහතර දෙනකු නාවික හමුදාව අද (ජුනි15) අත්අඩංගුවට ගෙන තිබේ.

ශ්‍රී ලංකා නාවික හමුදාව පවසන්නේ නැගෙනහිර මුහුදු ප්‍රදේශයේ සිදුකළ විශේෂ සෝදිසි මෙහෙයුමකදී, නීති විරෝධී ලෙස මුහුදු මාර්ග ඔස්සේ මෙරටින් විදෙස් රටකට සංක්‍රමණය වීමට උත්සහ කළ බවට සැකකෙරෙන පුද්ගලයන් තම භාරයට ගත් බවයි.

නාවික හමුදා භාරයට ගත් පුද්ගලයන් හැටහතර දෙනා අතර පිරිමින් 50ක්, කාන්තාවන් 11 ක් සහ ළමුන් 03 දෙනෙකුද වේ.

අත්අඩංගුවට ගත් මෙම පිරිස, ත්‍රිකුණාමලය, මුලතිව් සහ යාපනය යන ප්‍රදේශයන්හී පදිංචිකරුවන් බවට හඳුනා ගන්නා ගත් බව පවසන නාවික හමුදාව ඉදිරි නීතිමය කටයුතු සඳහා එම පිරිස ත්‍රිකුණාමලය වරාය පොලිසිය වෙත භාරදීමට නියමිතව ඇත.

මීට අමතරව ශ්‍රී ලංකා නාවික හමුදාව ජුනි මස 11 වනදා අම්පාර ඔකඳ ප්‍රදේශයට ඔබ්බෙන් වූ මුහුදු ප්‍රදේශයේ සිදුකළ සෝදිසි මෙහෙයුමකින් රට හැර යාමට උත්සහ කළ පුද්ගලයින් 38 දෙනෙකු අල්ලා ගෙන තිබුනි.

එමෙන්ම මාරවිල ප්‍රදේශයේ සහ බටහිර මුහුදු ප්‍රදේශයේ ජුනි මස 07 වනදා සිදුකළ විශේෂ සෝදිසි මෙහෙයුම් මඟින් මෙරටින් සංක්‍රමණය වීමට උත්සහ කළ 91 ක් සිය අත්අඩංගුවට ගත් බව නාවික හමුදාව නිවේදනය කළේය.