දෙමළ ජනයාටත් පිළිගත හැකි ආණ්ඩු ක්‍රමයක් සඳහා රජයට බල කරනවා

0

මැතිවරණ පොරොන්දු ඉෂ්ඨ කිරීමට ජනාධිපතිවරයාට බල කරන බව සහ දෙමළ ජනතාවටත් පිළිගත හැකි නව ආණ්ඩු ක්‍රම ව්‍යවස්ථාවක් ගෙන එන ලෙස ආණ්ඩුවට බල කර සිටින බවට සිවිල් ක්‍රියාධරයෙක් වන බ්‍රිටෝ ප්‍රනාන්දු පවසනවා.

හිටපු ජනාධිපතිවරයාට දේශපාලන අනාගතයක් නැති බව පවසන ඔහු මහින්ද රාජපක්ෂ විසින් නව ව්‍යවස්ථාවට විරුද්ධ වන්නේ ඒ නිසා බවට ප්‍රකාශ කර සිටියේ අලුත් ආණ්ඩුක්‍රම ව්‍යවස්ථාවක් උදෙසා වන ජාතික ව්‍යාපාරය කොළඹ පදනම් ආයතනයේ දී ඊයේ (15) පැවැත්වූ මහජන හමුවක් අමතමිනි.

මෛත්‍රීපාල සිරිසේන පොදු අපේක්ෂකයා වීමට පෙර සිවිල් සංවිධාන සමඟ කටයුතු නොකළ බව සිහිකල බ්‍රිටෝ පුනාන්දු මහින්ද රාජපක්ෂ ආණ්ඩුවෙන් එළියට එන්න කොන්දක් තිබුණු නිසා අපි ඔහුට ගරු කරනවා යැයි ද පැවසීය.

එදා විරුද්ධ අය අද පෙරමුණේ

චන්ද්‍රිකා බණ්ඩාරනායක කුමාරතුංග ජනාධිපතිනිය වී සිටි අවධියේදී අලුත් ආණ්ඩුක්‍රම ව්‍යවස්ථා කෙටුම්පතක් ඉදිරිපත් කළ අවස්ථාවේ එජාපය ඊට විරුද්ධ වු බවත් උත්ප්‍රාසය වන්නේ එදා විරුද්ධ වුණු රනිල් වික්‍රමසිංහ අද අලුත් ව්‍යවස්ථාවක් ගෙන එන්න පෙරමුණ ගැනීම බව කොළඹ විශ්ව විද්‍යාලයයේ මහාචාර්ය සරත් විජේසූරිය මෙයට එක් වෙමින් කියා සිටියේය.

1994 මහ මැතිවරණය අවස්ථාවේ චන්ද්‍රිකා බණ්ඩාරනායක කුමාරතුංග ප්‍රමුඛ ශ්‍රී ලංකා නිදහස් පක්ෂය ඉදිරිපත් කළ ප්‍රතිපත්ති ප්‍රකාශයේ පැහැදිලිවම නව ආණ්ඩුක්‍රම ව්‍යවස්ථාවක් ගෙන එන බවට පොරොන්දු වු බව සිහිපත් කළ මහාචාර්යවරයා අලුත් ව්‍යවස්ථාවකට ජනවරමක් නැතැයි ශ්‍රී ලංකා නිදහස් පක්ෂයට ප්‍රකාශ නොකළ හැකි බවට අවධාරණය කළේය.

Facebook Comments

wedding people