අර්ජුන් මහේන්ද්‍රන්ට රහස් පොලිසියේ පෙනී සිටින්නැයි අධිකරණ නියෝගයක්

0

බැඳුම්කර ගනුදෙනුව සම්බන්ධයෙන් ප්‍රකාශයක් ලබා ගැනීම සඳහා අපරාධ පරීක්ෂණ දෙපාර්තමේන්තුවේ පෙනී සිටින ලෙස මහ බැංකුවේ හිටපු අධිපති අර්ජුන් මහේන්ද්‍රන් හට කොටුව මහේස්ත්‍රාත් අධිකරණය නියෝගයක් නිකුත් කර තිබේ.

පෙබරවාරි 15 වන දිනට පෙර රහස් පොලිසියට ප්‍රකාශයක් ලබා දෙන ලෙසයි කොටුව මහේස්ත්‍රාත් ලංකා ජයරත්න නියෝග කර ඇත්තේ.

හිටපු මහ බැංකු අධිපතිවරයා මේ වන විට සිංගප්පුරුවට ගොස් සිටින බැවින් අධිකරණ නියෝගයේ පිටපතක් සිංගප්පුරුවේ අන්තර්ජාතික පොලිසිය මගින් අර්ජුන් මහේන්ද්‍රන් හට ලැබීමට සලස්වන ලෙස ද මහේස්ත්‍රාත්වරිය දැනුම් දී ඇත.

සැකකරුවෝ

එසේම මහ බැංකු බැඳුම්කර සිදුව ඇති වංචාවේ සැකකරුවන් ලෙස හිටපු මහබැංකු අධිපති අර්ජුන් මහේන්ද්‍රන්, පර්පෙචුවල් ට්‍රෙෂරීස් සමාගමේ සභාපති අර්ජුන් ඇලෝසියස් සහ එම සමාගමේ ප්‍රධාන විධායක අධ්‍යක්ෂ කසුන් පළිසේන යන පුද්ගලයින් නම් කිරීම සඳහා කොළඹ කොටුව මහේස්ත්‍රාත් අධිකරණය රහස් පොලීසියට අවසර ලබා දෙන ලදී.

රහස් පොලිසිය වෙනුවෙන් නීතිපති දෙපාර්තමේන්තුවේ නිලධාරීන් කළ ඉල්ලීමක් සලකා බැලීමෙන් පසුව කොළඹ කොටුව මහේස්ත්‍රාත් ලංකා ජයරත්න 02 සිකුරාදා මෙම නියෝගය නිකුත් කළේය.

මහබැංකු බැඳුම්කර සිද්ධිය පිළිබඳව සොයා බැලූ ජනාධිපති කොමිසම සිදුකර තිබෙන නිර්දේශ මත, රහස් පොලිසිය පරීක්ෂණයක් ආරම්භකර ඇති බව නීතිපති දෙපාර්තමේන්තුවේ අතිරේක සොලිස්ටර් ජනරාල්වරයා අධිකරණය හමුවේ කියා සිටියේය.

මේ අතර අර්ජුන් ඇලෝසියස්ගේ පර්පචුවල් ට්‍රේෂරීස් සමාගම සතු වත්කම් සහ අරමුදල් කිසිඳු පාර්ශවයකට තෑගි කිරීම, මාරු කිරීම, ආයෝජනය කරමින් අධිකරණ තහනම් නියෝගයක්ද නිකුත් කර ඇත.

Facebook Comments

wedding people