දෙමළ අතුරුදහන් කළවුන්ගේ ඥාතීන්ගෙන් ජාත්‍යන්තරයට දොස්

යුද්ධයේ අවසන් අදියරේදී ශ්‍රී ලංකා රජයේ ආරක්ෂක සේනාවලට යටත් වූ හෝ භාර වූ හෝ පසු අතුරුදහන් කරනු ලැබූ තම ඥාතීන් වෙනුවෙන් යුක්තිය ඉටුකිරීම කල් අරිමින් ජාත්‍යන්තර ද සිය අරගලය දුර්වල කරන බවට යුද වින්දිත මාතාවක් චෝදනා කර තිබේ.

උතුරු නැගෙනහිර අතුරුදහන් කරනු ලැබුවන්ගේ ඥාතීන්ගේ සංගමයේ සභාපතිනි යෝගරාසා කනගරංජනී මාතාව අවධාරණය කරන්නේ සිය සමීපතමයන් සොයා ගැනීම වෙනුවෙන් අඛණ්ඩව පෙළපාලි ගිය දෙමාපියන් අතුරින් අඩුම වශයෙන් 230 ට ආසන්න පිරිසක් යුක්තිය නොලබාම මිය ගොස් ඇති බවයි.

“අපට ජාත්‍යන්තර යුක්තිය ලැබෙන තුරු මේ අරගලය දිගටම පවතිනවා. සමීපතමයන් සොයමින් සිටි මව්පියන් 229ක් මේ වන විට මියගිහිල්ලා තියනවා. අපිත් අද නැත්නම් හෙට කියලා තමයි වතුර බෝතලයයි, බෙහෙත් ටිකයි අරගෙන පාරට බැහැලා අරගලය කරන්නේ. ජාත්‍යන්තරයත් කල් අදිනවා. අපේ අරගලය දුර්වල කරනවා කියලා අපිට දැනෙනවා.”

බලහත්කාරයෙන් අතුරුදහන් කළ සිය සමීපතමයන්ට යුක්තිය ඉල්ලා 2017 පෙබරවාරි 20 වැනි දා කිලිනොච්චියෙන් ආරම්භ කළ අඛණ්ඩ විරෝධතාවයට දින 2627 ක් සපිරුනු 2024 අප්‍රේල් 30 වැනිදා කිලිනොච්චි ආනන්ද පුරම් හි පිහිටුවා ඇති සිය කාර්යාලය ඉදිරිපිට දී දියත් කළ නිහඩ උද්ඝෝෂණයට සහභාගී වෙමින් යෝගරාසා කනගරංජනී මාතාව ඒ බව සදහන් කළාය.

ඇය එහිදී වැඩි දුරටත් චෝදනා කළේ බලහත්කාරයෙන් අතුරුදහන් කළ සිය සමීපතමයන්ට යුක්තිය ඉල්ලා අරගල කරන උතුරු නැගෙනහිර දෙපළාතේ දිස්ත්‍රික්ක අට අතර පවතින සම්බන්ධය විනාශ කිරීමට ආණ්ඩුවට සහාය දක්වන ඇතැම් සංවිධාන ද ක්‍රියාකරන බවටයි.

“අපි අපේ යුක්තිය වෙනුවෙන් අරගල කරන අතරේ මේ අරගලය දුර්වල කරලා, දිස්ත්‍රික්ක අට අතර තියන සම්බන්ධය විනාශ කරලා අපිට යුක්තිය නැති කරන්න ආණ්ඩුවවත් එක්ක ඉන්න අය සහ ඇතැම් සංවිධාන උත්සාහ කරනවා.”

වසර ගණනාවක් තිස්සේ බලහත්කාරයෙන් අතුරුදහන් කර සිටින සිය කුඩා දරුවන්ගේ ඡායාරූප අතැතිව දෙමළ මව්වරුන් කිලිනොච්චි විරෝධයට එක්ව සිටි අයුරු පළාත් බද වාර්තාකරුවන් වීඩියෝ ගත කොට තිබේ.

බලහත්කාරයෙන් අතුරුදහන් කරන ලද තම සමීපතමයන් වෙනුවෙන් යුක්තිය ඉල්ලා දියත් කරන අඛණ්ඩ අරගලයට දින 2627 ක් සම්පුර්ණ වන 2024 අප්‍රේල් 30 වැනිදා වව්නියාව පැරණි බස් නැවතුම් පොළ ඉදිරිපිටදී විරෝධතා දැක්වු බලහත්කාරයෙන් අතුරුදහන් කළවුන්ගේ ඥාතීන්ගේ සංගමයේ වව්නියාව දිස්ත්‍රික් ලේකම් සිවානන්දන් ජෙනීටා මාතාව සදහන් කළේ ලෝක කම්කරු දිනයට පෙර දිනයේ තමන්ද විරෝධතා දියත් කරන්නේ රැකියා කරමින් සිටියදී අතුරුදහන් කර ඇති සිය සමීපතමයන් සොයා ගැනීම වෙනුවෙන් බවයි.

“හෙට දිනය කම්කරු දිනය ලෙස ප්‍රකාශයට පත් කරමින් කම්කරුවන්ගේ අයිතිවාසිකම් අවධාරණය කරනවා. රැකියා කරපු අපේ ඥාතීන්ව තමයි පැහැරගෙන අතුරුදහන් කරවලා තියෙන්නේ. ඔවුන්ව සොයන්න තමයි අපි උද්ඝෝෂණ කරමින් ඉන්නේ දිගටම. අපිට ඒකට දින නියමයක් නෑ.”

අතුරුදහන් කරනු ලැබුවන් සොයාගැනීමට අඛණ්ඩ අරගලයක යෙදී සිටින ඥාතීන්ට එකම සමීපතමයකු හෝ සොයා දීමට වර්තමාන ජනාධිපති රනිල් වික්‍රමසිංහ අගමැති සමයේ 2018 පෙබරවාරි 28 දා පිහිටුවන ලද අතුරුදහන් වූ තැනැත්තන් පිළිබඳ කාර්යාලය (OMP) මේ දක්වා සමත් වී නැත.

මේ දිනවල උතුරු නැගෙනහිර ගොස් තොරතුරු එක්රැස් කරමින් සිටින බව එම කාර්යාලය නිවේදනය කර තිබේ. OMPය ඇතුළු රජයේ ආයතන හා කොමිසන් ගණනාවකට කිහිප වතාවක් තොරතුරු ලබා දී ඇති දෙමළ යුද පීඩිතයන් එමගින් සත්‍යය හෙළි කරගැනීමේ ඇති හැකියාව පිළිබඳව අවිශ්වාසයෙන් පසුවෙති.

යුද්ධයේ අවසාන දින වලදී ආරක්ෂක අංශ භාරයට පත් වීමෙන් පසුව හා යුද්ධයේ අවසන් මොහොතේ අතුරුදහන් වු තමන්ගේ ආදරණීයයන්ට අත්වූ ඉරණම හෙළි කරන ලෙස රජයට බල කරමින් 2017 වසරේ පෙබරවාරි සහ මාර්තු මාසවලදී වව්නියාව, කිලිනොච්චිය, යාපනය, මුලතිව්, ත්‍රිකුණාමලය සහ අම්පාර දිස්ත්‍රික්ක වල සත්‍යග්‍රහ ව්‍යාපාර ආරම්භ විය.

බලහත්කාරයෙන් අතුරුදහන්කරවූවන් වෙනුවෙන් යුක්තිය ලබා දෙන බව පවසමින් ආණ්ඩුව යෝජනා කර තිබෙන අතුරුදන්වූවන් සඳහා නිකුත් කරන සහතිකය ලබා ගැනීමත්, වන්දි මුදල් ලබා ගැනීමත් තම සමීපතමයන් අහිමිව සිටින යුද වින්දිත දෙමළ මව්වරුන් ප්‍රසිද්ධියේම ප්‍රතික්ෂේප කර තිබේ.

යුද්ධාවසානයේ රජයේ හමුදාවට භාරවීමෙන්ද, පැහැරගනු ලැබීමෙන්ද අනතුරුව අතුරුදහන් කරන ලද සමීපතමයන්ගේ ඉරණම හෙළි කරගැනීම සඳහා රටතුල යුක්තියක් ඉටුවී නැති දෙමළ ජනතාව ඉකුත් පහළොස් වසරකට ආසන්න කාලයක් තිස්සේ ඉල්ලා සිටින්නේ ජාත්‍යන්තර මැදිහත්වීමකි.