උතුරේ තරුණයාගේ මරණය ගැන කොළඹ පොලිසිය කියන කතාවලින් ප්‍රශ්න

අත්අඩංගුවේ මරුමුවට පත් උතුරේ දෙමළ තරුණයකු සම්බන්ධ විමර්ශන කටයුතු හමාර වීමට කලින්ම පොලිසිය විසින් ප්‍රසිද්ධියට පත් කර ඇති නිගමනවල සත්‍යතාව පිළිබඳව ගැටළු මතුවී තිබේ.

යාපනය දිස්ත්‍රික්කයේ සිත්තන්කේනියේ පදිචිව සිටි නාගරාසා ඇලෙක්ස් අත් අඩංගුවට ගෙන පොලිසියේ රඳවා සිටි දින වකවානු සම්බන්ධයෙන් පොලිස් මාධ්‍ය කොට්ඨාසය විසින් නිවේදනය කර ඇති කරුණු සත්‍යයෙන් තොර බව නීතිඥයන් මෙන්ම සිරකාර අයිතිවාසිකම් වෙනුවෙන් පෙනී සිටින ප්‍රමුඛතම සංවිධානයක් ද පෙන්වා දෙයි.

ඔහුගේ මරණය සිදුවූ ආකාරය සම්බන්ධයෙන් පොලිසිය විසින් ප්‍රකාශයට පත් කර ඇති කරුණු රජයේ අධිකරණ වෛද්‍ය නිලධාරියකු විසින් පශ්චාත් මරණ පරීක්ෂණයේදී අනාවරණය කරගත් හේතු වලට පටහැනි ආකාරයක් දිස් වේ.

26 හැවිරිදි දෙමළ තරුණයා නොවැම්බර් 8 වැනිදා අත් අඩංගුවට ගන්නා ලද බව ඔහුගේ මව විසින් යාපනයේ ශ්‍රී ලංකා මානව හිමිකම් කාර්යාලයට නොවැම්බර් 10 දා පැමිණිලි කර තිබුණි. කෙසේවෙතත්, පොලිසිය පවසන පරිදි මුදල් සහ රන් භාණ්ඩ කොල්ලකෑමේ අපරාධයක් සම්බන්ධ විමර්ශනයක් සඳහා තරුණයන් දෙදෙනකු අත් අඩංගුවට ගෙන ඇත්තේ මවගේ පැමිණිල්ලට පසුදාය.

ඔවුන්ගේ නීතිඥයන් පවසන්නේ පොලිසිය නිකරුනේ තරුණයන් අත් අඩංගුවට ගත් බවයි.

“ඉහත අපරාධය සම්බන්ධයෙන් 2023.11.11 වන දින රාත්‍රී කාලයේ වඩුක්කෝට්ටේ පොලිස් වසමේ නාගකන්නි ප්‍රදේශයේදී සැකකරුවන් දෙදෙනකු වඩුක්කෝට්ටේ පොලිස් ස්ථානයේ නිලධාරීන් විසින් අත් අඩංගුවට ගෙන අධිකරණ වෛද්‍යවරයා වෙත ඉදිරිපත් කර 2023.11.12 වන දින මල්ලාකම් ගරු මහේස්ත්‍රාත් අධිකරණයට ඉදිරිපත් කිරීමෙන් පසු 2023.11.21 වන දින දක්වා රක්ෂිත බන්ධනාගාර ගත කර ඇත,” යි පොලිස් මාධ්‍ය ප්‍රකාශක කාර්යාලය විසින් නොවැම්බර් 21 දා නිකුත් කරන ලද නිවේදනයක දැක්වේ.

මියගිය තරුණයා මහේස්ත්‍රාත්වරයකු හමුවට පමුණුවා ඇත්තේ නොවැම්බර් 12 දාය.

එදින වනතුරු පොලිසිය විසින් තරුණයන් දෙදෙනාම දවස් හතරක් තිස්සේ නීති විරෝධී ලෙස රඳවා තබාගෙන වධබන්ධන පැමිණවූ බව ඔවුන්ගේ නීතිඥ කනගරත්නම් සුගාෂ් පවසයි.

“මියගිය තරුණයා සහ ඔහුගේ යාලුවෙක් කිසිම හේතුවක් නැතිව අත් අඩංගුවට අරගෙන නීති විරෝධී විදියට පොලිසියේ හිරකරගෙන ඉඳලා පහර දීලා තියෙනවා. ඒගොල්ලන්ට අවශ්‍ය වෛද්‍ය ප්‍රතිකාර ලබා දීලා නැහැ. ඊට පස්සේ මේ කාරනා පිටට යවන්න එපා කියලා තර්ජනය කරලා තියෙනවා. ඒ විතරක් නෙවෙයි, ඒ තර්ජනවලින්, වධහිංසාවෙන් ඒ අහිංසක තරුණයාගේ ජීවිතය නැති කරලා තියෙනවා.”

ඇලෙක්ස් සමග අත් අඩංගුවට ගන්නා ලද තරුණයා නොවැම්බර් 21 දා ඇප පිට නිදහස් කරගත් නීතිඥ සුගාෂ් පවසන්නේ ඔහුට වධහිංසා නොකළ බව සඳහන් ලිපියක් දෙන ලෙස බලකරමින් පොලිසිය පවුලේ සාමාජිකයන්ට තර්ජනය කර ඇති බවයි.

නාගරාසා ඇලෙක්ස් අධිකරණය හමුවට නොපමුණුවා කිසිදු නිල ලියාපදිංචි කිරීමකින් තොරව සිරකොට තබාගෙන පොලිසිය විසින් අමානුෂික වධහිංසා පැමිණවූ බවට සිරකරු අයිතිවාසිකම් සඳහා කමිටුව ශ්‍රී ලංකා මානව හිමිකම් කොමිසමේ ප්‍රධාන කාර්යාලයට නොවැම්බර් 21 දා පැමිණිලි කොට තිබේ.

පොලිස් මාධ්‍ය ප්‍රකාශක නිහාල් තල්දුව මාධ්‍යවේදියකුට පවසා තිබුනේ නාගරාජා ඇලෙක්ස් අත් අඩංගුවට ගන්නා ලද්දේ නොවැම්බර් 11 දා බවයි.

“නුමුත් අපිට දැනගන්නට ලැබුනා ඔහුගේ නිවැසියන්ගෙන් මොහු අත් අඩංගුවට ගෙන තිබෙන්නේ 11යි අටවෙනිදා [නොවැම්බර් 08]. නමුත් පොලිසිය රෙජිස්ටර් කරලා තියෙන්නේ මොහුව 11 වෙනිදා. නිකම් පොලිසියේ තියාගෙන මොහුට අමානුෂික විදියට වධහිංසනවලට පත් කරලා, පසුව මොහුව 12 වෙනිදා ගරු අධිකරණයට ඉදිරිපත් කරනවා,” යි කමිටුවේ අධ්‍යක්ෂ මණ්ඩල සභාපති සුදේශ් නන්දිමාල් ද සිල්වා කොළඹ මානව හිමිකම් කාර්යාලය ඉදිරිපිටදී මාධ්‍යවේදීන්ට කියා සිටියේය.

ඇලෙක්ස් යාපනය ශික්ෂණ රෝහලට ගෙන යන ලද්දේ පොලිසිය විසින් පහර දීම පිළිබඳව අධිකරණය හමුවේ දැනුම් දීමෙන් අනතුරුව මහේස්ත්‍රාත්වරිය දුන් නියෝගය පරිදි යයි සිරකාර අයිතිවාසිකම් ක්‍රියාධරයා අවධාරණය කළේය.

අත් අඩංගුවේ සිටි තරුණයන් උසාවි නියෝගයකින් රෝහල්ගත කරන ලද බව පොලිස් නිවේදනයේ සඳහන් නොවේ. පොලිස් මාධ්‍ය කොට්ඨාසය පවසන්නේ මහේස්ත්‍රාත් අධිකරණයට ඉදිරිපත් කිරීමට පෙරම සැකකරුවන් දෙදෙනා අධිකරණ වෛද්‍යවරයා වෙත ඉදිරිපත් කරන ලද බවයි.

මල්ලාකම් මහේස්ත්‍රාත් අධිකරණය විසින් නොවැම්බර් 12 වැනිදා තරුණයන් රිමාන්ඩ් ගත කිරීමෙන් අනතුරුව මියගිය සැකකරු බන්ධනාගාරය භාරයේ සිටියදී ‘හදිසි අසනීප තත්වයකින් පෙලීම’ නිසා යාපනය රෝහලට ඇතුලත් කර නොවැම්බර් 16 දා දක්වා ප්‍රතිකාර ලබාදුන් බව පොලිසිය කියයි. එහෙත්, රෝහල් ගත කළ දිනයක් පොලිස් නිවේදනයේ නොදැක්වේ.

“2023.11.19 දින සැකකරු නැවත හදිසියේ අසනීප වීම හේතුවෙන් යාපනය රෝහලේ හදිසි ප්‍රතිකාර ඒකකයට ඇතුලත් කිරීමෙන් පසු මියගොස් ඇති අතර ඒ සම්බන්ධයෙන් බන්ධනාගාර නිලධාරීන් විසින් ගරු අධිකරණයට දැනුම් දී ඇතැ,’’ යි පොලිස් මාධ්‍ය කොට්ඨාස නිවේදනයේ දැක්වේ.

පොලිසිය පවසන පරිදි තරුණයා මියගොස් ඇත්තේ රෝහලේදීය. එහෙත්, මහේස්ත්‍රාත් ඒ ඒ ආනන්දරාජාගේ අධීක්ෂණය යටතේ නොවැම්බර් 20 දා පශ්චාත් මරණ පරීක්ෂණය පැවැත්වූ යාපනය ශික්ෂණ රෝහලේ අධිකරණ වෛද්‍ය නිලධාරියාගේ වාර්තාව අනුව නාගරාසා ඇලෙක්ස් රෝහලට ගෙන එන විටත් මියගොසිනි.

මරණයට සෘජුව හෝ වක්‍රාකාරයෙන් තුඩුදුන් කිසිදු ස්වාභාවික රෝගාබාධයක් සොයා නොගත් බව අධිකරණ වෛද්‍ය නිලධාරි වාර්තාවේ පැහැදිලිව දක්වා ඇතත්, “ශරීරයේ සිදුවූ තුවාල හේතුවෙන් වකුගඩු ක්‍රියාකාරිත්වය අවහිර වීමක්” මරණයට හේතුව ලෙස පොලිසිය විසින් ප්‍රසිද්ධියට පත් කර තිබේ.

තුවාල ඇත්තේ කොහිද යන්න පොලිසිය කියන්නේ නැත. එහෙත් පශ්චාත් මරණ පරීක්ෂණ වාර්තාව ඒ ගැන පැහැදිලිව දක්වා ඇත.

“බඳේ, අත් දෙකේ සහ පාද දෙකේ බහුවිධ තුවාල (තැලීම් සහ සීරීම්) දැකගන්නට තිබුණි,” යි පශ්චාත් මරණ පරීක්ෂණය පැවැත්වූ වෝහාරික විශේෂඥ වෛද්‍ය රුද්‍රපසුපති මයෝරදන් ලියා තිබේ.

පොලිස් වධහිංසාව මරණයට හේතුව බවට නාගරාසා ඇලෙක්ස්ගේ නීතිඥයන් උසාවියට කරුණු දක්වා ඇත.

“සැකකරුවන් දෙන්නාම ඔලුව පහලට හිටින්නට එල්ලලා ම්ලේච්ඡ විදියට ගහලා ඇලෙක්ස්ගේ මූණ පැට්‍රොල් පොඟවපු පොලිතින් කවරෙක ඔබලා තිබ්බා, ඇලෙක්ස් මැරුණේ ඒ වදබන්ධන නිසා කියලා අපි අධිකරණයට දැනුම් දුන්නා,” යි ජීවතුන් අතර සිටින තරුණයාට ඇප ලබාගැනීමෙන් පසුව නීතිඥ කනගරත්නම් සුගාෂ් උතුරේ මාධ්‍යවේදීන්ට කියා තිබුණි.

මරණයට හේතුව කුමක්දැයි විමර්ශනය කෙරෙමින් පවතින අතර පටක පරීක්ෂණ සඳහා නියැදි ලබාගත් බව වෛද්‍ය මයෝරදන් ගේ වැඩිදුරටත් සඳහන් වේ.

“අධිකරණ වෛද්‍ය නිලධාරිවරයාගේ වාර්තාව පදනම් කරගෙන මෙම සැකකරුගේ හදිසි මරණය සම්බන්ධයෙන් යාපනය ජ්‍යෙෂ්ඨ පොලිස් අධිකාරිවරයාගේ සෘජු අධීක්ෂණය යටතේ කන්කසන්තුරය කොට්ඨාසයට අනුයුක්ත සහකාර පොලිස් අධිකාරිවරයකුගේ ප්‍රධානත්වයෙන් යුතුව යාපනය කොට්ඨාස අපරාධ විමර්ශන කණ්ඩායමේ නිලධාරීන් කණ්ඩායමක් විසින් වැඩිදුර විමර්ශන කටයුතු සිදු කරගෙන යනු ලබයි,” යනුවෙන් පොලිස් මාධ්‍ය කොට්ඨාසය නිකුත් කළ නිවේදනයේ සඳහන් වෙයි.

පොලිසිය විසින් කළ බවට විශ්වාස කෙරෙන අපරාධයක් සම්බන්ධයෙන් විමර්ශන පැවැත්වීම පොලිසියටම භාරදීමෙන් සත්‍යය වල දැමෙනු ඇති බවට මියගිය තරුණයාගේ නීතිඥයා මෙන්ම සිරකාර අයිතිවාසිකම් ක්‍රියාධාරීහුද බිය පල කරති.