උසාවි නියෝග නොතකා මාළු බා අත් අඩංගුවේ

වන්නියේ දෙමළ හා මුස්ලිම් මිරිදිය ධිවරයන්ගේ ජීවිකාව සවි කර ගැනීම සදහා අධිකරණ නියෝගයක් මගින් වෙන් කර දී තිබෙන වැවක අනවරසයෙන් මසුන් මරමින් සිටි අසල්වාසි ගමක ධිවරයන් දෙදෙනකු පොලීසිය විසින් අත්අඩංගුවට ගෙන තිබේ.

මුලතිව්, තන්නිමුරිප්පු වැවේ අනවසරයෙන් මසුන් මරමින් සිටි සිංහල ධිවරයන් අත්අඩංගුවට ගැනීම සදහා ඔට්ටුසුඩාන් පොලීසිය නොවැම්බර් 2 වැනිදා පැමිණි අවස්ථාවේ ධිවරයන් කිහිප දෙනෙකු පලා ගොස් ඇති අතර අත්අඩංගුවට ගෙන ඇත්තේ ගජබාපුර පදිංචි ධිවරයන් දෙදෙනෙකි.

පලා ගිය ධිවරයන්ට අයත් යතුරුපැදි 15 ක් පොලීසිය සිය භාරයට ගත් බව පළාත් බද වාර්තාකරුවෝ වැඩි දුරටත් පවසති.

මුහුදුබඩපත්තුව මිරිදිය ධීවර සංගමයේ නායක මුරුගන් මූර්ති පවසන්නේ පවුල් 200 ට වැඩි සංඛ්‍යාවක් මෙම වැවෙන් ජීවිකාව සරිකරගන්නා නමුත් පිටස්තරයන් වසර 10 ක පමණ කාලයක සිට හොර රහසේ මසුන් මැරිම නිසා සිය ජීවනෝපායට මරු පහරක් එල්ල වි ඇති බවයි.

“අපි දැනටමත් වැවේ අනවසරයෙන් මසුන් අල්ලන ධීවරයන් අල්ලලා පොලිසියට භාර දී උසාවිය දක්වා ගිහිල්ලා තියනවා. දිස්ත්‍රික් ලේකම්, ධීවර ඇමැති ඔක්කෝටම කියලා තියනවා. අවුරුදු 10 ට වඩා වැඩි කාලයක් මේ ප්‍රශ්නේ තියනවා. මේක නවත්තන්න කිසි පියවරක් අරන් නෑ. පවුල් 200 ට වඩා සංඛ්‍යාවක් මේ වැවෙන් යැපෙනවා. මේ සතිය පුරාම දවස් හතක් වැඩ කරලත් අල්ලලා තියෙන්නේ මාළු කිලෝ 7 යි. මේ නීති විරෝධීව මාළු අල්ලන ධීවරයන්ව නවත්තන්න ඔන.”

මුහුදුබඩපත්තුව මිරිදිය ධීවර සංගමයේ ලේකම් සිවඥානම් සිවබාලක්‍රිෂ්ණන් අවධාරණය කරන්නේ තන්නිමුරිප්පු වැවේ මසුන් මැරීමේ අයිතිය පවතින්නේ කුමුලමුනෙයි, තන්නිපුරම් හා හිජ්රාපුරම් දෙමළ සහ මුස්ලිම් වැසියන්ට පමණක් බවට අධිකරණ නියෝගයක් පවතින බවයි.

“2011 වසරේ දී මේ වැවේ අනවසරයෙන් මසුන් ඇල්ලු ධීවරයන්ට එරෙහිව අපි මුලතිව් දිසා අධිකරණයේ නඩුවක් ගොනු කළා. එහි දී මසුන් ඇල්ලීමට අවසර ලැබුණේ හිජ්රාපුරම් මිරිදිය ධිවර සංගමයට සහ කරෙයිතුරෙයිපත්තු මිරිදිය ධීවර සංගමයට පමණයි. මේ ඔක්කොම ඉක්මවා ගිහිල්ලා මෙයාලා ඇවිල්ලා මාළු අල්ලනවා.”

මුලතිව්, තන්නිමුරිප්පු වැවේ මසුන් මැරීමේ අයිතිය පවතින දෙමළ සහ මුස්ලිම් ජනයා චෝදනා කර තිබුනේ ගජබාපුර, සම්පත් නුවර, ජනකපුර හා කල්‍යාණපුර සිට පැමිණි සිංහල ජනයා වසර ගණනාවක සිට අනවසරයෙන් තන්නිමුරිප්පු වැවේ මසුන් මැරීමේ කටයුතු වල නිතර වන බවයි.

සිංහල ධිවරයන් 38

මුලතිව්, තන්නිමුරිප්පු වැවේ අනවසරයෙන් මසුන් මරමින් සිටි සිංහල ධිවරයන් 38 දෙනකු අගොස්තු 6 වැනිදා ඔට්ටුසුඩාන් පොලීසියට අල්ලා දීමට ප්‍රදේශයේ මුස්ලිම් සහ දෙමළ ජනයා කටයුතු කර තිබුනි.

ඔවුන් අතරින් 9 දෙනකු පොලිස් අත්අඩංගුවෙන් මිදී පළා ගොස් තිබු අතර මුලතිව් දිස්ත්‍රික් ලේකම් කාර්යාලය ඉදිරිපිටදී අගෝස්තු 7 වැනිදා විරෝධතා දියත් කළ පළාත් වාසී ධීවර ජනයා දිස්ත්‍රික් ලේකම්වරියගෙන් ඉල්ලා තිබුනේ මුස්ලිම් සහ දෙමළ ජනයාට අයත් සම්පත් පිටස්තරයන්ට බලහත්කාරයෙන් අත්පත්කරගැනීමට ඉඩ සලසා නොදෙන ලෙසයි.

සිංහල ධීවරයන් අල්ලා දීමට කටයුතු කළ දෙමළ සහ මුස්ලිම් ධිවරයන් 17 දෙනකුට ප්‍රකාශ ලබා දීම සදහා පොලීසියට කැදවා ඔවුන් සියල්ලන්ම අත්අඩංගුවට ගැනීමට ඔට්ටුසුඩාන් පොලීසිය පසුගිය 6 වැනිදා කටයුතු කළේය.

අත්අඩංගුවට ගත් සිංහල ධිවරයන් 29 දෙනාත් දෙමළ හා මුස්ම් ධිවරයන් 17 දෙනාත් අධිකරණයට ඉදිරිපත් කිරීමෙන් පසුව රක්ෂිත බන්ධනාගාර ගත කිරීමට මහේස්ත්‍රාත්වරයා නියෝග කළ අතර නිති විරෝධි ලෙස මසුන් මැරීමේ කටයුතු යළි සිදු නොකරන බවට වු පොරොන්දුව මත ඔවුන් නිදහස් කිරීමට අධිකරණය ක්‍රියා කළ බවයි පළාත් බද වාර්තාකරුවන් වැඩි දුරටත් පවසන්නේ.