ව්‍යවසායක පාරාදීසයක් ලෙස මෙරට යළි ගොඩ නංවනවා – ජනපති

0
662
wedding people

ශ‍්‍රී ලාංකිකයන් සතු ව්‍යවසායික නිපුණතාවය ප‍්‍රයෝජනයට ගනිමින් ව්‍යවසායක පාරාදීසයක් ලෙස මෙරට යළි ගොඩනැගීම සඳහා 2018 අයවැය තුළින් රජය එන්ටර්ප‍්‍රයිස් ශ‍්‍රී ලංකා වැඩසටහන හඳුන්වා දුන් බව ජනපති පවසයි.

රජයේ පොලී සහනාධාර සහිත ණය යෝජනා ක‍්‍රම රැසක් මෙම වැඩසටහන යටතේ දියත් කිරීමට නියමිත අතර රාජ්‍ය හා පෞද්ගලික බැංකු, විදේශීය මූල්‍ය සහයෝගිතා ආයතන හා අනෙකුත් සහභාගිත්ව ආයතන සමග ඒකාබද්ධව ක්‍රියාත්මක මෙම වැඩසටහන සඳහා අවශ්‍ය උපදෙස් මුදල් අමාත්‍යාංශය විසින් අදාළ බැංකු වෙත ලබාදී ඇති අතර, ඒ අනුව එම බැංකු විසින් අදාළ ණය පහසුකම් ලබාදීම මේ වන විටත් ආරම්භ කර තිබේ.

ව්‍යවසායකයින් වෙනුවෙන් කෙරෙන මෙම ආයෝජන පිළිබඳ නිරන්තර පසු විපරමකට ලක් කරමින් ඔවුන්ට අවශ්‍ය දැනුම සහ මගපෙන්වීම ලබාදීමේ වැදගත්කම ජනාධිපති මෛත්‍රීපාල සිරිසේන 22 සිකුරාදා කොළඹ බණ්ඩාරනායක ජාත්‍යන්තර සම්මන්ත‍්‍රණ ශාලාව් පැවති “එන්ටර්ප‍්‍රයිස් ශ‍්‍රී ලංකා” වැඩසටහනේ ණය යෝජනා ක‍්‍රම එළිදැක්වීමේ අවස්ථාවට එක්වෙමින් පෙන්වා දුනි.

ව්‍යවසායකයින් සඳහා ණය යෝජනා ක‍්‍රම හඳුන්වා දෙනවා සේම ඔවුන්ගේ නිෂ්පාදන සඳහා හොඳ වෙළෙඳපොළක් මෙන්ම සාධාරණ මිලක් ලබාදිමටත් එම නිෂ්පාදන පිටරටින් ගෙන්වන්නේ නම් එය වැළැක්වීමටත් අදාළ සියලු ආයතන ඒකාබද්ධ වූ වැඩපිළිවෙළක අවශ්‍යතාවය ජනපති අවධාරණය කළේය.

රාජ්‍ය බැංකු

පිටරටින් නවීන දැනුම, තාක්ෂණය සහ උපදේශනය අවශ්‍ය නමුත් දේශීය ව්‍යවසායකයා සතු ශක්තිය සහ අත්දැකීම් පිළිබඳව විශ්වාස තැබිය යුතු බව පැවසු ජනපති ව්‍යවසායකයින්ට රජය මගින් ලබාදිය හැකි ඉහළම අතදීම වන්නේ ඔවුන්ට අවශ්‍ය මුල්‍ය සහ මුල්‍ය නොවන පහසුකම් සලසා දීම බවයි පවසන්නේ.

මෙහිදි රාජ්‍ය බැංකු පිළිඳව අදහස් දැක්වු ජනපති මෛත්‍රීපාල සිරිසේන රාජ්‍ය බැංකු ලාභ ලබන මෙන්ම සේවා සැපයීමේ අරමුණ ඇතිව කි‍්‍රයාත්මක වීමේ වැදගත්කම පැහැදිළි කළේය.

රාජ්‍ය බැංකු ලබන අසිමිත ලාභයෙන් සියයට පනහක් වාණිජ ගනුදෙනු මෙන්ම සියයට පනහක් සේවා සපයන බැංකු බවට පත්වීමේ වැදගත්කම ජනාධිපති මෛත්‍රීපාල සිරිසේන වැඩි දුරටත් අවධාරණය කර සිටියේය.

“එන්ටර්ප‍්‍රයිස් ශ‍්‍රී ලංකා”

මුදල් හා ජනමාධ්‍ය අමාත්‍ය මංගල සමරවීරගේ සංකල්පයක් අනුව ක්‍රියාත්මක වන “එන්ටර්ප‍්‍රයිස් ශ‍්‍රී ලංකා” වැඩසටහන, යෝජනා ක‍්‍රම 16කින් සමන්විත වන අතර, පොලී සහනාධාර ණය යෝජනා ක‍්‍රම 11 ක්, විදේශ ණ්‍ය ආධාර මත කි‍්‍රයාත්මක වන ප‍්‍රතිමූල්‍ය ණය යෝජනා ක‍්‍රම 3 ක් හා මූල්‍ය හා මුල්‍ය නොවන පහසුකම් සැලසෙන වැඩසටහන් 2ක් ඒ තුළ අන්තර්ගත වේ.

මෙකී සහන ණය යෝජනා ක‍්‍රම සඳහා 2018 වසර තුළ පොලී සහනාධාර ගෙවීමට පමණක් රජය විසින් රුපියල් මිලියන 5,250ක් වෙන්කර ඇති අතර එම මුදල උපයෝගි කරගනිමින් මෙරට ආර්ථිකය තුළ රුපියල් මිලියන 60,000කට ආසන්න ප‍්‍රාග්ධනයක් සිදුකළ හැකි වෙතැයි අපේක්ෂා කෙරේ. එමෙන්ම මෙමගින් නව රැකියා අවස්ථා 50,000 ක් පමණ ඇති කිරීමට ද අපේක්ෂා කරයි.

අග‍්‍රාමාත්‍ය රනිල් වික‍්‍රමසිංහ, මුදල් හා ජනමාධ්‍ය අමාත්‍ය මංගල සමරවීර ඇතුළු මැති ඇමතිවරු රැසක් සහ ජනමාධ්‍ය අමාත්‍යාංශයේ ලේකම්, මහබැංකු අධිපති ඇතුළු නිලධාරින් මෙම අවස්ථාවට එක්ව සිටියහ.

Facebook Comments